Read Papantla Totonac Jeremias 40 Bible Online

Jeremias 40 - Papantla Totonac bible

Jeremias 40

¹E palabra di SENOR ku a yega na Jeremias, despues ku Nabuzaradan, e kapitan di guardia, a lagu'e bai for di Rama, tempu ku esaki a hib'e mara na kadena entre tur e eksiliadonan di Jerusalem i Juda, kendenan a wordu manda den eksilio na Babilonia.

²Awor e kapitan di guardia a manda buska Jeremias, i a bis'e: "SENOR bo Dios a priminti e kalamidat aki kontra e luga aki;

³i SENOR a laga esaki sosode, i a hasi manera El a priminti. Pasobra boso a peka kontra SENOR i no a skucha na Su bos, pesei esaki a pasa ku boso.

⁴Ma mira, mi ta bai librabo awe for di e kadenanan ku ta na bo mannan. Si bo ta prefera di bai Babilonia ku mi, ban numa, i lo mi perkura pa bo; ma si bo ta prefera di no bai Babilonia ku mi, keda numa. Mira, henter e tera ta bo dilanti; bai kaminda ku bo ta hana ta bon i hustu pa bo bai."

⁵Komo ku Jeremias no a bai bek ainda, Nabuzaradan a bisa: "Bolbe anto serka Gedalias, yu homber di Ahikam, yu homber di Safan, kende rei di Babilonia a nombra riba e statnan di Juda, i keda serka dje meimei di e pueblo; sino, bai kaminda ku bo ta hana ta bon pa bo bai." Asina e kapitan di guardia a dun'e provishon i un regalo i a lagu'e bai.

⁶E ora ei Jeremias a bai Mizpa, serka Gedalias, yu homber di Ahikam, i a keda serka dje meimei di e pueblo ku a keda na e tera.

⁷Awor tur e komandantenan di e ehersitonan ku tabata den e kampo di bataya, nan i e hombernan ku tabata huntu ku nan, a tende ku rei di Babilonia a nombra Gedalias, yu homber di Ahikam, komo gobernante di e tera, i ku e tabatin na su enkargo e hombernan, muhenan i muchanan, esnan di mas pober di e tera ku no a wordu manda den eksilio na Babilonia.

⁸I nan a bin serka Gedalias na Mizpa, huntu ku Ismael, yu homber di Netanias, Johanan i Jonatan, yu hombernan di Karea, i Seraias, yu homber di Tanhumet, i e yu hombernan di Efai e netofatita, i Jezanias, yu homber di e makateo, tantu nan komo nan hombernan.

⁹E ora ei Gedalias, yu homber di Ahikam, yu homber di Safan, a hura na nan i na nan hombernan, bisando: "No tene miedu di sirbi e kaldeonan; keda biba den e tera i sirbi rei di Babilonia, pa por bai bon ku boso.

¹⁰Awor pa loke t'ami, mira, mi ta bai keda na Mizpa, pa ta boso representante meimei di e kaldeonan ku ta bin serka nos; ma boso, boso bai rekohe bina, fruta di zomer i zeta, i warda nan den boso tinashinan, i keda biba den boso statnan ku boso a tuma ofer."

¹¹Ora tur e hudiunan ku tabata na Moab i meimei di e yu hombernan di Amon i na Edom, i ku tabata na tur e otro teranan, a tende ku rei di Babilonia a laga un restante na Juda i ku el a nombra Gedalias, yu homber di Ahikam, yu homber di Safan, riba nan,

¹²tur e hudiunan a bolbe for di tur e luganan pa unda nan a wordu plama i a bin tera di Juda, serka Gedalias na Mizpa, i a rekohe bina i fruta di zomer na gran abundansia.

¹³Awor Johanan, yu homber di Karea, i tur e komandantenan di e ehersitonan ku tabata den kunuku a bin serka Gedalias na Mizpa,

¹⁴i nan a bis'e: "Bo no sa ku Baalis, rei di e yu hombernan di Amon, a manda Ismael, yu homber di Netanias, pa matabo?" Ma Gedalias, yu homber di Ahikam, no a kere nan.

¹⁵E ora ei Johanan, yu homber di Karea, a papia na sekreto ku Gedalias na Mizpa, bisando: "Lagami bai mata Ismael, yu homber di Netanias, sin ku ningun hende hana sa. Pakiko e mester matabo, asina ku tur e hudiunan ku a bin huntu serka bo ta wordu plama, i e restante di Juda perese?"

¹⁶Ma Gedalias, yu homber di Ahikam, a bisa Johanan, yu homber di Karea: "No hasi e kos aki, pasobra loke bo ta bisa di Ismael ta mentira."