Read Papantla Totonac Jeremias 51 Bible Online

Jeremias 51 - Papantla Totonac bible

Jeremias 51

¹Asina SENOR ta bisa: "Mira, Mi ta bai lanta e spiritu di un destruido kontra Babilonia i kontra e habitantenan di Leb-kamai.

²I lo Mi manda stranheronan na Babilonia pa nan bient'e, i pa nan destrui su tera; pasobra riba e dia di su kalamidat nan lo bai kontra dje for di tur banda.

³No laga esun ku ta span bog, span e, ni laga esun ku ta bisti bistl di guera, lanta; no spar su hobennan; entrega henter su ehersito na destrukshon.

⁴I esnan ku a wordu mata lo kai den e tera di e kaldeonan, i esnan ku a wordu traspasa, den nan kayanan."

⁵Pasobra ni Israel ni Juda no a wordu bandona dor di su Dios, e SENOR di ehersitonan, maske nan tera ta yen di kulpa dilanti di Esun Santu di Israel.

⁶Hui bai for di meimei di Babilonia, i kada un di boso salba su bida! No perese den su kastigu, pasobra esaki ta e tempu di vengansa di SENOR; E ta bai pagu'e loke e ta merese.

⁷Babilonia tabata un kopa di oro den e man di SENOR, ku a hasi henter e tera burachi. E nashonnan a bebe di su bina; pesei e nashonnan a perde sinti.

⁸Babilonia a kai direpiente i a wordu kibra; lamenta p'e! Trese balsem pa su dolo; kisas e por wordu kura.

⁹Nos a trata di kura Babilonia, ma e no a kura; bandon'e i laga kada un di nos bai na su mes pais, pasobra su huisio a yega te na shelu, i a subi te den e nubianan.

¹⁰SENOR a trese nos hustisia na kla; laga nos ban deklara den Sion e obra di SENOR nos Dios!

¹¹Hasi e flechanan skerpi, rekohe e eskudonan! SENOR a lanta e spiritu di e reinan di e medonan, pasobra Su proposito ta kontra Babilonia pa destruie; pasobra esaki ta e vengansa di SENOR, vengansa pa Su tempel.

¹²Lanta un emblema kontra e murayanan di Babilonia; pone un guardia fuerte, stashona e guardianan, pone hombernan skondi kla pa ataka. Pasobra SENOR a propone i a kumpli ku loke El a papia tokante di e habitantenan di Babilonia.

¹³O abo ku ta biba kantu di hopi awanan, abundante den tesoronan, bo fin a yega, e midi di bo fin.

¹⁴E SENOR di ehersitonan a hura pa Su mes: "Siguramente lo Mi yenabo ku hende manera tirakochi, i nan lo dal gritu di viktoria ofer di bo."

¹⁵Ta E ta Esun ku a traha tera pa medio di Su poder, Kende a stablese mundu pa medio di Su sabiduria, i pa medio di Su komprendementu El a span e shelunan.

¹⁶Ora ku E laga Su bos resona, tin un tumulto di awanan den e shelunan, i E ta hasi e nubianan subi for di fin di tera; E ta traha lamper pa awaseru, i ta laga bientu sali for di Su mangasinanan.

¹⁷Henter humanidat ta manera bestia, sin konosementu; tur plate ta keda na berguensa pa motibu di su idolonan; pasobra su imagennan basha ta enganoso, i no tin rosea den nan.

¹⁸Nan ta sin balor, un obra di bofon; den e tempu di nan kastigu nan lo perese.

¹⁹E porshon di Jakob no ta manera esakinan, pasobra E ta Esun ku a traha tur kos, i Israel ta e bara di Su erensia; E SENOR di ehersitonan ta Su nomber.

²⁰E ta bisa: "Bo ta Mi martiu di bataya, Mi arma di guera; i ku bo Mi ta destrosa nashonnan, i ku bo Mi ta destrui reinonan,

²¹i ku bo Mi ta destrosa kabai i su koredo, i ku bo Mi ta destrosa wagen i esun ku ta kore den dje,

²²i ku bo Mi ta destrosa homber i muhe, i ku bo Mi ta destrosa hende bieu i hende yon, i ku bo Mi ta destrosa hoben i birgen,

²³i ku bo Mi ta destrosa wardado i su tou, i ku bo Mi ta destrosa kunukero i su yugo di buey, i ku bo Mi ta destrosa gobernantenan i lidernan.

