Read Papantla Totonac Jeremias 50 Bible Online

Jeremias 50 - Papantla Totonac bible

Jeremias 50

¹E palabra ku SENOR a papia tokante di Babilonia, tera di e kaldeonan, pa medio di profeta Jeremias:

²"Deklara i proklama entre e nashonnan, proklama esaki i lanta un emblema; no skond'e, ma bisa: 'Babilonia a wordu kaptura, Bel a wordu brongosa, Merodak a wordu destrosa; su imagennan a keda brongosa, su idolonan a wordu kibra na pida-pida.'

³Pasobra un nashon a lanta kontra dje for di nort. E lo hasi su tera un opheto di horor, i lo no tin habitante den dje. Tantu hende komo bestia a hui bai, bai nan a bai!

⁴"Den e dianan ei i na e tempu ei," SENOR ta deklara, "e yunan di Israel lo bin, tantu nan komo e yunan di Juda; nan lo ta na yoramentu segun nan ta kana bai, i ta SENOR nan Dios nan lo buska.

⁵Nan lo puntra pa e kaminda pa Sion, i lo bira nan kara den su direkshon; nan lo bin pa uni nan mes ku SENOR den un aliansa eterno ku lo no wordu lubida.

⁶"Mi pueblo a bira karnenan perdi; nan wardadonan a hasi nan desvia, nan a hasi nan kana dwal riba e serunan; nan a bai di seru pa seritu i a lubida nan luga di sosega.

⁷Tur ku a hana nan, a devora nan; i nan atversarionan a bisa: 'Nos no ta kulpabel, pasobra nan a peka kontra SENOR, Kende ta e habitashon di hustisia, kontra SENOR, e speransa di nan tatanan.'

⁸"Hui bai for di meimei di Babilonia, i sali for di e tera di e kaldeonan; sea tambe manera kabritu chubatu na kabes di e tou.

⁹Pasobra mira, Mi ta bai lanta i trese kontra Babilonia un ehersito di nashonnan grandi for di tera di nort, i nan lo pone nan mes den ordu di bataya kontra dje; for di ayanan e lo wordu kohl prezo. Nan flechanan lo ta manera un guerero eksperto ku no ta bolbe man bashi.

¹⁰I Kaldea lo bira plunder; i tur esnan ku plunder e lo tin sufisiente," SENOR ta deklara.

¹¹"Pasobra boso ta kontentu, pasobra boso tin goso, O boso ku ta horta Mi erensia, pasobra boso ta bula ront manera bishe muhe den yerba berde, i ta relincha manera kabai,

¹²boso mama lo pasa masha berguensa; esun ku a duna lus na boso lo wordu umiya. Mira, e lo ta esun di mas menos di e nashonnan, un mondi desola, un tera seku i un desierto.

¹³Pa motibu di e indignashon di SENOR e lo no wordu habita, ma e lo ta kompletamente desola; ken ku pasa banda di Babilonia lo keda tur babuka i lo hasi bofon di tur su heridanan.

¹⁴"Pone boso mes den ordu di bataya kontra Babilonia na tur banda, boso tur ku ta span bog; tira riba dje, no spar boso flechanan, pasobra el a peka kontra SENOR.

¹⁵Lansa boso gritu di bataya na tur banda kontra dje! El a entrega su mes, su pilarnan a kai, su murayanan a wordu basha abou. Pasobra esaki ta e vengansa di SENOR: tuma vengansa riba dje; manera el a hasi ku otronan, hasi meskos kune.

¹⁶Korta kita e sembrado for di Babilonia, i esun ku ta zwai ku machete den tempu di kosecha; for di dilanti di spada di e opresor kada un lo bolbe serka su mes hendenan, i kada un lo hui bai na su mes tera.

¹⁷"Israel ta un tou di karne plama; e leonnan a plama nan. Esun di prome ku a devor'e tabata rei di Asiria, i e ultimo aki ku a kibra su wesunan ta Nabukodonosor, rei di Babilonia.

¹⁸"Pesei, asina e SENOR di ehersitonan, e Dios di Israel, ta bisa: 'Mira, Mi ta bai kastiga rei di Babilonia i su tera, meskos ku Mi a kastiga rei di Asiria.

¹⁹I lo Mi trese Israel bek na su luga di yerba berde, i e lo kome yerba riba Karmelo i Basan, i su alma lo wordu sasia den e serunan di Efrain i Galaad.

²⁰Den e dianan ei i na e tempu ei,' SENOR ta deklara, 'e inikidat di Israel lo wordu buska, ma lo no tin; i tambe e pikanan di Juda, ma nan lo no wordu hana; pasobra lo Mi pordona esnan ku Mi a laga keda komo un restante.'

²¹"Lanta kontra tera di Merataim, si, lanta kontra dje, i kontra e habitantenan di Pekod. Mata i destrui nan kompletamente," SENOR ta deklara, "i hasi konforme tur loke Mi a ordenabo.

²²Tin boroto di bataya den e tera, i gran destrukshon.

