Read Papantla Totonac Jeremias 4 Bible Online

Jeremias 4 - Papantla Totonac bible

Jeremias 4

¹"Si bo kier bolbe, O Israel," SENOR ta deklara, "bolbe serka Mi. I si bo kier kita bo kosnan repugnante for di Mi presensia, i no dwal mas,

²i si bo kier hura: 'Manera SENOR ta biba,' den berdat, den huisio i hustisia, e ora ei e nashonnan lo bendishona nan mes den djé, i den djé nan lo gloria."

³Pasobra asina SENOR ta bisa e hombernan di Juda i di Jerusalem: "Plug bo tera ku no a wordu kultiva nunka, i no sembra kaminda tin sumpina.

⁴Sirkumsida boso mes pa SENOR i kita e prepusio di boso kurason, hendenan di Juda i habitantenan di Jerusalem, pa Mi furia no sali manera kandela i kima sin ku tin hende pa pagu'e, pa motibu di e maldat di boso echonan."

⁵Deklara na Juda i proklama na Jerusalem, i bisa: "Supla trompet den e tera; grita duru i bisa: 'Boso reuni, i laga nos bai den e statnan fortifika.'

⁶Lanta un emblema den direkshon di Sion! Buska refugio, no para ketu, pasobra Mi ta bai trese maldat for di nort, i gran destrukshon.

⁷"Un leon a sali for di su mondi-sera, i un destruido di nashonnan a sali; el a sali for di su luga pa hasi bo tera desola. Bo statnan lo keda ruina, sin habitante.

⁸Pesei, bisti pana-di-saku, lamenta i grita yora, pasobra e rabia ardiente di SENOR no a kita for di nos."

⁹"I lo sosode den e dia ei," SENOR ta deklara, "ku kurason di rei i kurason di e prensnan lo faya. E saserdotenan lo keda babuka i e profetanan lo keda asombra."

¹⁰Anto mi a bisa: "Ai, Senor DIOS! Siguramente Bo a gana e pueblo aki i Jerusalem bon gana, bisando: 'Boso lo tin pas', mientras ku tin spada poni na nos garganta."

¹¹Na e tempu ei lo wordu bisa na e pueblo aki i na Jerusalem: "Un bientu kayente for di e halturanan pelon ta supla den desierto, den direkshon di e yu muhe di Mi pueblo--no pa bienta, ni pa limpia,

¹²un bientu muchu fuerte pa esaki lo bin, ora Mi orden'e. Awor lo Mi dikta sentensia tambe kontra nan.

¹³"Mira, e ta avansa manera nubia, i su garoshinan manera warwaru; su kabainan ta mas lihe ku aguila. Ai di nos, pasobra nos a keda ruina!"

¹⁴O Jerusalem, laba bo kurason kita maldat, pa bo wordu salba. Kuantu tempu mas bo mal pensamentunan lo keda biba den bo?

¹⁵Pasobra un bos ta anunsia for di Dan, i ta proklama maldat for di Seru Efrain.

¹⁶"Partisipa na e nashonnan awor! Proklama na Jerusalem: 'Enemigunan ta bin for di un tera leu, i ta halsa nan bos kontra e statnan di Juda.

¹⁷Manera hende ku ta kuida kunuku, nan ta rondon'e di tur banda, pasobra el a rebeldia kontra Mi,' SENOR ta deklara.

¹⁸Bo kondukta i bo echonan a trese e kosnan aki riba bo. Esaki ta bo maldat. Esta marga e ta! Mira kon el a penetra bo kurason!"

¹⁹Mi alma! Mi alma! Mi ta den angustia! Ai mi kurason! Mi kurason ta bati duru den mi; mi no por keda ketu, pasobra abo, O mi alma, a tende e zonidu di trompet, e alarma di guera.

²⁰Desaster riba desaster ta wordu proklama, pasobra henter e tera a keda destrosa; direpiente mi tentnan a wordu destrui, i mi kortinanan den un frega di wowo.

²¹Kuantu tempu mas mi mester mira e emblema i tende e zonidu di trompet?

²²"Pasobra Mi pueblo ta bobo. Nan no konoseMi. Nan ta yunan masha tapa mes, i nan no tin komprendementu. Nan ta masha astuto den hasimentu di maldat, ma di hasi bon si nan no sa."

²³Mi a wak riba tera, i ata, e tabata sin forma i bashi, i na e shelunan, i no tabatin lus.

²⁴Mi a wak e serunan, i ata, nan tabata tembla, i tur e seritunan tabata move bai bin.

²⁵Mi a wak, i ata, no tabatin ningun hende, i tur e parhanan di shelu a hui bai.

²⁶Mi a wak, i ata, e tera fruktifero a bira un desierto, i tur su statnan a wordu basha abou dilanti di SENOR, dilanti di Su rabia ardiente.

²⁷Pasobra asina SENOR ta bisa: "Henter e tera lo bira un desolashon; tog lo Mi no ehekuta un destrukshon kompleto.

²⁸Pa motibu di esaki e tera lo lamenta, i e shelunan ariba lo bira skur, pasobra Mi a papia, Mi a propone i lo Mi no repenti, ni lo Mi no hal'atras."

²⁹Na zonidu di e koredo di kabai i e tirado di flecha tur stat ta hui bai; nan ta bai den e partinan mas sera di mondi i ta subi pasa meimei di e barankanan; tur stat ta keda bandona, i no tin ningun hende ta biba den nan.

³⁰I abo, O esun desola, kiko bo kier hasi? Maske bo bisti na skarlata, maske bo dorna bo mes ku prenda di oro, maske bo pinta wowo, ta pornada bo ta hasi bo mes bunita. Bo amantenan ta odiabo; nan ta buskabo pa mata.

³¹Pasobra Mi a tende un gritu manera di un muhe ku dolo di parto, angustia manera di un muhe ku ta duna lus na su prome yu, gritu di e yu muhe di Sion ku ta ansha pa hana rosea, i ta rek su man, bisando: "Ai di mi, pasobra mi ta desmaya dilanti di matadonan."