Read Papantla Totonac Jeremias 38 Bible Online

Jeremias 38 - Papantla Totonac bible

Jeremias 38

¹Awor Sefatias, yu homber di Matan, i Gedalias, yu homber di Pasur, Jukal, yu homber di Selemias, i Pasur, yu homber di Malkias, a tende e palabranan ku Jeremias tabata papia ku henter e pueblo, bisando:

²"Asina SENOR ta bisa: 'Esun ku keda den e stat aki lo muri pa medio di spada, pa medio di hamber i pa medio di pest; ma esun ku pasa ofer pa e kaldeonan lo biba i lo skapa su mes bida komo botin, i keda na bida.'

³Asina SENOR ta bisa: 'E stat aki sigur lo wordu entrega den man di e ehersito di rei di Babilonia, i e lo kaptur'e.'"

⁴E ora ei e ofisialnan a bisa rei: "Laga mata e homber, pasobra e ta deskurasha e hombernan di guera ku a keda den e stat aki, i henter e pueblo, dor di papia sorto di palabranan asina ku nan; pasobra e homber aki no ta buska bienestar di e pueblo aki, sino su destrukshon."

⁵Asina rei Sedekias a bisa: "Mira, e ta den boso man; pasobra rei no por hasi nada kontra boso."

⁶E ora ei nan a kohe Jeremias i nan a tir'e den e rembak di Malkias, yu homber di rei, kual tabata keda den plenchi di e guardianan; i nan a baha Jeremias na kabuya. I no tabatin awa den e rembak, solamente lodo, i Jeremias a senk den e lodo.

⁷Ma Ebed-melek e etiope, un eunuko ku tabata den palasio di rei, a tende ku nan a baha Jeremias den e rembak. I rei tabata sinta na Porta Benjamin.

⁸I Ebed-melek a sali for di palasio di rei i a papia ku rei, bisando:

⁹"Senor mi rei, e hendenan aki a aktua ku malisia den tur loke nan a hasi ku profeta Jeremias. Nan a tir'e den rembak; i e lo muri di hamber eiden, pasobra no tin mas pan den stat."

¹⁰E ora ei rei a duna ordu na Ebed-melek e etiope, bisando: "Bai ku trinta homber bou di bo mando, i saka profeta Jeremias for di e rembak prome ku e muri."

¹¹Asina Ebed-melek a hiba e hombernan bou di su mando i a bai den palasio di rei na un luga bou di e deposito. I for di einan el a kohe bisti bieu i pana kibra, i na kabuya nan a baha eseinan den e rembak pa Jeremias.

¹²E ora ei Ebed-melek e etiope a bisa Jeremias: "Awor pone e bistinan bieu i pana kibra aki bou di bo brasanan, bou di e kabuyanan." I Jeremias a hasi asina.

¹³Asina nan a hala Jeremias ariba na e kabuyanan i a sak'e for di e rembak, i Jeremias a keda den plenchi di e guardianan.

¹⁴E ora ei rei Sedekias a laga trese profeta Jeremias serka dje na e di tres entrada di e kas di SENOR; i rei a bisa Jeremias: "Mi ta bai puntrabo algu; no skonde nada pa mi."

¹⁵E ora ei Jeremias a bisa Sedekias: "Si mi bisabo, no t'asina ku lo bo matami sigur? Ademas, si mi dunabo konseho, bo no ta skuchami tog."

¹⁶Ma rei Sedekias a hura Jeremias na sekreto, bisando: "Manera SENOR ta biba, Kende a duna nos e bida aki, sea sigur ku lo mi no matabo, ni entregabo den man di e hombernan aki ku ta buskabo pa mata."

¹⁷E ora ei Jeremias a kontesta Sedekias: "Asina SENOR, e Dios di ehersitonan, e Dios di Israel, ta bisa: 'Si di berdat bo bai entrega bo mes na e ofisialnan di rei di Babilonia, e ora ei lo bo biba, e stat aki lo no wordu kima ku kandela i abo i bo kas lo sobrebibi.

¹⁸Ma si bo no entrega bo mes na e ofisialnan di rei di Babilonia, e ora ei e stat aki lo wordu entrega den man di e kaldeonan; i nan lo kim'e ku kandela, i abo mes lo no skapa for di nan man.'"

¹⁹Anto rei Sedekias a bisa Jeremias: "Mi tin miedu di e hudiunan ku a pasa ofer pa e kaldeonan, pa nan no entregami den nan man i nan maltratami."

²⁰Ma Jeremias a kontesta: "Nan lo no entregabo. Pa fabor, obedese SENOR den loke mi ta bisabo, pa bai bo bon i bo keda na bida.

²¹Ma si bo sigui nenga di entrega bo mes, esaki ta e palabra ku SENOR a mustrami:

²²'Mira, tur e muhenan ku a ked'atras den palasio di rei di Juda lo wordu tresi pa e ofisialnan di rei di Babilonia; i e muhenan ei lo bisa: "Bo amigunan intimo a ganabo i a prevalese kontra bo; mientras ku bo pianan tabata hundi den lodo, nan a bira bai lagabo."

²³'Nan lo saka tambe tur bo esposanan i bo yunan pa e kaldeonan, i abo mes lo no skapa for di nan man, ma man di rei di Babilonia lo garabo, i e stat aki lo wordu kima ku kandela.'"

²⁴Anto Sedekias a bisa Jeremias: "No laga ningun hende sa nada di e palabranan aki, i lo bo no muri.

²⁵Ma si e ofisialnan tende ku mi a papia ku bo, i nan bin serka bo i bisabo: 'Bisa nos awor kiko bo a bisa rei, i kiko rei a bisabo; no skonde esei pa nos, i nos lo no matabo,'

²⁶e ora ei bo tin ku bisa nan: 'Mi tabata presenta mi petishon dilanti di rei, pa no mandami bek na e kas di Jonatan pa muri ayanan.'"

²⁷I tur e ofisialnan a bin serka Jeremias i a hasie pregunta. I el a duna kuenta na nan segun tur e palabranan aki ku rei a ordena; i nan no a bis'e nada mas, ya ku ningun hende no a skucha e kombersashon.

²⁸Asina Jeremias a keda den plenchi di e guardianan te dia ku Jerusalem a wordu kaptura.