Read Papantla Totonac Jeremias 5 Bible Online

Jeremias 5 - Papantla Totonac bible

Jeremias 5

¹"Kana pariba-pabou den e kayanan di Jerusalem; opserva awor i tuma nota. I buska riba su plenchinan si bo por hana un hende, si tin sikiera un ku ta hasi hustisia, ku ta buska berdat; e ora ei lo Mi pordon'e.

²I maske nan bisa: 'Manera SENOR ta biba,' siguramente ta huramentu falsu nan ta hasi."

³O SENOR, Bo wowo no ta buska berdat? Bo a suta nan, ma nan no a sinti; Bo a kaba ku nan, ma nan a nenga korekshon. Nan a hasi nan kara mas duru ku piedra; nan no kier repenti.

⁴E ora ei mi a bisa: "Esakinan ta e pobernan, nan ta bobo; pasobra nan no konose e kaminda di SENOR, ni e ordenansa di nan Dios.

⁵Lo mi bai serka e poderosonan i papia ku nan, pasobra eseinan konose e kaminda di SENOR, i e ordenansa di nan Dios." Ma nan tambe, di akuerdo ku otro, a kibra e yugo i a rementa e kadenanan.

⁶Pesei un leon for di mondi-sera lo mata nan, un lobo di desierto lo destrui nan, un leopardo ta drumi lur nan statnan. Tur ku riska sali for di nan lo wordu habraka na pida-pida, pasobra nan transgreshonnan ta hopi; nan apostasia ta oumenta.

⁷"Pakiko Mi mester pordonabo? Bo yunan a bandonaMi i a hura na esnan ku no ta dios. Ora Mi a duna nan kuminda i nan barika tabata yen, nan a komete adulterio, i nan a basha bai kas di prostituta.

⁸Kabainan barika yen i apashona nan tabata. Kada un tabata relincha tras di esposa di su prohimo.

⁹Mi no tin ku kastiga e pueblo aki?" SENOR ta puntra, "i riba un nashon manera esaki Mi no tin ku venga Mi mes?"

¹⁰"Bai pasa dor di su kunuku di wendruif i destrui, ma no hasi un destrukshon kompleto. Ranka su ramanan kit'afo, pasobra eseinan no ta di SENOR.

¹¹Pasobra e kas di Israel i e kas di Juda a traishonaMi," SENOR ta deklara.

¹²Nan a gana riba SENOR, bisando: "E no! Nada malu lo bin riba nos, i nos lo no mira ni spada ni hamber.

¹³E profetanan ta manera bientu, i e palabra no ta den nan. E kosnan ei lo sosode ku nan mes!"

¹⁴Pesei, asina e SENOR Dios di ehersitonan ta bisa: "Pasobra boso a papia e palabra aki, mira, Mi ta hasi Mi palabranan bira kandela den bo boka, i e pueblo aki, palu; anto e lo kaba ku nan.

¹⁵Mira, Mi ta bai trese un nashon for di leu kontra boso, O kas di Israel," SENOR ta deklara. "E ta un nashon poderoso, un nashon antiguo, un nashon ku bo no konose su idioma, ni bo no por komprende loke nan ta papia.

¹⁶Nan muchila-pa-karga-flecha ta manera un graf habri; nan tur ta hombernan poderoso.

¹⁷Nan lo kaba ku bo kosecha i ku bo kuminda; nan lo kaba ku bo yu hombernan i ku bo yu muhenan; nan lo kaba ku bo tounan di bestia chikitu i ku bo krianan di baka; nan lo kaba ku bo matanan di wendruif i ku bo palunan di figo. Ku spada nan lo destrui bo statnan fortifka ku bo ta konfia aden.

¹⁸"Ma asta den e dianan ei," SENOR ta deklara, "lo Mi no destrui boso kompletamente.

¹⁹I lo sosode ku ora nan puntra: 'Pakiko SENOR nos Dios a hasi tur e kosnan aki ku nos?' e ora ei lo bo kontesta nan: 'Meskos ku boso a bandonaMi i a sirbi diosnan stranhero den boso tera, asina boso lo sirbi stranheronan den un tera ku no ta di boso.'

²⁰"Anunsia esaki den e kas di Jakob, i proklam'e na Juda, bisando:

²¹'Tende esaki, O pueblo bobo i tapa, ku tin wowo, ma no ta mira, ku tin orea, ma no ta tende.

²²Boso no tin temor pa Mi?' SENOR ta puntra. 'Boso no ta tembla den Mi presensia? Pasobra Mi a pone santu komo un frontera pa laman, un dekreto eterno, pa e no pasa ofer di dje. Maske e olanan lora bai laira, nan no por prevalese; maske nan ronka, nan no por pasa ofer di dje.

²³Ma e pueblo aki tin kurason opstina i rebelde; nan a desvia i a kohe nan kaminda bai.

²⁴Tampoko nan no ta bisa den nan kurason: "Awor laga nos teme SENOR nos Dios, Kende ta manda awaseru na su tempu, tantu e awaseru di herfst komo esun di primavera, Kende ta warda pa nos e simannan stipula pa kosecha."

²⁵Boso inikidatnan a kambia tur e kosnan aki, i boso pikanan a stroba boso di hana loke ta bon.

²⁶'Pasobra tin hombernan malbado den Mi pueblo; nan ta lur skondi manera yagdo di parha; nan ta pone trampa; nan ta kohe hende.

²⁷Manera un kouchi yen di parha, asina nan kasnan ta yen di engano; pesei nan a bira poderoso i riku.

²⁸Nan ta gordo, nan ta lombra; tambe nan ta sobresali den echonan di maldat; nan no ta pleita e kaso, e kaso di e werfano, pa nan prospera; i nan no ta defende e derecho di e pobernan.

²⁹Mi no mester kastiga e pueblo aki?' SENOR ta puntra. 'Riba un nashon manera esaki Mi no tin ku venga Mi mes?'

³⁰"Un kos spantoso i horibel a sosode den e tera:

³¹e profetanan ta profetisa ku engano, i e saserdotenan ta goberna manera nan ta hana ta bon, i Mi pueblo ta gusta asina! Ma kiko boso lo hasi na fin di esaki?