Read Papantla Totonac Lamentashonnan 4 Bible Online

Lamentashonnan 4 - Papantla Totonac bible

Lamentashonnan 4

¹Esta skur e oro a bira! Mira kon e oro puru a kambia! E piedranan sagrado ta basha na skina di tur kaya.

²E yu hombernan presioso di Sion, ku un tempu a wordu balora igual ku oro fini, mira kon nan ta wordu konsidera komo butishi di klei, obra di e mannan di un alfarero!

³Asta chakal ta duna pechu, nan ta laga nan chikitunan chupa; ma e yu muhe di mi pueblo a bira kruel, manera abestrus den desierto.

⁴Lenga di bebi ta pega na su shel'i boka pa motibu di set; e chikitunan ta pidi pan, ma ningun hende no ta duna nan.

⁵Esnan ku tabata kome delikatesa ta keda desola den e kayanan; esnan ku a lanta den purpura ta brasa monton di shinishi.

⁶Pasobra e inikidat di e yu muhe di mi pueblo ta mas grandi ku e pika di Sodoma, ku a wordu destrui den un momento, sin ku tabatin ningun man pa yud'e.

⁷Esnan konsagra den dje tabata mas puru ku sneu, nan tabata mas blanku ku lechi; nan kurpa tabata mas kora ku koral, nan briyo manera safiro.

⁸Nan aparensia ta mas pretu ku chemene; hende no ta rekonose nan riba kaya; nan kueru ta pega na nan wesu, el a seka, el a bira manera palu.

⁹Esnan ku a muri pa medio di spada ta mas fortuna ku esnan ku a muri dor di hamber; pasobra poko-poko esakinan ta kaba na nada pa falta di e frutanan di kunuku.

¹⁰Man di muhenan di kompashon a herebe nan mes yunan; nan a bira kuminda pa nan, pa motibu di e destrukshon di e yu muhe di mi pueblo.

¹¹SENOR a kumpli ku Su furia, El a drama Su rabia ardiente; i El a sende un kandela den Sion ku a kaba ku su fundeshinan.

¹²E reinan di tera, i tur e habitantenan di tera, lo no por a kere ku e atversario i e enemigu por a drenta e portanan di Jerusalem.

¹³Pa motibu di e pikanan di su profetanan i e inikidatnan di su saserdotenan, kendenan a drama e sanger di e hustunan meimei di dje,

¹⁴nan tabata kana dwal, siegu, riba kaya; nan tabata asina sushi di sanger ku ningun hende no por a mishi ku nan pananan.

¹⁵"Bai! Impuru!" nan ta grita nan. "Bai, bai, no mishi!" Pesei nan a hui bai i a keda dwal; entre e nashonnan hende tabata bisa: "Nan lo no keda biba huntu ku nos mas."

¹⁶E presensia di SENOR a plama nan; E lo no sigui paga tino na nan. Nan no a onra e saserdotenan, nan no a faborese e ansianonan.

¹⁷Tog nos a kansa nos wowonan; buskamentu di yudansa tabata en bano. Den nos buskamentu nos a buska un nashon ku no por a salba.

¹⁸Nan a sigui nos pasonan, asina ku nos no por a kana den nos kayanan; nos fin tabata aserkando, nos dianan a keda kumpli, pasobra nos fin a yega.

¹⁹Nos persiguidonan tabata mas lihe ku e aguilanan di shelu. Nan a persigui nos riba e serunan; nan tabata skonde lur pa ataka nos den desierto.

²⁰E rosea di nos bida, e ungi di SENOR, a wordu kaptura den nan trampanan, esun di kende nos a bisa: "Bou di su sombra nos lo biba meimei di e nashonnan."

²¹Regosiha i sea kontentu, O yu muhe di Edom, abo ku ta biba na tera di Uz; ma e kopa lo pasa serka bo tambe, i lo bo bira burachi i kita sunu.

²²E kastigu di bo inikidat a wordu kumpli, O yu muhe di Sion; E lo no lagabo keda den eksilio mas. Ma E lo kastiga bo inikidat, O yu muhe di Edom; E lo trese bo pikanan na kla!