Read Papantla Totonac Jeremias 44 Bible Online

Jeremias 44 - Papantla Totonac bible

Jeremias 44

¹E palabra ku a yega na Jeremias pa tur e hudiunan ku tabata biba na tera di Egipto, esnan ku tabata biba na Migdol, Tafnes, Menfis i na tera di Patros, bisando:

²"Asina e SENOR di ehersitonan, e Dios di Israel, ta bisa: 'Boso mes a mira tur e kalamidat ku Mi a trese riba Jerusalem i riba tur e statnan di Juda; i ata, awe nan ta un monton di ruina, i ningun hende no ta biba den nan,

³pa motibu di nan maldat ku nan a komete pa probokaMi na rabia dor di sigui kima sakrifisionan i sirbi otro diosnan ku nan no tabata konose, ni nan, ni boso, ni boso tatanan.

⁴Sinembargo, Mi a manda tur Mi sirbidonan, e profetanan, serka boso. Mi a lanta tur dia tempran i a manda nan, bisando: "No hasi e kos abominabel aki ku Mi ta odia."

⁵Ma nan no a skucha, ni a inklina nan orea pa bira for di nan maldat, pa no kima sakrifisionan na otro diosnan mas.

⁶Pesei Mi furia i Mi rabia a wordu drama i a kima den e statnan di Juda i den e kayanan di Jerusalem, asina ku nan a bira un monton di ruina i un desolashon, manera ta te dia djawe.

⁷'Pesei awor, asina SENOR, e Dios di ehersitonan, e Dios di Israel, ta bisa: "Pakiko boso ta hasi dano grandi na boso mes dor di kaba ku homber, muhe, mucha i yu na pechu den Juda, lagando boso mes sin restante,

⁸dor di probokaMi na rabia ku e obranan di boso mannan, dor di kima sakrifisionan na otro diosnan na tera di Egipto, kaminda boso ta bai pa keda biba, pa boso wordu destrui i bira un maldishon i un reproche entre tur e nashonnan di mundu?

⁹Boso a lubida e maldat di boso tatanan, e maldat di e reinan di Juda, e maldat di nan esposanan, boso mes maldat, i e maldat di boso esposanan ku nan a komete na tera di Juda i den e kayanan di Jerusalem?

¹⁰Nan no a umiya nan mes te dia djawe, ni nan no tabatin temor, ni a kana segun Mi lei of Mi statutonan ku Mi a pone dilanti di boso i dilanti di boso tatanan."'

¹¹"Pesei, asina e SENOR di ehersitonan, e Dios di Israel, ta bisa: 'Mira, Mi ta bai bira Mi kara kontra boso pa kalamidat, si, pa destrui henter Juda.

¹²I lo Mi kita e restante di Juda ku ta determina pa bai tera di Egipto pa keda biba ayanan, i nan tur lo perese na tera di Egipto; nan lo kai pa medio di spada i nan lo perese di hamber. Tantu chikitu komo grandi lo muri pa medio di spada i hamber, i nan lo bira un maldishon, un opheto di horor, un kondenashon i un reproche.

¹³I lo Mi kastiga esnan ku ta biba na tera di Egipto, meskos ku Mi a kastiga Jerusalem, pa medio di spada, hamber i pest.

¹⁴Asina lo no tin ni refugiado ni sobrebibiente pa e restante di Juda ku a drenta tera di Egipto pa keda biba ayanan i pa despues bolbe na tera di Juda, na unda nan ta anhela pa bin biba bek; pasobra ningun hende lo no bolbe, sino solamente algun refugiado.'"

¹⁵E ora ei tur e hombernan ku tabata sa masha bon ku nan esposanan tabata kima sakrifisionan na otro diosnan, huntu ku tur e muhenan ku tabata presente, un asamblea grandi ku tabata inklui henter e pueblo ku tabata biba na Patros na tera di Egipto, a kontesta Jeremias, bisando:

¹⁶"Pa loke ta e mensahe ku bo a duna nos den e nomber di SENOR, nos no ta bai skucha na bo!

