Read Papantla Totonac Jeremias 42 Bible Online

Jeremias 42 - Papantla Totonac bible

Jeremias 42

¹E ora ei tur e komandantenan di e ehersitonan, i Johanan, yu homber di Karea, Jezanias, yu homber di Osaias, i henter e pueblo, tantu chikitu komo grandi, a aserka

²profeta Jeremias i a pidie: "Pa fabor, laga nos petishon bin bo dilanti, i hasi orashon pa nos na SENOR bo Dios, pa henter e restante aki. Pasobra nos tabata asina hopi, ma awor ta djis un par di nos so a keda, manera bo mes wowo ta mira nos.

³Pidi SENOR bo Dios pa E bisa nos e kaminda ku nos mester sigui i loke nos mester hasi."

⁴E ora ei profeta Jeremias a bisa nan: "Mi a tende boso. Mira, mi ta bai hasi orashon na SENOR boso Dios di akuerdo ku boso palabranan; i lo sosode ku tur loke SENOR kontesta boso, lo mi konta boso. Lo mi no skonde ningun palabra pa boso."

⁵I nan a bisa Jeremias: "Laga SENOR ta un testigu berdadero i fiel kontra nos, si nos no hasi di akuerdo ku tur loke SENOR bo Dios mandabo pa konta nos.

⁶Sea ku ta agradabel of desagradabel, nos lo obedese e bos di SENOR nos Dios, serka Kende nos ta mandabo, pa bai nos bon ora nos obedese e bos di SENOR nos Dios."

⁷Awor a sosode ku despues di dies dia e palabra di SENOR a yega na Jeremias.

⁸E ora ei el a manda yama Johanan, yu homber di Karea, i tur e komandantenan di e ehersitonan ku tabata huntu kune, i henter e pueblo, tantu chikitu komo grandi,

⁹i a bisa nan: "Asina SENOR, e Dios di Israel, serka Kende boso a mandami pa presenta boso petishon Su dilanti, ta bisa:

¹⁰'Si di berdat boso keda den e tera aki, lo Mi edifika boso i no destrui boso, i lo Mi planta boso i no ranka boso ku rais ku tur; pasobra lo Mi repenti di e kalamidat ku Mi a afligi boso kune.

¹¹No tene miedu di rei di Babilonia, di kende boso tin miedu awor; no tene miedu di dje,' SENOR ta deklara, 'pasobra Mi ta ku boso, pa salba boso i pa libra boso for di su man.

¹²I lo Mi mustra boso kompashon, asina ku e lo tin kompashon ku boso i laga boso bolbe na boso mes tera.

¹³'Ma si boso bisa: "Nos no kier keda den e tera aki," pa asina no obedese e bos di SENOR boso Dios,

¹⁴bisando: "No, ma nos kier bai biba na tera di Egipto kaminda nos no ta mira guera, ni tende zonidu di trompet, ni pasa hamber, i ayanan nos kier keda",

¹⁵anto den tal kaso, skucha e palabra di SENOR, O restante di Juda. Asina e SENOR di ehersitonan, e Dios di Israel, ta bisa: "Si di berdat ta kier mes boso kier drenta Egipto pa bai keda biba ayanan,

¹⁶anto lo sosode ku e spada ku boso ta teme lo alkansa boso ayanan na tera di Egipto; i e hamber ku boso tin tantu miedu di dje lo sigui net boso tras ayanan na Egipto, i ayanan boso lo muri.

¹⁷Pesei tur e hombernan ku ta determina pa bai Egipto pa keda biba ayanan lo muri pa medio di spada, hamber i pest; i ningun di nan lo sobrebibi ni skapa di e kalamidat ku Mi ta bai manda riba nan.

¹⁸Pasobra, asina e SENOR di ehersitonan, e Dios di Israel, ta bisa: "Manera Mi rabia i furia a wordu drama riba e habitantenan di Jerusalem, asina Mi furia lo wordu drama riba boso ora boso drenta Egipto. I boso lo bira un maldishon, un opheto di horor, un kondenashon i un reproche; i boso lo no mira e luga aki mas."

¹⁹SENOR a papia ku boso, O restante di Juda: "No bai Egipto!" Boso mester komprende bon kla ku awe mi a testigua kontra boso.

²⁰Pasobra ta boso mes boso a gana, ora boso a mandami serka SENOR boso Dios, bisando: "Hasi orashon pa nos na SENOR nos Dios; i tur loke SENOR nos Dios bisa, bisa nos esei i nos lo hasie."

²¹I awe mi a bisa boso, ma ainda boso no a obedese SENOR boso Dios den tur loke El a mandami bisa boso.

²²Pesei boso mester komprende bon kla awor ku boso lo muri pa medio di spada, hamber i pest den e luga ku boso ta desea di bai biba.