Read Papantla Totonac Jeremias 7 Bible Online

Jeremias 7 - Papantla Totonac bible

Jeremias 7

¹E palabra di SENOR ku a yega na Jeremias, bisando:

²"Para na entrada di e kas di SENOR i proklama ayanan e palabra aki, i bisa: 'Tende e palabra di SENOR, boso tur di Juda ku ta pasa dor di e entradanan aki pa bin adora SENOR!'"

³Asina e SENOR di ehersitonan, e Dios di Israel, ta bisa: "Koregi boso kondukta i boso echonan, i lo Mi laga boso biba den e luga aki.

⁴No konfia den palabranan enganoso ku ta bisa: 'Esaki ta e tempel di SENOR, e tempel di SENOR, e tempel di SENOR.'

⁵Pasobra si di berdat boso koregi boso kondukta i boso echonan, si di berdat boso praktika hustisia un ku otro,

⁶si boso no oprimi e stranhero, e werfano of e biuda, i no drama sanger inosente den e luga aki, ni sigui tras di otro diosnan, pa no perhudika boso mes,

⁷e ora ei Ami lo laga boso biba den e luga aki, den e tera ku Mi a duna boso tatanan pa semper i semper.

⁸Mira, boso ta konfia den palabranan enganoso ku no ta di probecho.

⁹"Boso kier horta, mata, komete adulterio, hasi huramentu falsu i ofrese sakrifisionan na Baal, i sigui tras di otro diosnan ku boso no tabata konose,

¹⁰anto bin para Mi dilanti den e kas aki ku ta wordu yama na Mi nomber, i bisa: 'Nos a wordu libra!'--pa asina boso por hasi tur e abominashonnan aki?

¹¹E kas aki, ku ta wordu yama na Mi nomber, a bira un kueba di ladron den boso bista? Mira, Ami, Ami mes a mira esaki," SENOR ta bisa.

¹²"Ma bai awor na Mi luga ku tabata keda na Silo, kaminda na prinsipio Mi a stablese Mi nomber, i mira kiko Mi a hasi kune pa motibu di e maldat di Mi pueblo Israel.

¹³I awor, pasobra boso a hasi tur e kosnan aki," SENOR ta deklara, "i Mi a papia ku boso, a lanta tur dia tempran papia ku boso, ma boso no a tende, i Mi a yama boso, ma boso no a kontesta,

¹⁴pesei lo Mi hasi ku e kas ku ta wordu yama na Mi nomber, den kual boso ta konfia, i ku e luga ku Mi a duna boso i boso tatanan, manera Mi a hasi ku Silo.

¹⁵Lo Mi tira boso for di Mi bista, manera Mi a hasi ku tur boso rumannan, henter e desendensia di Efrain.

¹⁶"I pa loke t'abo, no hasi orashon pa e pueblo aki, no roga ni suplika pa nan, i no bin intersede serka Mi, pasobra Mi no ta tendebo.

¹⁷Bo no ta mira kiko nan ta hasi den e statnan di Juda i den e kayanan di Jerusalem?

¹⁸E muchanan ta piki palu i e tatanan ta pega kandela, i e muhenan ta prepara mansa pa traha bolo pa e reina di shelu; nan ta basha ofrendanan di bibida pa otro diosnan, pa probokaMi.

¹⁹Ta Ami nan ta proboka?" SENOR ta puntra. "No ta nan mes nan ta proboka, pa nan mes berguensa?"

²⁰Pesei, asina Senor DIOS ta bisa: "Ata, Mi rabia i Mi furia lo wordu drama riba e luga aki, riba hende i riba bestia, riba e palunan di kunuku i riba e fruta di tera; esei lo kima sin wordu paga."

²¹Asina e SENOR di ehersitonan, e Dios di Israel, ta bisa: "Pone boso ofrendanan kima huntu ku boso sakrifisionan i kome karni.

²²Pasobra Mi no a papia ku boso tatanan, ni a duna mandamentu tokante di ofrendanan kima i sakrifisionan dia ku Mi a saka nan for di tera di Egipto.

²³Ma esaki ta loke Mi a ordena nan, bisando: 'Obedese Mi bos i lo Mi ta boso Dios i boso lo ta Mi pueblo; i boso lo kana den henter e kaminda ku Mi ta ordena boso, pa bai bon ku boso.'

²⁴Sinembargo, nan no a obedese ni a inklina nan orea, ma a kana segun nan mes konseho i den e kapricho di nan kurason malbado, i nan a bai atras i no dilanti.

²⁵For di e dia ku boso tatanan a sali for di tera di Egipto te dia djawe, Mi a manda tur Mi sirbidonan, e profetanan, serka boso, a lanta tur dia tempran manda nan.

²⁶Sinembargo, nan no a tende na Mi, ni a inklina nan orea, ma a hasi nan nek steif. Nan a hasi mas maldat ku nan tatanan.

²⁷"I abo lo papia tur e palabranan aki ku nan, ma nan lo no tende na bo. Lo bo yama nan, ma nan lo no kontestabo.

²⁸I lo bo bisa nan: 'Esaki ta e nashon ku no a obedese e bos di SENOR nan Dios, ni a asepta korekshon. Berdat a perese i a wordu kita for di nan boka.

²⁹Korta kita bo kabei tir'afo, i kuminsa un lamentashon riba e halturanan pelon; pasobra SENOR a rechasa i a bandona e generashon di Su furia.'

³⁰"Pasobra e yunan di Juda a hasi loke ta malu den Mi bista," SENOR ta deklara. "Nan a pone nan kosnan repugnante den e kas ku ta wordu yama na Mi nomber, pa kontamin'e.

³¹I nan a lanta e luganan haltu di Tofet, ku ta keda den Vaye di Ben-hinom, pa kima nan yu hombernan i nan yu muhenan den kandela, loke Mi no a ordena, ni a bin den Mi pensamentu.

³²Pesei, ata, e dianan ta bin," SENOR ta deklara, "ku esaki lo no wordu yama Tofet, ni Vaye di Ben-hinom mas, ma Vaye di Matansa; pasobra nan lo dera hende den Tofet, pasobra no tin otro luga.

³³I e kadavernan di e pueblo aki lo bira kuminda pa e parhanan di shelu i pa e bestianan di mondi; i ningun hende lo no spanta nan pa nan bai.

³⁴E ora ei lo Mi pone un fin na e bos di goso i e bos di alegria, e bos di bruidehom i e bos di bruit den e statnan di Juda i den e kayanan di Jerusalem; pasobra e tera lo bira un ruina.