¹⁷Ma alkontrario, nos lo kumpli sigur ku kada palabra ku a sali for di nos boka: nos lo kima sakrifisionan na e reina di shelu i basha ofrenda di bibida p'e, meskos ku nos mes, nos antepasadonan, nos reinan i nos prensnan a hasi den e statnan di Juda i den e kayanan di Jerusalem; pasobra e tempu ei nos tabatin kuminda na abundansia i kos tabata bai bon, i nada malu no a pasa ku nos.

¹⁸Ma desde ku nos a stop di kima sakrifisionan na e reina di shelu i di basha ofrenda di bibida p'e, nos tin falta di tur kos i nos a perese pa medio di spada i hamber."

¹⁹I e muhenan a anadi: "Tempu ku nos tabata kima sakrifisionan pa e reina di shelu i tabata basha ofrenda di bibida p'e, boso ta kere ku ta sin konsentimentu di nos esposonan nos tabata traha bolo di sakrifisio segun su imagen p'e, i basha ofrenda di bibida p'e?"

²⁰E ora ei Jeremias a papia ku tur e hendenan--e hombernan i e muhenan, henter e pueblo ku a kontest'e--bisando:

²¹"E sakrifisionan ku boso a kima den e statnan di Juda i den e kayanan di Jerusalem, boso i boso antepasadonan, boso reinan i boso prensnan, i e pueblo di e tera, SENOR no a rekorda nan, i tur esaki no a bin den Su pensamentu?

²²I SENOR no por a soporta esaki mas, pa motibu di e maldat di boso echonan, pa motibu di e abominashonnan ku boso a komete; pesei boso tera a bira un ruina, un opheto di horor i un maldishon, sin habitante, manera ta te dia djawe.

²³Komo ku boso a kima sakrifisionan i a peka kontra SENOR i no a obedese e bos di SENOR, ni a kana segun Su lei, Su statutonan of Su testimonionan, pesei e kalamidat aki a bin riba boso, manera ta te dia djawe."

²⁴E ora ei Jeremias a bisa henter e pueblo, i tur e muhenan: "Skucha e palabra di SENOR, henter Juda ku ta na tera di Egipto;

²⁵asina e SENOR di ehersitonan, e Dios di Israel, ta bisa: 'Pa loke ta boso i boso esposanan, boso a papia ku boso boka i ku boso mannan boso a kumpli, bisando: "Nos lo kumpli sigur ku nos promesanan ku nos a priminti, di kima sakrifisionan na e reina di shelu i di basha ofrendanan di bibida p'e." 'Sigui numa i konfirma boso promesanan i perkura di kumpli ku boso promesanan!'

²⁶Sinembargo, skucha e palabra di SENOR, henter Juda ku ta biba na tera di Egipto: 'Mira, Mi a hura pa Mi gran nomber,' SENOR ta bisa, 'nunka mas boka di ningun hende di Juda den henter tera di Egipto lo invoka Mi nomber, bisando: "Manera Senor DIOS ta biba."

²⁷Mira, Mi ta vigila nan pa destrukshon i no pa bon; i tur e hombernan di Juda ku ta na tera di Egipto lo perese pa medio di spada i hamber, te ora ku nan kaba kompletamente.

²⁸I esnan ku skapa for di spada i bolbe for di tera di Egipto na tera di Juda lo ta masha poko. Anto henter e restante di Juda, ku a bai tera di Egipto pa keda biba ayanan, lo sa ken su palabra lo permanese, di Mi of di nan.

²⁹'I esaki lo ta e senal pa boso,' SENOR ta deklara, 'ku Mi ta bai kastiga boso den e luga aki, pa boso sa ku Mi palabranan sigur lo permanese kontra boso, pa destrukshon.'

³⁰Asina SENOR ta bisa: 'Mira, Mi ta bai entrega Farao Hofra, rei di Egipto, den man di su enemigunan, den man di esnan ku ta busk'e pa mata, meskos ku Mi a duna Sedekias, rei di Juda, den man di Nabukodonosor, rei di Babilonia, kende tabata su enemigu i tabata busk'e pa mata.'"