Read Papantla Totonac Jeremias 49 Bible Online

Jeremias 49 - Papantla Totonac bible

Jeremias 49

¹Tokante di e yu hombernan di Amon. Asina SENOR ta bisa: "Israel no tin yu homber? Of e no tin eredero? Pakiko anto Milkom a podera di Gad, i su pueblo a stablese su mes den su statnan?

²Pesei, ata, e dianan ta bin," SENOR ta deklara, "ku lo Mi laga e zonidu di trompet di guera wordu tend! kontra Raba di e yu hombernan di Amon; i esei lo bira un monton di ruina, i su statnan lo wordu pega na kandela. E ora ei Israel lo podera di esnan ku a podera di dje," SENOR ta bisa.

³"Lamenta, O Hesbon, pasobra Ai a wordu destrui! Sklama, O yu muhenan di Raba, faha boso mes ku pana-di-saku, i lamenta, i kore bai-bin paden di e murayanan; pasobra Milkom lo bai den eksilio huntu ku su saserdotenan i su prensnan.

⁴Pakiko bo ta broma ku bo vayenan, bo vayenan asina fruktifero? O yu muhe infiel, bo ta konfia den bo tesoronan, bisando: 'Ken lo bin kontra mi?'

⁵Mira, Mi ta bai trese teror riba bo, for di tur ront di bo," E Senor DIOS di ehersitonan ta deklara; "I boso tur lo wordu plama, sin ningun hende pa reuni e fugitivonan.

⁶"Ma despues lo Mi trese esnan di Amon, ku ta den koutiverio, bek," SENOR ta deklara.

⁷Tokante di Edom. Asina e SENOR di ehersitonan ta bisa: "No tin sabiduria mas na Teman? Bon konseho a disparse for di e prudentenan? Nan sabiduria a bira korumpi?

⁸Hui, bira bai bek, keda biba den e profundidatnan, O habitantenan di Dedan! Pasobra lo Mi trese e desaster di Esau riba dje, ora ku Mi kastigu'e.

⁹Si esnan ku ta piki wendruif bin serka bo, nan lo no a laga algu atras? Si ladron bin den anochi, nan lo no a destrui te ora nan a hana sufisiente?

¹⁰Ma Ami a kita Esau sunu, Mi a revela su luganan di skonde, asina ku e lo no por skonde su mes; su yunan a wordu destrui huntu ku su rumannan i su bisinanan, i e no t'ei mas.

¹¹Laga bo werfanonan ked'atras, Ami lo tene nan na bida; i laga bo biudanan konfia den Mi."

¹²Pasobra asina SENOR ta bisa: "Mira, esnan ku no a wordu sentensia pa bebe di e kopa lo beb'e sigur; i abo ta esun ku lo keda kompletamente sin kastigu? Lo bo no keda sin kastigu, ma lo bo bebe di dje sigur.

¹³Pasobra Mi a hura pa Mi mes," SENOR ta deklara, "ku Bosra lo bira un opheto di horor, un reproche, un monton di ruina i un maldishon; i tur su statnan lo bira un ruina perpetuo."

¹⁴Mi a tende un mensahe for di SENOR, i un mensahero a wordu manda entre e nashonnan, bisando: "Reuni boso i bin kontra dje, i lanta riba pa bataya!"

¹⁵"Pasobra mira, Mi a hasibo chikitu meimei di e nashonnan, despresia entre hende.

¹⁶E teror pa bo, i e arogansia di bo kurason a ganabo, O abo ku ta biba den e holnan di baranka, ku ta okupa e haltura di e seritu. Maske bo traha bo neishi mes haltu ku esun di aguila, lo Mi bahabo for di einan," SENOR ta deklara.

¹⁷"I Edom lo bira un opheto di horor; tur hende ku pasa banda di dje lo keda tur babuka i lo hasi bofon di tur su heridanan.

¹⁸Meskos ku Sodoma i Gomora i nan bisinanan a wordu derota," SENOR ta bisa, "ningun hende lo no biba ayanan, ni ningun yu di hende lo no keda den dje.

¹⁹"Mira, un lo sali manera un leon for di e partinan mas sera di e mondi di Jordan kontra un luga di yerba berde ku semper tin awa; pasobra den un instante lo Mi pon'e kore bai for di dje, i ken ku wordu skohi lo Mi nombra riba dje. Pasobra ken ta manera Ami, i ken lo hibaMi dilanti di hues? I ken anto ta e wardado ku lo por para kontra Mi?"