²⁴"Ma lo Mi paga Babilonia i tur e habitantenan di Kaldea loke nan merese, pa tur e maldat ku nan a hasi den Sion den boso bista," SENOR ta deklara.

²⁵"Mira, Mi ta kontra bo, O seru ku ta destrui, ku ta destrui henter tera," SENOR ta deklara, "i lo Mi saka Mi man kontra bo, i hasibo lora kai for di baranka, i lo Mi hasibo un seru tur kima.

²⁶I nan lo no tuma ni un piedra pa skina, ni piedra pa fundeshi for di bo, ma lo bo keda desola pa semper," SENOR ta deklara.

²⁷Lanta un emblema den e tera, supla trompet meimei di e nashonnan! Prepara e nashonnan kontra dje, yama kontra dje e reinonan di Ararat, Mini i Askenaz. Nombra un komandante kontra dje; trese e kabainan manera un nubia di tirakochi.

²⁸Prepara e nashonnan kontra dje, e reinan di e medonan, nan gobernantenan i tur nan lidernan, i tur tera bou di nan dominio.

²⁹Asina tera ta sakudi i ta trose, pasobra e propositonan di SENOR kontra Babilonia ta keda kumpli, pa hasi tera di Babilonia un desolashon, sin habitante.

³⁰E hombernan poderoso di Babilonia a stop di bringa, nan ta keda den e luganan fortifika; nan forsa a faya, nan a bira manera muhe; nan luga di biba a wordu pega na kandela, e baranan di su portanan ta kibra.

³¹Un koredo ta kore pa topa ku un otro, i un mensahero pa topa ku un otro, pa bisa rei di Babilonia ku su stat a wordu kaptura di punta pa punta;

³²e vadonan tambe a wordu kaptura, i nan a kima e muras ku kandela, i e hombernan di guera ta morto spanta.

³³Pasobra asina e SENOR di ehersitonan, e Dios di Israel, ta bisa: "E yu muhe di Babilonia ta manera un plenchi-di-bati-mainshi, ora ku nan trapa riba dje pa hasie duru. Tog den poko tempu, tempu di kosecha lo yega p'e."

³⁴"Nabukodonosor, rei di Babilonia, a devorami i a destrosami; el a ponemi un banda manera un tinashi bashi; el a tragami manera un monster, el a yena su stoma ku mi delikatesanan; el a skupimi afo.

³⁵Ku e violensia ku a wordu hasi na mi i na mi karni sea riba Babilonia," e habitante di Sion lo bisa; i, "ku mi sanger sea riba e habitantenan di Kaldea," Jerusalem lo bisa.

³⁶Pesei, asina SENOR ta bisa: "Mira, Mi ta bai pleita bo kaso i ehekuta vengansa kompleto pa bo; i lo Mi seka su laman i hasi su fuente seka.

³⁷I Babilonia lo bira un monton di ruina, un luga pa chakal biba aden, un opheto di horor i un bofon, sin habitante.

³⁸Nan lo grita huntu manera leon chikitu, nan lo gruna manera yu di leon.

³⁹Ora nan bira hopi eksita, lo Mi sirbi nan nan bankete i hasi nan burachi, pa nan bira kontentu i drumi pa semper, sin spierta mas," SENOR ta deklara.

⁴⁰"Lo Mi hiba nan manera lamchi pa mata, manera karne chubatu huntu ku kabritu chubatu.

⁴¹"Mira kon Babilonia a wordu kaptura, e atmirashon di henter mundu a wordu gara! Mira kon Babilonia a bira un opheto di horor meimei di e nashonnan!

⁴²Laman a inunda Babilonia; el a wordu tapa dor di su multitut di olanan.

⁴³Su statnan a bira un opheto di horor, un tera seku i un desierto, un tera kaminda ningun hende no ta biba, i dor di kual ningun yu di hende no ta pasa.

⁴⁴I lo Mi kastiga Bel den Babilonia, i lo Mi hasi loke ku el a traga sali for di su boka; i e nashonnan lo no basha bai mas serka dje; asta e muraya di Babilonia a bash'abou!