²³Mira kon e martiu di henter e tera a wordu korta i kibra! Mira kon Babilonia a bira un opheto di horor entre e nashonnan!

²⁴Mi a pone trampa pa bo, bo a wordu kohl tambe, O Babilonia; prome ku bo mes a ripara esei, bo a wordu hana i gara tambe, pasobra bo a drenta den konflikto ku SENOR."

²⁵SENOR a habri Su deposito di arma i a saka e armanan di Su indignashon; pasobra esaki ta obra di e Senor DIOS di ehersitonan den e tera di e kaldeonan.

²⁶Bin serka dje for di e fronteranan di mas leu; habri su mangasinanan, hasie un monton di ruina i destruie kompletamente; no laga nada sobra di dje.

²⁷Mata tur su bishenan machu ku spada; laga nan baha bai na matansa! Ai di nan, pasobra nan dia a yega, e tempu di nan kastigu.

²⁸Tin un zonidu di fugitivonan i refugiadonan for di tera di Babilonia, pa deklara den Sion e vengansa di SENOR nos Dios, vengansa pa Su tempel.

²⁹"Yama hopi tirado di flecha bin kontra Babilonia, tur esnan ku ta span bog; lanta kampamentu kontra dje na tur banda; no laga ni un skapa. Pagu'e segun su obra; di akuerdo ku tur loke el a hasi, hasi meskos kune; pasobra el a bira arogante pa ku SENOR, pa ku Esun Santu di Israel.

³⁰Pesei su hobennan lo kai den su kayanan, i tur su hombernan di guera lo keda silensia e dia ei," SENOR ta deklara.

³¹"Mira, Mi ta kontra bo, O nashon arogante," e Senor DIOS di ehersitonan ta deklara, "pasobra bo dia a yega, e tempu ku lo Mi kastigabo.

³²I esun arogante lo trompeka i kai sin ningun hende pa lant'e; i lo Mi pega su statnan na kandela, i esaki lo devora henter su besindario."

³³Asina e SENOR di ehersitonan ta bisa: "E yunan di Israel ta wordu oprimi, i e yunan di Juda tambe; i tur esnan ku a kohe nan komo katibu a tene nan; nan a nenga di laga nan bai.

³⁴Nan Redentor ta fuerte, e SENOR di ehersitonan ta Su nomber; E lo pleita nan kaso fuertemente, pa E trese sosiegu pa nan tera, ma kaos pa e habitantenan di Babilonia.

³⁵"Un spada kontra e kaldeonan," SENOR ta deklara, "i kontra e habitantenan di Babilonia, i kontra su ofisialnan i su sabionan!

³⁶Un spada kontra e adivinadonan, i nan lo bira kens! Un spada kontra su hombernan poderoso, i nan lo desmaya!

³⁷Un spada kontra nan kabainan i kontra nan garoshinan, i kontra tur e stranheronan ku ta meimei di dje, i nan lo bira manera muhe! Un spada kontra su tesoronan, i nan lo wordu sakea.

³⁸Un sekura riba su awanan, i nan lo seka! Pasobra e ta un tera di idolonan, i nan ta loko pa motibu di idolonan spantoso.

³⁹"Pesei bestia di desierto lo biba ayanan huntu ku chakal; abestrus tambe lo biba den dje, i nunka mas e lo wordu habita of lo tin hende pa biba den dje di generashon pa generashon.

⁴⁰Manera tempu ku Dios a destrui Sodoma i Gomora ku su bisinanan," SENOR ta deklara, "ningun hende lo biba ayanan, ni ningun yu di hende lo keda biba den dje.

⁴¹"Mira, un pueblo ta bin for di nort, i un gran nashon i hopi rei lo wordu lanta for di e finnan di tera.

⁴²Nan ta kohe nan bog i nan lansa; nan ta kruel i no tin miserikordia. Nan bos ta ronka manera laman i nan ta kore riba kabai, ekipa manera un homber ekipa pa bataya kontra bo, O yu muhe di Babilonia.

⁴³Rei di Babilonia a tende e relato tokante di nan, i su mannan ta kologa slap; spantu a gar'e, agonia, manera muhe na ora di parto.

⁴⁴Mira, un lo sali manera un leon for di e partinan mas sera di e mondi di Jordan bin na un luga di yerba berde ku semper tin awa; pasobra den un instante lo Mi pone nan kore bai for di dje, i ken ku wordu skohi lo Mi nombra riba dje. Pasobra ken ta manera Ami, i ken lo hibaMi dilanti di hues? I ken anto ta e wardado ku lo por para Mi dilanti?"

⁴⁵Pesei, skucha e plan di SENOR ku El a plania kontra Babilonia, i Su propositonan ku El a propone kontra e tera di e kaldeonan: siguramente nan lo lastra nan bai ku nan, asta e chikitunan di e tou; siguramente E lo hasi nan luganan di yerba berde desola pa nan motibu.

⁴⁶Na e gritu: "Babilonia a wordu kaptura!", tera ta wordu sakudi i un sklamashon ta wordu tendi meimei di e nashonnan.