Read Papantla Totonac Jeremias 36 Bible Online

Jeremias 36 - Papantla Totonac bible

Jeremias 36

¹I a sosode ku den e di kuater ana di Joakim, yu homber di Josias, rei di Juda, e palabra aki di SENOR a yega na Jeremias, bisando:

²"Kohe un rol i skirbi riba dje tur e palabranan ku Mi a papia ku bo tokante di Israel, tokante di Juda i tokante di tur e nashonnan, for di dia ku Mi a papia ku bo pa prome biaha, for di tempu di Josias, te dia djawe.

³Kisas e kas di Juda lo tende di tur e kalamidat ku Mi ta plania pa trese riba nan, pa kada hende bolbe for di su mal kaminda; e ora ei lo Mi pordona nan inikidat i nan pika."

⁴E ora ei Jeremias a yama Baruk, yu homber di Nerias, i segun Jeremias tabata dikt'e, Baruk tabata skirbi riba un rol tur e palabranan di SENOR ku El a papia kune.

⁵I Jeremias a duna Baruk ordu, bisando: "Mi a wordu prohibi; mi no por bai den e kas di SENOR.

⁶Abo bai anto i lesa for di e rol ku bo a skirbi segun ku mi a dikta e palabranan di SENOR, pa e pueblo den e kas di SENOR tende riba un dia di yunamentu. I lesa nan tambe pa henter e pueblo di Juda, ku ta bin for di nan statnan, tende.

⁷Kisas nan suplika lo yega dilanti di SENOR, i tur hende lo bolbe for di su mal kaminda. Pasobra e rabia i e furia ku SENOR a pronunsia kontra e pueblo aki ta grandi."

⁸I Baruk, yu homber di Nerias, a hasi konforme tur loke profeta Jeremias a orden'e, i a lesa for di e buki e palabranan di SENOR den e kas di SENOR.

⁹Awor a sosode den e di sinku ana di Joakim, yu homber di Josias, rei di Juda, den e di nuebe luna, ku henter e pueblo na Jerusalem i henter e pueblo ku a bin for di e statnan di Juda pa Jerusalem, a proklama un yunamentu na SENOR.

¹⁰E ora ei Baruk a lesa for di e buki, pa henter e pueblo tende e palabranan di Jeremias, den e kas di SENOR, den e sala di Gemarias, yu homber di Safan, e eskriba, den e plenchi ariba, na entrada di Porta Nobo di e kas di SENOR.

¹¹Awor ora Mikaias, yu homber di Gemarias, yu homber di Safan, a tende tur e palabranan di SENOR for di e buki,

¹²el a baha bai kas di rei i a drenta e sala di e eskriba. I mira, tur e ofisialnan tabata sinta eiden: Elisama, e eskriba, i Delaia, yu homber di Semaias, i Elnatan, yu homber di Akbor, i Gemarias, yu homber di Safan, i Sedekias, yu homber di Ananias, i tur e otro ofisialnan.

¹³Anto Mikaias a konta nan tur e palabranan ku el a tende ora Baruk tabata lesa for di e buki pa e pueblo tende.

¹⁴E ora ei tur e ofisialnan a manda Jehudi, yu homber di Netanias, yu homber di Selemias, yu homber di Kusi, serka Baruk, bisando: "Kohe den bo man e rol for di kual bo a lesa pa e pueblo tende i bin aki." Asina Baruk, yu homber di Nerias, a kohe e rol den su man i a bai serka nan.

¹⁵I nan a bis'e: "Pa fabor, sinta bo les'e pa nos." Asina Baruk a les'e pa nan.

¹⁶Awor a sosode ku ora nan a tende tur e palabranan, un a bira wak otro tur spanta, i a bisa Baruk: "Siguramente nos lo reporta tur e palabranan aki na rei."

¹⁷I nan a puntra Baruk: "Pa fabor, konta nos, kon bo a skirbi tur e palabranan aki? Ta Jeremias a dikta nan na bo?"

¹⁸E ora ei Baruk a kontesta nan: "El a dikta tur e palabranan aki na mi, i mi a skirbi nan ku enk den e buki."

¹⁹E ora ei e ofisialnan a bisa Baruk: "Abo i Jeremias, bai skonde, i no laga ningun hende sa unda boso ta."

²⁰Asina nan a bai serka rei den korte, despues ku nan a pone e rol den e sala di Elisama, e eskriba, i nan a reporta tur e palabranan na rei.

²¹E ora ei rei a manda Jehudi buska e rol i el a bai koh'e for di e sala di Elisama, e eskriba. I Jehudi a les'e pa rei, i pa tur e ofisialnan ku tabata para banda di rei.

²²Awor tabata e di nuebe luna di ana i rei tabata sinta den e kas di wenter, ku kandela send! den e konfo su dilanti.

²³I a sosode ku kada biaha ku Jehudi a kaba di lesa tres of kuater kolumna, rei tabata korta nan afo ku un kuchu di eskriba i tabata tira nan den e kandela ku tabatin den e konfo, te ora ku henter e rol a kima kompletamente den e kandela ku tabatin den e konfo.

²⁴Tog rei i tur su sirbidonan ku a tende tur e palabranan aki no a hana miedu, ni nan no a sker nan pananan.

²⁵Maske Elnatan, Delaia i Gemarias a roga rei pa no kima e rol, e no kier a skucha nan.

²⁶I rei a duna ordu na Jerameel, yu homber di rei, na Seraias, yu homber di Azriel, i na Selemias, yu homber di Abdel, pa kohe Baruk, e eskriba, i profeta Jeremias prezo, ma SENOR a skonde nan.

²⁷Anto despues ku rei a kima e rol i e palabranan ku Jeremias a dikta pa Baruk skirbi, e palabra di SENOR a yega na Jeremias, bisando:

²⁸"Bolbe kohe un otro rol i skirbi riba dje tur e palabranan ku tabatin den e prome rol ku Joakim, rei di Juda, a kima.

²⁹I bisa tokante di Joakim, rei di Juda: 'Asina SENOR ta bisa: "Bo a kima e rol aki, i a puntra: 'Pakiko bo a skirbi den dje ku sigur-sigur rei di Babilonia lo bin i destrui e tera aki, i kaba ku hende i bestia for di riba dje?'"

³⁰Pesei, asina SENOR ta bisa tokante di Joakim, rei di Juda: "E lo no tin ningun hende pa sinta riba trono di David, i su kadaver lo wordu tira afo i eksponi na kalor di dia i na frialdat di nochi.

³¹Tambe lo Mi kastiga e, su desendientenan i su sirbidonan pa nan inikidat, i lo Mi trese riba nan, riba e habitantenan di Jerusalem i riba e hendenan di Juda tur e kalamidat ku Mi a deklara na nan--sin ku nan a skucha.

³²E ora ei Jeremias a kohe un otro rol duna e eskriba Baruk, yu homber di Nerias, i el a skirbi riba dje, segun Jeremias tabata dikta, tur e palabranan di e buki ku Joakim, rei di Juda, a kima den kandela; i hopi palabra similar a wordu anadi.