⁴⁵"Sali for di meimei di dje, Mi pueblo! I kada un di boso salba boso mes for di e rabia ardiente di SENOR.

⁴⁶Awor, pa boso kurason no desmaya, i pa boso no tene miedu di e notisia ku lo wordu tendi den e pais-- pasobra un ana e notisia lo bin, i despues di esei otro notisia den un otro ana, i lo tin violensia den e tera, ku gobernante kontra gobernante--

⁴⁷pesei, ata e dianan ta bin den kual Ami lo kastiga e ldolonan di Babilonia; i henter su tera lo keda na berguensa, i tur esnan ku a wordu mata lo kai meimei di dje.

⁴⁸E ora ei shelu i tera i tur loke tin den nan lo grita di alegria ofer di Babilonia, pasobra e destruidonan lo bin serka dje for di nort," SENOR ta deklara.

⁴⁹Di berdat Babilonia lo kai pa motibu di e mortonan di Israel, meskos ku e mortonan di henter tera tambe a kai pa motibu di Babilonia.

⁵⁰Boso ku a skapa di spada, boso bai! No keda! Korda riba SENOR for di leu aya, i laga Jerusalem bin den boso pensamentu.

⁵¹Nos tin berguensa, pasobra nos a tende reproche; berguensa a tapa nos kara, pasobra stranheronan a drenta e luganan santu di e kas di SENOR.

⁵²"Pesei, ata e dianan ta bin," SENOR ta deklara, "ku Ami lo kastiga su ldolonan, i esnan mortalmente herida lo keha den henter su tera.

⁵³Maske Babilonia subi te na e shelunan, i maske e fortifika su forti haltu, Ami lo manda destruidonan serka dje," SENOR ta deklara.

⁵⁴E zonidu di sklamashon for di Babilonia, i di gran destrukshon for di tera di e kaldeonan!

⁵⁵Pasobra SENOR ta bai destrui Babilonia, i E lo hasi tur desordu disparse for di dje. I nan olanan lo ronka manera hopi awanan; e tumulto di nan bosnan ta resona.

⁵⁶Pasobra e destruido ta bin kontra dje, kontra Babilonia, i su hombernan poderoso lo wordu kaptura; nan bognan ta kibra na pida-pida; pasobra SENOR ta un Dios di retribushon, E lo paga bek tur loke e merese.

⁵⁷"I lo Mi hasi su prensnan i su sabionan burachi, su gobernantenan, su lidernan, i su hombernan poderoso, pa nan drumi pa semper, sin spierta mas," e Rei, Kende Su nomber ta SENOR di ehersitonan, ta deklara.

⁵⁸Asina e SENOR di ehersitonan ta bisa: "E muraya hanchu di Babilonia lo wordu destrui kompletamente, i su portanan haltu lo wordu pega na kandela; asina e pueblonan lo traha en bano, i e nashonnan lo kansa nan kurpa solamente pa kandela."

⁵⁹E mensahe ku profeta Jeremias a manda pa Seraias, yu homber di Nerias, nietu di Maaseias, tempu ku el a bai Babilonia huntu ku Sedekias, rei di Juda, den e di kuater ana di su reinado. Awor Seraias tabata e kamarero prinsipal.

⁶⁰Asina Jeremias a skirbi den un solo rol henter e kalamidat ku lo bin riba Babilonia, esta, tur e palabranan aki ku a wordu skirbi tokante di Babilonia.

⁶¹E ora ei Jeremias a bisa Seraias: "Asina ku bo yega Babilonia, perkura pa bo lesa tur e palabranan aki na bos haltu,

⁶²i bisa: 'Abo, O SENOR, a priminti tokante di e luga aki pa kort'e kit'e afo, di tal manera ku nada lo no keda biba den dje, ni hende ni bestia; ma e lo keda un desolashon perpetuo.'

⁶³I lo sosode ku asina ku bo kaba di lesa e rol aki, bo mester mara un piedra na dje i tir'e meimei di Riu Eufrates,

⁶⁴i bisa: 'Meskos Babilonia lo senk bai abou i no subi bin ariba mas, pa motibu di e kalamidat ku Mi ta bai trese riba dje; i nan lo keda morto kansa.'" Aki e palabranan di Jeremias a termina.