Read Papantla Totonac Lamentashonnan 2 Bible Online

Lamentashonnan 2 - Papantla Totonac bible

Lamentashonnan 2

¹Mira kon Senor den Su rabia a tapa e yu muhe di Sion ku un nubia! For di shelu El a tira e gloria di Israel riba tera, i no a korda riba e banki pa Su pia den e dia di Su rabia.

²Senor a traga tur; E no a spar ningun di e habitashonnan di Jakob. Den Su furia El a tira e luganan fortifika di e yu muhe di Juda abou; El a baha nan te na suela; El a profana e reino i su prensnan.

³Den rabia ardiente El a korta henter e forsa di Israel kit'afo; El a hala Su man drechi bek for di dilanti di e enemigu. I El a kima kontra Jakob manera un kandela tur na flam ku ta kaba ku tur kos ku tin ront di dje.

⁴Manera un enemigu El a span Su bog; Su man drechi El a lanta manera un atversario, i a mata tur loke tabata agradabel pa bista; den e tent di e yu muhe di Sion El a drama Su furia manera kandela.

⁵Senor a bira manera un enemigu. El a traga Israel; El a traga tur su palasionan; El a destrui su luganan fortifika, i a multiplika yoramentu i kehamentu den e yu muhe di Juda.

⁶I El a trata Su tabernakel ku violensia, komo si fuera esaki tabata djis un kunuku di wendruif; El a destrui Su luga pa reuni; SENOR a hasi ku e fiesta stipula i e dia di sabat a wordu lubida na Sion, i El a despresia tantu rei komo saserdote den e indignashon di Su rabia.

⁷Senor a rechasa Su altar, El a bandona Su santuario; El a entrega e murayanan di su palasionan den man di e enemigu. Nan a hasi desordu den e kas di SENOR, manera riba dia di un fiesta stipula.

⁸SENOR a determina pa destrui e muraya di e yu muhe di Sion. El a span un lina-di-midi, E no a wanta Su man pa no destrui; i El a hasi baluarte i muraya lamenta; huntu nan a para kaba na nada.

⁹Su portanan a senk den tera, El a destrui i kibra su baranan. Su rei i su prensnan ta meimei di e nashonnan; no tin lei mas; tampoko su profetanan no ta hana vishon for di SENOR.

¹⁰E ansianonan di e yu muhe di Sion ta sint'abou na suela, nan ta ketu. Nan a tira tera riba nan kabes; nan a faha nan mes ku pana-di-saku. E birgennan di Jerusalem a baha nan kabes te na suela.

¹¹Mi wowonan ta faya pa motibu di lagrima, mi tripanan ta trose di angustia; den mi amargura mi hal ta basha riba suela, pa motibu di e destrukshon di e yu muhe di mi pueblo, pasobra mucha chikitu i bebi ta desmaya den e kayanan di e stat.

¹²Nan ta puntra nan mama: "Unda tin mainshi i bina?" mientras nan ta desmaya manera un homber herida den e kayanan di e stat, mientras nan ta hala nan ultimo rosea riba pechu di nan mama.

¹³Kon lo mi spiertabo? Ku kiko lo mi komparabo, O yu muhe di Jerusalem? Ku kiko lo mi komparabo ora mi konsolabo, O yu muhe birgen di Sion? Pasobra bo ruina ta mes grandi ku laman; ken por kurabo?

¹⁴Bo profetanan a mira vishonnan falsu i bashi pa bo; i nan no a ekspone bo inikidat, pa trese esnan di bo ku ta den koutiverio, bek, ma nan a mira profesianan falsu i enganoso pa bo.

¹⁵Tur hende ku ta pasa bai ta bati man pa hasi chercha di bo; nan ta fluit i ta sakudi kabes pa e yu muhe di Jerusalem: "Ta esaki ta e stat di kual nan a bisa: 'E perfekshon di bunitesa, e goso di henter mundu'?"

¹⁶Tur bo enemigunan a habri boka hanchu kontra bo; nan ta fluit i ta morde riba djente. Nan ta bisa: "Nos a gulie mand'abou! Siguramente esaki ta e dia riba kual nos a spera; nos a biba te ku nos a mira esaki."

¹⁷SENOR a hasi loke El a propone; El a kumpli ku Su palabra ku El a ordena for di dianan di prome aya. El a bent'abou sin spar nada, i El a hasi e enemigu regosiha ofer di bo; El a halsa e kachu di bo atversarionan.

¹⁸Nan kurason a sklama na Senor: "O muraya di e yu muhe di Sion, laga bo lagrima kore manera riu, di dia i anochi; no duna bo mes deskanso; no laga bo wowonan hana sosiegu.

¹⁹"Lanta, sklama duru den anochi, na kuminsamentu di e wardanan di anochi; basha bo kurason manera awa den e presensia di Senor; halsa bo mannan na djé pa bida di bo mucha chikitunan, ku pa motibu di hamber ta kai flou na skina di tur kaya."

²⁰Wak, O SENOR, i mira! Ku ken Bo a trata asina? Muhenan mester kome nan mes yu-- e mucha chikitunan ku a nase salu? Saserdote i profeta mester wordu mata den e santuario di Senor?

²¹Tantu hende yon komo hende bieu ta keda benta abou na suela den e kayanan; mi birgennan i mi hobennan a kai pa medio di spada. Bo a mata nan den e dia di Bo rabia, Bo a mata sin tene miserikordia.

²²Manera pa un dia di fiesta stipula, asina Bo a invita e terornan ku ta rondonami; i no tabatin ningun hende ku a skapa of sobrebibi den e dia di e rabia di SENOR. Esnan ku mi a hana i a kria, mi enemigu a kaba ku nan.