Read Papantla Totonac Jeremias 39 Bible Online

Jeremias 39 - Papantla Totonac bible

Jeremias 39

¹Awor a sosode ku tempu ku Jerusalem a wordu kaptura den e di nuebe ana di Sedekias, rei di Juda, den e di dies luna, Nabukodonosor, rei di Babilonia, i henter su ehersito a bin Jerusalem i a rondon'e;

²den e di diesun ana di Sedekias, den e di kuater luna, riba e di nuebe dia di luna, nan a kibra muraya di e stat traha un buraku.

³E ora ei tur e ofisialnan di rei di Babilonia a drenta i a sinta na Porta Meimei: Nergal-sarezer, Samgar-nebo, Sarsekim e Rabsaris, Nergal-sarezer e Rabmag, i tur e otro ofisialnan di rei di Babilonia.

⁴I a sosode ku ora Sedekias, rei di Juda, i tur e hombernan di guera a mira nan, nan a hui den anochi sali for di e stat, dor di pasa den e hofi di rei via e porta meimei di e dos murayanan; i el a sali bai den direkshon di Araba.

⁵Ma e ehersito di e kaldeonan a persigui nan i a alkansa Sedekias den e sabananan di Jeriko; i nan a gar'e hiba pa Nabukodonosor, rei di Babilonia, na Ribla den e tera di Hamat, i Nabukodonosor a sentensi'e.

⁶E ora ei rei di Babilonia a mata e yu hombernan di Sedekias dilanti di su bista na Ribla; tambe rei di Babilonia a mata tur e nobelnan di Juda.

⁷I el a saka Sedekias su wowonan i a mar'e ku bui di brons pa hib'e Babilonia.

⁸Tambe e kaldeonan a kima e palasio di rei ku kandela i e kasnan di e pueblo, i nan a basha e murayanan di Jerusalem abou.

⁹I pa loke ta e pueblo ku a keda den e stat, esnan ku a pasa ofer pa su banda, i e restu di e pueblo ku a keda, Nabuzaradan, e kapitan di guardia, a hiba nan Babilonia den eksilio.

¹⁰Ma algun di e hendenan di mas pober, ku no tabatin nada, Nabuzaradan, e kapitan di guardia, a laga ked'atras na tera di Juda, i den e dianan ei el a duna nan plantashonnan di wendruif i kunukunan.

¹¹Awor Nabukodonosor, rei di Babilonia, a duna Nabuzaradan, e kapitan di guardia, ordu tokante di Jeremias, bisando:

¹²"Tum'e bou di bo kuido i no hasie ningun dano, ma mas bien hasi tur loke e bisabo."

¹³Asina Nabuzaradan, e kapitan di guardia, huntu ku Nabusazban e Rabsaris, Nergal-sarezer e Rabmag, i tur e ofisialnan prinsipal di rei di Babilonia,

¹⁴a duna ordu pa saka Jeremias for di e plenchi di e guardianan i a lagu'e na enkargo di Gedalias, yu homber di Ahikam, yu homber di Safan, pa hib'e su kas. Asina el a keda meimei di e pueblo.

¹⁵Awor e palabra di SENOR a yega na Jeremias, mientras ku e tabata prezo den e plenchi di e guardianan, bisando:

¹⁶"Bai papia ku Ebed-melek e etiope, i bisa: 'Asina e SENOR di ehersitonan, e Dios di Israel, ta bisa: "Mira, Mi ta kla pa kumpli ku Mi palabranan riba e stat aki, pa desaster i no pa prosperidat; i esaki lo sosode den bo presensia riba e dia ei.

¹⁷Ma lo Mi librabo riba e dia ei," SENOR ta deklara, "i lo bo no wordu entrega den man di e hombernan di kendenan bo tin miedu.

¹⁸Pasobra lo Mi reskatabo sigur, i lo bo no muri pa medio di spada, ma lo bo tin bo mes bida komo botin, pasobra bo a konfia den Mi," SENOR ta deklara.'"