Read Papantla Totonac Jeremias 43 Bible Online

Jeremias 43 - Papantla Totonac bible

Jeremias 43

¹Ma a sosode ku asina ku Jeremias, kende SENOR nan Dios a manda, a kaba di bisa henter e pueblo tur e palabranan di SENOR nan Dios, esta, tur e palabranan aki,

²Azarias, yu homber di Osaias, Johanan, yu homber di Karea, i tur e hombernan arogante, a bisa Jeremias: "Bo ta papia mentira! SENOR nos Dios no a mandabo bisa: 'Boso no mester bai Egipto pa keda biba ayanan';

³ma Baruk, yu homber di Nerias, ta instigabo kontra nos pa entrega nos den man di e kaldeonan, pa nan mata nos of hiba nos den eksilio na Babilonia."

⁴Asina Johanan, yu homber di Karea, i tur e komandantenan di e ehersitonan i henter e pueblo no a obedese e bos di SENOR, pa keda na tera di Juda.

⁵Alkontrario Johanan, yu homber di Karea, i tur e komandantenan di e ehersitonan, a hiba henter e restante di Juda ku a bolbe for di tur e nashonnan pa unda nan a wordu plama pa nan bin biba na tera di Juda--

⁶e hombernan, e muhenan, e muchanan, e yu muhenan di rei i tur hende ku Nabuzaradan, e kapitan di guardia, a laga serka Gedalias, yu homber di Ahikam, i nietu di Safan, i tambe profeta Jeremias i Baruk, yu homber di Nerias.

⁷Asina nan a drenta tera di Egipto, pasobra nan no a obedese e bos di SENOR, i a yega te na Tafnes.

⁸Anto e palabra di SENOR a yega na Jeremias na Tafnes, bisando:

⁹"Kohe algun piedra grandi den bo man i skonde nan den e klei di e flur, na entrada di e palasio di Farao na Tafnes, den bista di algun di e hudiunan,

¹⁰i bisa nan: 'Asina e SENOR di ehersitonan, e Dios di Israel, ta bisa: "Mira, Mi ta bai manda buska Mi sirbido Nabukodonosor, rei di Babilonia, i Mi ta bai pone su trono net riba e piedranan aki, ku Mi a skonde; i e lo habri su tent real riba nan.

¹¹I e lo bin i ataka tera di Egipto; esnan destina pa morto, na morto, esnan destina pa koutiverio, na koutiverio, i esnan destina pa spada, na spada.

¹²I lo Mi pega e tempelnan di e diosnan di Egipto na kandela, i e lo kima nan i hiba nan komo katibu. Manera un wardado di karne ta lora su pana ront di su kurpa, asina e lo lora tera di Egipto ront di dje, i e lo sali for di einan trankil di dje.

¹³Tambe e lo garna e pilarnan sagrado di Bet-semes, ku ta keda na tera di Egipto; i e tempelnan di e diosnan di Egipto e lo kima ku kandela.