Read Papantla Totonac Jeremias 52 Bible Online

Jeremias 52 - Papantla Totonac bible

Jeremias 52

¹Sedekias tabatin bint'i un ana dia ku el a bira rei, i el a reina diesun ana na Jerusalem; i su mama tabata yama Hamutal, yu muhe di Jeremias di Libna.

²I el a hasi loke ta malu den bista di SENOR, meskos ku Joakim a hasi.

³Pasobra pa motibu di rabia di SENOR esaki a sosode na Jerusalem i Juda, te ora ku El a saka nan for di Su presensia. I Sedekias a rebeldia kontra rei di Babilonia.

⁴Awor a sosode ku den e di nuebe ana di su reinado, riba e di dies dia di e di dies luna, Nabukodonosor, rei di Babilonia, a bin, e ku henter su ehersito, kontra Jerusalem, i a kampa kontra dje i a traha un baluarte tur ront di dje.

⁵Asina e stat a keda rondona te na e di diesun ana di rei Sedekias.

⁶Riba e di nuebe dia di e di kuater luna e hamber a bira asina severo den e stat ku no tabatin kuminda pa e hendenan di e tera.

⁷E ora ei nan a habri un buraku den muraya di e stat, i anochi tur e hombernan di guera a hui bai for di e stat via e porta meimei di e dos murayanan, kual tabata keda banda di e hofi di rei, ounke ku e kaldeonan tabata tur ront di e stat. I nan a kohe kaminda di Araba.

⁸Ma e ehersito di e kaldeonan a persigui rei i a alkansa Sedekias den e sabananan di Jeriko, i henter su ehersito a bandon'e.

⁹E ora ei nan a kaptura rei i a hib'e serka rei di Babilonia na Ribla den tera di Hamat; i el a dikta sentensia kontra dje.

¹⁰I rei di Babilonia a mata e yunan di Sedekias dilanti di su bista, i tambe el a mata tur e prensnan di Juda na Ribla.

¹¹Despues el a saka wowo di Sedekias; i rei di Babilonia a mar'e ku bui di brons i a hib'e Babilonia, i a ser'e den prizon te dia di su morto.

¹²Awor riba e di dies dia di e di sinku luna, ku tabata e di diesnuebe ana di rei Nabukodonosor, rei di Babilonia, Nabuzaradan, e kapitan di guardia, kende tabata sirbi rei di Babilonia, a bin Jerusalem.

¹³I el a kima e kas di SENOR, e kas di rei, i tur e kasnan na Jerusalem. Tur kas grandi el a kima ku kandela.

¹⁴Asina henter e ehersito di e kaldeonan ku tabata huntu ku e kapitan di guardia a basha tur e murayanan ront di Jerusalem abou.

¹⁵E ora ei Nabuzaradan, e kapitan di guardia, a hiba den eksilio algun di e hendenan di mas pober, e restu di e pueblo ku a keda den e stat, esnan ku a pasa ofer pa rei di Babilonia, i e restu di e hombernan di ofishi.

¹⁶Ma Nabuzaradan, e kapitan di guardia, a laga algun di esnan di mas pober di e tera pa kuida e kunukunan di wendruif i pa plug e tera.

¹⁷Awor e pilarnan di brons ku tabata pertenese na e kas di SENOR, i e basenan i e laman di brons ku tabata den e kas di SENOR, e kaldeonan a kibra na pida-pida i a karga tur e brons hiba Babilonia.

¹⁸Tambe nan a hiba e weanan, e skopnan, e kosnan-pa-paga-lampi, e komchinan, e kucharanan, i tur e artikulonan-di-uzo di brons ku nan tabata uza den e sirbishi di tempel.

¹⁹Tambe e kapitan di guardia a hiba e komchinan, e weanan-pa-kandela, e puncheronan, e weanan, e kandelanan, e kucharanan pa sensia i e komchinan pa e ofrendanan di bibida, tur loke tabata di oro fini i tur loke tabata di plata fini.

²⁰E dos pilarnan, e laman i e diesdos bishenan machu di brons ku tabata bou di e laman, i e basenan, kualnan rei Salomon a traha pa e kas di SENOR--no tabata posibel pa pisa tur e artikulonan di brons aki.

²¹Pa loke ta e pilarnan, kada pilar tabata diesocho kodo haltu, i un lina-di-midi di diesdos kodo por a pasa ront di dje, i e tabata kuater dede diki, i hol.

²²Awor riba dje tabatin un kapitel di brons; i kada kapitel tabata sinku kodo haltu, ku knopwerk i granatapel tur ront riba e kapitel, tur di brons. I e di dos pilar tabata meskos ku esakinan, tambe ku granatapel.

²³I tabatin nobent'i seis granatapel banda pafo; tur e granatapelnan tabata suma un total di shen riba e knopwerk tur ront.

²⁴E ora ei e kapitan di guardia a skohe sumosaserdote Seraias, i Sofonias, e di dos saserdote, huntu ku e tres ofisialnan di tempel.

²⁵Tambe el a skohe for di e stat un ofisial ku tabatin mando riba e hombernan di guera, shete di e konseheronan di rei ku a wordu hana den e stat, e eskriba di e komandante di e ehersito ku a mobilisa e pueblo di e tera, i sesenta homber di e pueblo di e tera ku a wordu hana den e stat.

²⁶I Nabuzaradan, e kapitan di guardia, a kohe nan hiba serka rei di Babilonia na Ribla.

²⁷Anto rei di Babilonia a dal nan mata na Ribla, na tera di Hamat. Asina Juda a wordu hiba for di su tera, den eksilio.

²⁸Esakinan ta e hendenan ku Nabukodonosor a hiba den eksilio: den e di shete ana, tres mil i bint'i tres hudiu;

²⁹den e di diesocho ana di Nabukodonosor ocho shent'i trint'i dos persona di Jerusalem;

³⁰den e di bint'i tres ana di Nabukodonosor, Nabuzaradan, e kapitan di guardia, a hiba den eksilio shete shent'i kuarent'i sinku hudiu; na tur kuater mil seis shen persona.

³¹Awor a sosode ku den e di trint'i shete ana di e eksilio di Joakin, rei di Juda, den e di diesdos luna, riba e di bint'i sinku dia di e luna, Evil-merodak, rei di Babilonia, den e prome ana di su reinado, a mustra bondat na Joakin, rei di Juda, i a sak'e for di prizon.

³²E ora ei el a papia karinosamente kune i a pone su trono mas haltu ku trono di e reinan ku tabata huntu kune na Babilonia.

³³Asina Joakin no a bisti pana di prizon mas, i tabata kome regularmente den presensia di rei tur e dianan di su bida.

³⁴I pa su manteneshon di bida, rei di Babilonia tabata dun'e un manteneshon regularmente, un porshon pa kada dia, tur e dianan di su bida, te dia di su morto.