²⁰Pesei, skucha e plan di SENOR ku El a plania kontra Edom, i Su propositonan ku El a propone kontra e habitantenan di Teman: siguramente nan lo lastra nan bai ku nan, asta e chikitunan di e tou; siguramente E lo hasi nan luganan di yerba berde desola pa nan motibu.

²¹Tera a sakudi na zonidu di nan kaida. Tin un sklamashon! E zonidu di dje a wordu tend! te na Laman Kora.

²²Mira, E lo subi i bula lihe manera aguila i habri Su halanan riba Bosra, i den e dia ei kurason di e hombernan poderoso di Edom lo ta manera kurason di muhe na ora di parto.

²³Tokante di Damasko. "Hamat i Arfad ta keda brongosa, pasobra nan a tende mal notisia; nan ta desmaya. Tin ansha riba laman, esei no por wordu kalma.

²⁴Damasko a keda deskurasha; el a bira bai pa hui, i paniko a gar'e. Aflikshon i dolo a podera di dje manera un muhe na ora di parto.

²⁵Pakiko e stat di alabansa no a wordu bandona, e stat di Mi goso?

²⁶Pesei, su hobennan lo kai den su kayanan, i tur e hombernan di guera lo wordu silensia den e dia ei," e SENOR di ehersitonan ta deklara.

²⁷"I lo Mi pega e muraya di Damasko na kandela, i esaki lo devora e toren fortifika di Ben-adad."

²⁸Tokante di Kedar i e reinonan di Hazor ku Nabukodonosor, rei di Babilonia, a derota. Asina SENOR ta bisa: "Lanta i subi bai Kedar, i kaba ku e hombernan di oriente.

²⁹Nan lo kohe nan tentnan i nan tounan di bestia chikitu bai kune; nan lo kohe pa nan mes nan kortinanan di tent, tur nan biennan i nan kamelnan; i nan lo grita bisa otro: 'Teror na tur banda!'

³⁰"Kore bai! Hui! Biba den e profundidatnan, O habitantenan di Hazor," SENOR ta deklara; "Pasobra Nabukodonosor, rei di Babilonia, a traha un plan kontra boso, i a forma un komplot kontra boso.

³¹"Lanta, bai kontra un nashon ku ta trankil di dje, ku ta biba konfiadamente," SENOR ta deklara. "E no tin porta ni bara; nan ta biba riba nan mes.

³²I nan kamelnan lo bira plunder, i e kantidat grandi di nan bakanan lo ta pa botin, i lo Mi plama den tur direkshon di bientu esnan ku ta pela e kabei na banda di nan kabes, i lo Mi trese destrukshon pa nan for di tur banda," SENOR ta deklara.

³³"I Hazor lo bira un luga pa chakal biba aden, un desolashon pa semper; ningun hende lo no biba ayanan, ni ningun yu di hende lo no keda biba den dje."

³⁴Loke a yega komo e palabra di SENOR na profeta Jeremias tokante di Elam, na kuminsamentu di e reinado di Sedekias, rei di Juda, bisando:

³⁵"Asina e SENOR di ehersitonan ta bisa: 'Mira, Mi ta bai kibra e bog di Elam, e arma prinsipal di nan poder.

³⁶I lo Mi trese riba Elam e kuater bientunan for di e kuater skinanan di shelu, i lo Mi plama nan pa e kuater bientunan aki, i lo no tin ningun nashon pa unda esnan rechasa di Elam lo no bai.

³⁷Asina lo Mi destrosa Elam dilanti di nan enemigunan i dilanti di esnan ku ta buska nan pa mata; i lo Mi trese kalamidat riba nan, Mi rabia ardiente,' SENOR ta deklara, 'i lo Mi persigui nan ku spada, te ora ku Mi kaba ku nan.

³⁸E ora ei lo Mi pone Mi trono na Elam, i for di einan lo Mi destrui rei i prensnan,' SENOR ta deklara.

³⁹'Ma lo sosode den e ultimo dianan ku lo Mi trese esnan di Elam, ku ta den koutiverio, bek,'" SENOR ta deklara.