Read Papantla Totonac Jeremias 41 Bible Online

Jeremias 41 - Papantla Totonac bible

Jeremias 41

¹Awor a sosode den e di shete luna ku Ismael, yu homber di Netanias, yu homber di Elisama, di e famia real i di e ofisialnan prinsipal di rei, huntu ku dies homber, a bin Mizpa serka Gedalias, yu homber di Ahikam. Mientras ku nan tabata kome pan huntu aya na Mizpa,

²Ismael, yu homber di Netanias, i e dies hombernan ku tabata huntu kune, a lanta para i a mata Gedalias, yu homber di Ahikam, yu homber di Safan, ku spada. Asina nan a mata esun ku rei di Babilonia a nombra riba e tera.

³Tambe Ismael a mata tur e hudiunan ku tabata huntu kune, esta, huntu ku Gedalias na Mizpa, i e kaldeonan ku tabata ayanan, esta, e hombernan di guera.

⁴Awor a sosode ku riba e siguiente dia, despues ku Gedalias a wordu mata, sin ku ningun hende tabata sa di esaki ainda,

⁵ochenta homber a bin for di Sikem, for di Silo i for di Samaria, ku nan barba feita limpi-limpi, nan pana kibra i nan kurpa tur na korta di kuchu, ku ofrendanan di mainshi i sensia den nan man, pa hiba na e kas di SENOR.

⁶E ora ei Ismael, yu homber di Netanias, a sali for di Mizpa pa kontra ku nan, i segun ku e tabata bai e tabata yora; i a sosode ku ora el a kontra ku nan, el a bisa nan: "Bin serka Gedalias, yu homber di Ahikam!"

⁷Ma a sosode ku asina ku nan a drenta den e stat Ismael, yu homber di Netanias, i e hombernan ku tabata huntu kune, a mata nan i a tira nan den rembak.

⁸Ma entre nan tabatin dies homber ku a bisa Ismael: "No mata nos, pasobra nos tin provishon di trigo, puspas, zeta i miel skondi den kunuku." Asina ta ku e no a mishi ku nan i no a mata nan huntu ku nan kompaneronan.

⁹Awor e rembak kaminda Ismael a tira tur e kadavernan di e hombernan, ku el a mata pa motibu di Gedalias, tabata esun ku rei Asa a traha komo parti di su defensa kontra Baasa, rei di Israel. Ismael, yu homber di Netanias, a yen'e ku e mortonan.

¹⁰Anto Ismael a hiba komo katibu henter e restante di e pueblo ku tabata na Mizpa: e yu muhenan di rei i henter e pueblo ku a keda na Mizpa, ku Nabuzaradan, e kapitan di guardia, a pone na enkargo di Gedalias, yu homber di Ahikam; asina Ismael, yu homber di Netanias, a kohe nan komo katibu i a sali pa krusa bai serka e yu hombernan di Amon.

¹¹Ma Johanan, yu homber di Karea, i tur e komandantenan di e ehersitonan ku tabata huntu kune a tende di tur e maldat ku Ismael, yu homber di Netanias, a hasi.

¹²Asina nan a bai ku tur e hombernan pa bringa kontra Ismael, yu homber di Netanias; i nan a han'e banda di e tanki grandi ku ta keda na Gabaon.

¹³I a sosode ku asina ku henter e pueblo ku tabata huntu ku Ismael a mira Johanan, yu homber di Karea, i e komandantenan di e ehersitonan ku tabata huntu kune, nan a bira kontentu.

¹⁴I henter e pueblo ku Ismael a hiba komo katibu for di Mizpa a bira bek i a bai serka Johanan, yu homber di Karea.

¹⁵Ma Ismael, yu homber di Netanias, a skapa for di Johanan, huntu ku ocho homber, i a bai serka e yu hombernan di Amon.

¹⁶E ora ei Johanan, yu homber di Karea, i tur e komandantenan di e ehersitonan ku tabata huntu kune, a saka for di Mizpa henter e restante di e pueblo ku el a rekobra for di Ismael, yu homber di Netanias, despues ku Ismael a mata Gedalias, yu homber di Ahikam, esta, e hombernan ku tabata solda, e muhenan, e muchanan i e eunukonan ku el a trese bek for di Gabaon.

¹⁷I nan a bai i a keda na Gerut-kimam, ku ta keda pega ku Betlehem, pa sigui nan kaminda pa Egipto,

¹⁸pa motibu di e kaldeonan; pasobra nan tabatin miedu di nan, despues ku Ismael, yu homber di Netanias, a mata Gedalias, yu homber di Ahikam, kende rei di Babilonia a nombra riba e tera.