Read Papantla Totonac Jeremias 9 Bible Online

Jeremias 9 - Papantla Totonac bible

Jeremias 9

¹O ku mi kabes tabata awa, i mi wowo un fuente di lagrima, ku mi por a yora di dia i anochi pa e mortonan di e yu muhe di mi pueblo!

²O ku mi por tabatin un posada pa biahero den desierto, ku mi por a laga mi pueblo, i bai for di nan! Pasobra nan tur ta adultero, un trupa di hende traishonero.

³"Nan ta span nan lenga manera nan bog; mentira ta prevalese den e tera, i no berdat, pasobra nan ta bai di maldat pa maldat, i nan no konoseMi," SENOR ta deklara.

⁴"Laga tur hende tene kuidou ku su prohimo i no konfia ningun ruman, pasobra tur ruman ta trata ku astusia i tur prohimo ta kana ront hasi redu.

⁵I tur hende ta gana su prohimo i no ta papia berdat. Nan a kustumbra nan lenga di papia mentira; nan ta kansa nan mes dor di komete inikidat.

⁶Bo luga di biba ta meimei di engano; pa motibu di engano nan ta nenga di rekonoseMi," SENOR ta deklara.

⁷Pesei, asina e SENOR di ehersitonan ta bisa: "Mira, lo Mi refina nan i test nan; pasobra kiko mas Mi por hasi pa e yu muhe di Mi pueblo?

⁸Nan lenga ta un flecha mortal; e ta papia mentira; ku su boka un hende ta papia di pas ku su prohimo, ma paden e ta pone un trampa p'e.

⁹Lo Mi no kastiga nan pa e kosnan aki?" SENOR ta deklara. "Lo Mi no venga Mi mes riba un nashon asina?

¹⁰"Lo Mi yora i lamenta pa e serunan, i kanta un kantika di rou pa e luganan di yerba berde den desierto, pasobra esakinan ta keda bandona; ningun hende ta pasa dor di nan; i gritu di baka no ta wordu tend! mas. Tantu e parhanan di shelu komo e bestianan a hui; nan tur a bai.

¹¹"Lo Mi hasi Jerusalem un monton di ruina, un luga pa chakal biba aden; i lo Mi hasi e statnan di Juda un desolashon, sin habitante."

¹²Ken ta e hende sabi ku por komprende esaki? I ken ta esun ku e boka di SENOR a papia kune, pa e por deklara esaki? Pakiko e tera ta ruina, bashi manera desierto ku ningun hende no ta pasa dor di dje?

¹³I SENOR a bisa: "Pasobra nan a bandona Mi lei ku Mi a pone nan dilanti, i no a obedese Mi bos, ni a kana segun Mi lei,

¹⁴ma a kana segun e kapricho di nan kurason i a sigui tras di e Baalnan, manera nan tatanan a sina nan,"

¹⁵pesei, asina e SENOR di ehersitonan, e Dios di Israel, ta bisa, "mira, lo Mi alimenta nan, e pueblo aki, ku apsintus i duna nan awa venena pa bebe.

¹⁶I lo Mi plama nan meimei di e nashonnan ku ni nan ni nan tatanan tabata konose; i lo Mi manda spada tras di nan te ora ku Mi kaba ku nan."

¹⁷Asina e SENOR di ehersitonan ta bisa: "Konsidera i laga yama e muhenan yorado, pa nan bin; manda buska esnan ku ta yora mas miho, pa nan bin!

¹⁸Laga nan hasi lihe i kuminsa lamenta pa nos, pa nos wowo por yena ku lagrima, i ku awa por basha for di nos wowo.

¹⁹Pasobra for di Sion por tende gritu di lamentashon: 'Esta ruina nos a keda! Mira kon grandi nos berguensa ta; nos mester a bandona e tera, pa motibu ku nan a benta nos kasnan abou.'"

²⁰Boso, muhenan, skucha awor e palabra di SENOR, i laga boso orea risibi e palabra di Su boka; sina boso yu muhenan kon pa lamenta; kada un sina su prohimo un kantika di rou.

²¹Pasobra morto a pasa dor di nos bentananan; el a drenta nos palasionan pa kaba ku e muchanan ku ta riba kaya, i ku e hobennan ku ta riba e plenchinan di stat.

²²Bisa nan: "Asina SENOR ta deklara: 'Kadaver di hombernan lo kai manera mest riba tereno habri, i manera bohi tras di kosechado, ma ningun hende lo no rekohe nan.'"

²³Asina SENOR ta bisa: "No laga un hende sabi gaba di su sabiduria, i no laga e hende poderoso gaba di su poder; no laga un hende riku gaba di su rikesa,

²⁴ma laga esun ku ta gaba, gaba den esaki, ku e ta komprende i konoseMi, ku Ami ta SENOR, Kende ta mustra miserikordia, huisio i hustisia riba tera; pasobra Mi tin delisia den e kosnan aki," SENOR ta deklara.

²⁵"Ata, e dianan ta bin," SENOR ta deklara, "ku lo Mi kastiga tur ku ta sirkumsida i tog insirkumsida--

²⁶Egipto, Juda, Edom i e yu hombernan di Amon i Moab, i tur esnan ku ta biba den desierto, ku ta pela e kabei na banda di nan kabes; pasobra tur e nashonnan ta insirkumsida, i henter e kas di Israel ta insirkumsida di kurason."