Read Papantla Totonac Lamentashonnan 3 Bible Online

Lamentashonnan 3 - Papantla Totonac bible

Lamentashonnan 3

¹Ami ta e homber ku a mira aflikshon pa motibu di e bara di Su furia.

²El a guiami i a hasimi kana den skuridat, i no den lus.

³Siguramente El a bira Su man kontra mi bes tras bes, henter dia.

⁴El a hasi mi karni i mi kueru kaba na mi kurpa, El a kibra mi wesunan.

⁵El a lanta baluarte kontra mi i a rondonami ku amargura i kontratiempo.

⁶El a hasimi biba den luganan skur, manera esnan ku ta morto pa hopi tempu kaba.

⁷El a changami pa asina mi no skapa; El a hasi mi kadena pisa.

⁸Asta ora mi sklama i yama pa yudansa, E ta rechasa mi orashon.

⁹El a blokia mi kamindanan ku piedra korta; El a hasi mi berehanan tur trosi.

¹⁰E ta pa mi manera un ber ku ta skonde lur pa ataka, manera un leon den luganan sekreto.

¹¹El a lastrami for di kaminda i a habrimi tur for di otro; El a lagami sin yudansa.

¹²El a span Su bog i a ponemi komo mekpunt pa Su flecha.

¹³El a hasi e flechanan for di Su muchila penetra mi partinan paden.

¹⁴Mi a bira un kos di hari pa henter mi pueblo, nan kantika di bofon henter dia.

¹⁵El a yenami ku amargura, El a hasimi burachi ku apsintus.

¹⁶I El a kibra mi djentenan ku greis; El a hasimi lastra den stof.

¹⁷I Abo a hala mi alma kit'e leu for di pas; mi a lubida kiko ta felisidat.

¹⁸Pesei mi ta bisa: "Mi forsa a perese, i tambe mi speransa for di SENOR."

¹⁹Korda mi aflikshon i mi dwalmentu, e apsintus i amargura.

²⁰Siguramente mi alma ta korda riba nan i ta keda abati den mi.

²¹Riba esaki mi ta pensa, pesei mi tin speransa.

²²Di berdat, e miserikordia di SENOR no ta kaba nunka, pasobra Su kompashon nunka no ta faya.

²³Tur mainta nan ta nobo; grandi ta Bo fieldat.

²⁴Mi alma ta bisa: "SENOR ta mi porshon, pesei ta den djé mi ta spera."

²⁵SENOR ta bon pa esnan ku ta warda riba djé, pa e alma ku ta busk'E.

²⁶Ta bon pa warda den silensio riba e salbashon di SENOR.

²⁷Ta bon pa un homber karga yugo den su hubentut.

²⁸Lagu'e sinta su so i keda ketu, pasobra El a pone esei riba dje.

²⁹Lagu'e pone su boka den stof, kisas tin speransa.

³⁰Lagu'e duna su band'i kara na esun ku ta dal e; lagu'e wordu yena ku reproche.

³¹Pasobra Senor lo no rechasa pa semper.

³²Maske E kousa tristesa, tog E lo tin kompashon segun Su miserikordia abundante.

³³Pasobra E no ta afligi boluntariamente, ni ta hasi yunan di hende bira tristu.

³⁴E asunto di trapa tur prezo di e tera bou di Su pia,

³⁵di nenga hustisia na un homber den presensia di e Haltisimo,

³⁶di gana un hende den su kaso di lei-- kosnan asina Senor no ta aproba.

³⁷Ken ta esun ku ta papia, i esaki ta sosode, si no ta Senor a ordena esaki?

³⁸No ta for di boka di e Haltisimo tantu bon komo malu ta sali?

³⁹Pakiko un hende bibu ta keha, un hende ta keha pa kastigu di su pikanan?

⁴⁰Laga nos samina i investiga nos kamindanan, i laga nos bolbe serka SENOR.

⁴¹Laga nos halsa nos kurason i nos mannan na Dios den shelu;

⁴²nos a transgresa i a rebeldia; Bo no a pordona.

⁴³Bo a tapa Bo mes ku rabia i a persigui nos; Bo a mata sin miserikordia.

⁴⁴Bo a tapa Bo mes ku un nubia, asina ku ningun orashon no por pasa.

⁴⁵Bo a hasi nos basura i sushedat meimei di e pueblonan.

⁴⁶Tur nos enemigunan a habri boka kontra nos.

⁴⁷Paniko i trampa a bin riba nos, desolashon i destrukshon.

⁴⁸Mi wowonan ta basha roi di awa pa motibu di e destrukshon di e yu muhe di mi pueblo.

⁴⁹Awa ta basha for di mi wowo ketu bai, sin stop,

⁵⁰te ora SENOR wak abou i mira for di shelu.

⁵¹Loke mi ta mira ta hasi mi alma tristu pa motibu di tur e yu muhenan di mi stat.

⁵²Sin motibu mi enemigunan a persiguimi manera ta persigui parha;

⁵³nan a kaba ku mi den e pos i a tira piedra riba mi.

⁵⁴Awa a tapa mi kabes; mi a bisa: "Mi ta perdi!"

⁵⁵Mi a invoka Bo nomber, O SENOR, for di e profundidat di pos.

⁵⁶Bo a tende mi bos: "No skonde Bo orea pa mi suspiro, pa mi sklamashon pa yudansa."

⁵⁷Bo a hala serka ora mi a sklama na Bo; Bo a bisa: "No tene miedu!"

⁵⁸O Senor, Bo a pleita kaso di mi alma; Bo a redimi mi bida.

⁵⁹O SENOR, Bo a mira mi opreshon; huzga mi kaso.

⁶⁰Bo a mira tur nan vengansa, tur nan komplotnan kontra mi.

⁶¹Bo a tende nan reproche, O SENOR, tur nan komplotnan kontra mi.

⁶²Lep di esnan ku ta atakami i nan murmuramentu ta kontra mi henter dia.

⁶³Wak nan! Sea ku nan ta sinta of lanta, t'ami ta nan kantika di bofon.

⁶⁴Abo lo paga nan, O SENOR, di akuerdo ku e obra di nan mannan.

⁶⁵Abo lo duna nan duresa di kurason; Bo maldishon lo ta riba nan.

⁶⁶Lo Bo persigui nan den rabia, i destrui nan for di bou di e shelunan di SENOR!