Read Papantla Totonac Jeremias 37 Bible Online

Jeremias 37 - Papantla Totonac bible

Jeremias 37

¹Awor Sedekias, yu homber di Josias, kende Nabukodonosor, rei di Babilonia, a hasi rei den e tera di Juda, tabata reina komo rei na luga di Konias, yu homber di Joakim.

²Ma ni e, ni su sirbidonan, ni e pueblo di e tera no a paga atenshon na e palabranan di SENOR, ku El a papia dor di profeta Jeremias.

³Sinembargo, rei Sedekias a manda Jukal, yu homber di Selemias, i saserdote Sofonias, yu homber di Maaseias, serka profeta Jeremias, bisando: "Pa fabor, hasi orashon na SENOR nos Dios pa nos."

⁴Awor Jeremias tabata liber pa drenta i sali meimei di e pueblo, pasobra ainda nan no a ser'e den prizon.

⁵Mientras tantu e ehersito di Farao a sali for di Egipto; i ora ku e kaldeonan ku tabata rondona Jerusalem a tende e notisia tokante di esaki, nan a retira for di Jerusalem.

⁶E ora ei e palabra di SENOR a yega na profeta Jeremias, bisando:

⁷"Asina SENOR, e Dios di Israel, ta bisa: 'Asina boso tin ku bisa rei di Juda, kende a manda boso serka Mi pa konsulta ku Mi: "Mira, e ehersito di Farao, ku a bin pa yuda boso, lo bolbe bek pa su tera Egipto.

⁸E kaldeonan tambe lo bolbe i bringa kontra e stat aki, i nan lo kaptur'e i kim'e ku kandela."'

⁹"Asina SENOR ta bisa: 'No gana boso mes dor di bisa: "Siguramente e kaldeonan lo bai for di nos," pasobra nan no ta bai.

¹⁰Maske boso derota henter e ehersito di e kaldeonan ku ta bringa kontra boso, i keda solamente hombernan herida meimei di nan, kada homber lo a lanta den su tent, pa bai kima e stat aki ku kandela.'"

¹¹Awor a sosode ku ora e ehersito di e kaldeonan a retira for di Jerusalem pa motibu di e ehersito di Farao,

¹²Jeremias a sali for di Jerusalem pa bai na tera di Benjamin, pa asepta ayanan su parti di e propiedat meimei di e pueblo.

¹³Mientras ku e tabata na Porta Benjamin, un kapitan di guardia ku yama Irias, yu homber di Selemias, yu homber di Hananias, tabata einan; i el a aresta profeta Jeremias, bisando: "Abo ta pasa ofer pa banda di e kaldeonan!"

¹⁴Ma Jeremias a bisa: "No ta berdat! Ami no ta pasa ofer pa banda di e kaldeonan"; ma Irias no kier a skucha Jeremias. I el a aresta Jeremias i a tres'e serka e ofisialnan.

¹⁵E ora ei e ofisialnan a rabia ku Jeremias i a batie pon'e den prizon den e kas di Jonatan, e eskriba, kual nan a hasi prizon.

¹⁶Asina nan a sera Jeremias den e sel sigura den bodega, i Jeremias a keda hopi dia ayanan.

¹⁷E ora ei rei Sedekias a laga sak'e; i den su palasio rei a puntr'e na sekreto: "Tin un palabra for di SENOR?" I Jeremias a bisa: "Si, tin!" E ora ei el a bisa: "Abo lo wordu entrega den man di rei di Babilonia!"

¹⁸Ademas, Jeremias a puntra rei Sedekias: "Di ki manera mi a peka kontra bo, of kontra bo sirbidonan, of kontra e pueblo aki, ku boso a serami den prizon?

¹⁹Unda boso profetanan ta awor ku a profetisa na boso, bisando: 'Rei di Babilonia lo no bin kontra boso ni kontra e tera aki'?

²⁰Ma awor, O senor mi rei, sea asina bon di skucha; lagami trese mi petishon bo dilanti i no mandami bek na e kas di Jonatan, e eskriba, pa mi no muri ayanan."

²¹E ora ei rei Sedekias a duna ordu, i nan a sera Jeremias den e plenchi di e guardianan i tur dia nan tabata dun'e pan for di e kaya di panaderonan, te ora tur pan den stat a kaba. Asina Jeremias a keda den e plenchi di e guardianan.