Read Papantla Totonac Lamentashonnan 1 Bible Online

Lamentashonnan 1 - Papantla Totonac bible

Lamentashonnan 1

¹Esta solitario e ta keda, e stat ku un tempu tabata yen di hende! E stat ku un tempu tabata grandi entre e nashonnan a bira manera un biuda! E stat ku tabata un prenses entre e provinsianan a bira un pagado di tributo!

²E ta yora amargamente den anochi, i tin lagrima riba su kara; e no tin ningun hende pa konsol'e entre tur su amantenan. Tur su amigunan a traishon'e; nan a bira su enemigu.

³Bou di aflikshon i sklabitut pisa Juda a bai den eksilio; e ta biba entre e nashonnan, ma e no a hana sosiegu; tur su persiguidonan a alkans'e meimei di su angustia.

⁴E kamindanan di Sion ta lamenta, pasobra ningun hende no ta bin na e fiestanan stipula. Tur su portanan ta keda desola; su saserdotenan ta suspira, su birgennan ta afligi i e mes ta den amargura.

⁵Su atversarionan a bira su maestronan, su enemigunan ta prospera; pasobra SENOR a hasie sufri pa motibu di e multitut di su transgreshonnan; su yu chikitunan a wordu hiba komo katibu dilanti di e atversario.

⁶I for di e yu muhe di Sion tur su splendor a disparse; su prensnan a bira manera bina machu ku no a hana luga di yerba berde; i sin forsa nan a hui dilanti di e persiguido.

⁷Den e dianan di su aflikshon i dwalmentu Jerusalem ta korda tur su kosnan presioso ku tabata di dianan di prome aya, tempu ku su hendenan a kai den man di e atversario, i ningun hende no a yud'e. E atversarionan a mir'e; nan a hasi bofon di su ruina.

⁸Jerusalem a peka grandemente; pesei el a bira un kos impuru. Tur esnan ku tabata onr'e ta despresi'e pasobra nan a mira su sunu; si, e mes ta suspira i ta bira kara.

⁹Su impuresa tabata den su sayanan; e no a tene kuenta ku su futuro; pesei su kaida tabata asombroso; e no tin konsolado. "Mira mi aflikshon, O SENOR, pasobra e enemigu a engrandese su mes!"

¹⁰E atversario a tira man riba tur su kosnan presioso; el a mira e nashonnan drenta su santuario, esnan ku Abo a ordena pa nan no drenta Bo kongregashon.

¹¹Henter su pueblo ta suspira, nan ta buska pan; nan a kambia nan kosnan presioso pa kuminda, pa tene nan mes na bida. "Wak, O SENOR, i mira, pasobra mi ta wordu despresia."

¹²"No ta importa boso, boso tur ku ta pasa aki banda? Wak i mira si tin dolo manera e dolo ku a bin pisa riba mi, ku SENOR a afligimi kune den e dia di Su rabia ardiente.

¹³"For di ariba El a manda kandela den mi wesunan, i esei a penetra te den nan; El a habri un reda pa mi pianan; El a hasimi bolbe; El a lagami desola, debilita henter dia.

¹⁴"E yugo di mi transgreshonnan ta mara; ta Su mes man ta wef nan na otro; nan a bin riba mi nek; El a hasi mi forsa faya; Senor a entregami den man di esnan kontra ken mi no por keda para.

¹⁵"Senor a rechasa tur mi hombernan fuerte meimei di mi; El a anunsia un tempu stipula kontra mi pa plecha mi hobennan; Senor a trapa e yu muhe birgen di Juda, manera ta trapa den baki-di-pers-wendruif.

¹⁶"Pa e kosnan aki mi ta yora; awa ta basha for di mi wowo, pasobra un konsolado, un ku ta restora mi alma, ta leu for di mi; mi yunan ta keda desola pasobra e enemigu a prevalese."

¹⁷Sion ta saka su mannan; no tin ningun hende pa konsol'e; SENOR a ordena tokante di Jakob pa esnan ront di dje bira su atversario; Jerusalem a bira un kos impuru meimei di nan.

¹⁸"SENOR ta hustu, pasobra t'ami a rebeldia kontra Su mandamentu; tende awor, tur pueblo, i mira mi dolo; mi birgennan i mi hobennan a bai den koutiverio.

¹⁹"Mi a yama mi amantenan, ma nan a ganami; mi saserdotenan i mi ansianonan a perese den e stat, mientras ku nan tabata buska kuminda pa tene nan mes na bida.

²⁰"Mira, O SENOR, pasobra mi ta den angustia; mi spiritu ta masha intrankil; mi kurason ta tur reboltia den mi, pasobra mi tabata masha rebelde. Den kaya spada ta mata; den kas morto ta reina.

²¹"Nan a tendemi ta suspira; no tin ningun hende pa konsolami; tur mi enemigunan a tende di mi kalamidat; nan ta kontentu ku Bo a hasi esei. O ku Abo lo a trese e dia ku Bo a proklama, asina ku nan por a bira meskos ku mi.

²²"Laga tur nan maldat bin Bo dilanti; i trata ku nan manera Bo a trata ku mi pa motibu di tur mi transgreshonnan; pasobra mi kehamentunan ta hopi i mi kurason ta desmaya."