Read Papantla Totonac Jeremias 46 Bible Online

Jeremias 46 - Papantla Totonac bible

Jeremias 46

¹Loke a yega na profeta Jeremias komo e palabra di SENOR, tokante di e nashonnan.

²Pa Egipto, tokante di e ehersito di Farao Nekao, rei di Egipto, kual tabata banda di Riu Eufrates na Karkemis, i kual Nabukodonosor, rei di Babilonia, a derota den e di kuater ana di Joakim, yu homber di Josias, rei di Juda:

³"Prepara e eskudo, esun grandi i esun chikitu, i marcha bai bataya!

⁴Bisti e kabainan harnas, i laga e koredonan subi. Tuma bo posishon ku helm bisti! Hasi e lansanan lombra, bisti e bisti di guera.

⁵Pakiko mi a mira esaki? Nan ta morto spanta, nan ta hal'atras, i nan hombernan poderoso ta vensi i a hui bai, sin wak atras; tin teror na tur banda," SENOR ta deklara.

⁶No laga e homber ku ta kore lihe, hui, ni e homber poderoso, skapa; na nort, banda di Riu Eufrates, nan a trompeka i a kai.

⁷Ken esaki ta ku ta lanta manera Riu Neil, manera e riunan ku ta brota awa?

⁸Egipto ta lanta manera Riu Neil, manera e riunan ku ta brota awa; i El a bisa: "Lo Mi lanta i kubri e tera ei; siguramente lo Mi destrui e stat i su habitantenan."

⁹Sali bai, boso, kabainan, i kore manera loko, boso, garoshinan, pa e hombernan poderoso por marcha padilanti: Etiope i Put, ku ta maneha eskudo, i esnan di Lidia ku ta maneha i ta span bog.

¹⁰Pasobra e dia ei ta pertenese na e Senor DIOS di ehersitonan, un dia di vengansa, pa venga Su mes riba Su enemigunan; i e spada lo devora i keda sasia i lo bebe nan sanger te bira burachi; pasobra lo tin un matansa pa e Senor DIOS di ehersitonan den e tera di nort, banda di Riu Eufrates.

¹¹Subi bai Galaad i buska balsem, O yu muhe birgen di Egipto! En bano bo a uza hopi remedi; no tin kura pa bo.

¹²E nashonnan a tende di bo berguensa, i e tera ta yen di bo gritu di aflikshon; pasobra esun guerero a trompeka riba e otro, i nan tur dos a kai abou pareu.

¹³Esaki ta e mensahe ku SENOR a duna profeta Jeremias tokante di e binida di Nabukodonosor, rei di Babilonia, pa ataka tera di Egipto:

¹⁴"Anunsia den Egipto i proklama den Migdol, proklama tambe den Menfis i Tafnes; bisa: 'Tuma bo posishon i para kla, pasobra spada a devora esnan ront di bo.'

¹⁵Pakiko bo hombernan poderoso a kai abou na suela? Nan no por a keda para, pasobra SENOR a stot nan bent'abou.

¹⁶Bes tras bes nan a trompeka; i nan a kai un riba otro. Despues nan a bisa: 'Lanta riba! Laga nos bolbe na nos mes pueblo i na nos tera natal, leu for di spada di e opresor.'

¹⁷Aya nan a grita: 'Farao, rei di Egipto, ta djis un hasido di buya; el a laga e tempu stipula pasa!'

¹⁸"Manera mi ta biba," Rei ta deklara, Kende Su nomber ta e SENOR di ehersitonan: "Un lo bin sigur, kende lo ta manera Tabor meimei di e serunan, of manera Karmelo kantu di laman.

¹⁹Prepara bo bonder pa bai den eksilio, O yu muhe ku ta biba na Egipto, pasobra Menfis lo bira un desolashon; i asta e lo wordu kima i lo keda sin habitante.

²⁰"Egipto ta un bishe muhe bunita, ma destrukshon ta bin, e ta bin for di nort.

²¹Su soldanan kontrata ku ta huntu kune ta manera bishe gorda, pasobra nan tambe a bira bek i a hui bai huntu; nan no a keda para firme, pasobra e dia di nan kalamidat a bin riba nan, e tempu di nan kastigu.

²²Su zonidu ta manera zonidu di kolebra, pasobra nan ta avansa manera un ehersito i ta bin riba dje manera kapdonan di palu ku hacha.

²³Nan a kap su mondi-sera," SENOR ta deklara; "siguramente e lo no wordu hana mas, maske ku awor nan ta mas hopi ku tirakochi i no por wordu konta.

²⁴E yu muhe di Egipto a wordu brongosa, a wordu entrega den man di e pueblo di nort."

²⁵E SENOR di ehersitonan, e Dios di Israel, ta bisa: "Mira, Mi ta bai kastiga Amon di Tebas, i Farao i Egipto, huntu ku su diosnan i su reinan, tantu Farao komo esnan ku ta konfia den dje.

²⁶I lo Mi entrega nan den man di esnan ku ta buska nan pa mata, esta, den man di Nabukodonosor, rei di Babilonia, i den man di su ofisialnan. Ma despues e lo wordu habita manera den e dianan di prome aya," SENOR ta deklara.

²⁷"Ma pa loke t'abo, O Mi sirbido Jakob, no tene miedu, ni desmaya, O Israel! Pasobra mira, Mi ta bai salbabo for di leu aya, i bo desendientenan for di e tera di nan koutiverio, i Jakob lo bolbe i lo no wordu molestia mas, i e lo biba trankil di dje, sin ningun hende pa hasie tembla.

²⁸O Mi sirbido Jakob, no tene miedu," SENOR ta deklara, "pasobra Ami ta ku bo, pasobra lo Mi pone un fin kompleto na tur e nashonnan pa unda Mi a kore ku bo mandabo bai; sinembargo, na abo lo Mi no pone un fin kompleto; ma lo Mi koregibo manera mester ta, i di ningun manera lo Mi keda sin kastigabo."