Read Papantla Totonac Ezekiel 1 Bible Online

Ezekiel 1 - Papantla Totonac bible

Ezekiel 1

¹Awor a sosode den e di trinta ana, riba e di sinku dia di e di kuater luna, mientras ku mi tabata banda di Riu Kebar meimei di e eksiliadonan, ku e shelunan a habri i mi a mira vishonnan di Dios.

²Riba e di sinku dia di e luna, den e di sinku ana di eksilio di rei Joakin,

³e palabra di SENOR a wordu dirigi spesifikamente na saserdote Ezekiel, yu homber di Buzi, na e tera di e kaldeonan, banda di Riu Kebar. I ayanan e man di SENOR tabata riba dje.

⁴I mientras ku mi tabata wak, ata un bientu di tempestat tabata bin for di nort, un nubia pisa ku kandela manera lamper ku tabata korta kontinuamente, i un lus briyante ront di dje. I den dje, meimei di e kandela, tabatin algu manera metal ku ta lombra.

⁵I meimei di dje tabatin figuranan ku tabata parse kuater ser bibu. I nan aparensia tabata asina: nan tabatin forma di hende;

⁶kada un di nan tabatin kuater kara i kuater hala.

⁷I nan pianan tabata stret i nan plant'i pia tabata manera huf di bishe, i nan tabata briya manera brons lombra.

⁸Bou di nan halanan, na nan kuater bandanan, tabatin man di hende. Pa loke ta e karanan i e halanan di nan tur kuater,

⁹nan halanan tabata mishi ku otro. Ora nan tabata move, nan no tabata bira nan karanan; kada un tabata bai stret su dilanti.

¹⁰Pa loke ta forma di nan karanan: kada un tabatin kara di hende; na banda drechi tur kuater tabatin kara di leon, i na banda robes, kara di bishe machu; i tur kuater tabatin kara di aguila.

¹¹Asina nan karanan tabata. Nan halanan tabata habri manda ariba. Kada un tabatin dos hala ku tabata mishi ku otro i dos ku tabata tapa nan kurpa.

¹²I kada un tabata bai stret su dilanti. Kaminda e spiritu kier a bai, nan tabata bai, sin bira segun ku nan tabata bai.

¹³Meimei di e sernan bibu tabatin algu ku ta parse karbon sendi, manera flambeu ku ta bai bin entre e sernan bibu. E kandela tabata briya, i lamper tabata korta for di e kandela.

¹⁴E sernan bibu tabata kore bai bin manera rayo di lamper.

¹⁵Awor, mientras ku mi tabata wak e sernan bibu, mira, tabatin un wil abou na suela banda di kada ser bibu ku su kuater karanan.

¹⁶E aparensia di e wilnan i e moda ku nan tabata traha tabata manera e kolo di berilo, i nan tur kuater tabatin e mesun forma. Nan aparensia i e moda ku nan tabata traha tabata komo si fuera un wil tabata hinka den un otro wil.

¹⁷Ki ora ku nan tabata move, nan tabata move den kualke di nan kuater direkshonnan, sin bira segun nan tabata move.

¹⁸Nan rimnan tabata haltu i impreshonante, i e rimnan di nan tur kuater tabata yen di wowo tur ront.

¹⁹I ki ora ku e sernan bibu tabata move, e wilnan tabata move huntu ku nan. I ki ora ku e sernan bibu tabata lanta for di suela, e wilnan tambe tabata lanta.

²⁰Kaminda ku e spiritu kier a bai, den e mesun direkshon ei nan tabata bai. I e wilnan tabata lanta pega-pega banda di nan, pasobra e spiritu di e sernan bibu tabata den e wilnan.

²¹Ki ora ku esayanan tabata bai, esakinan tabata bai; i ki ora ku esayanan tabata keda para, esakinan tabata keda para. I ki ora ku esayanan tabata lanta for di suela, e wilnan tabata lanta pega-pega banda di nan, pasobra e spiritu di e sernan bibu tabata den e wilnan.

²²I ofer di e kabesnan di e sernan bibu tabatin algu ku tabata parse un firmamentu, manera e briyo impreshonante di kristal, ku tabata ekstendi ofer di nan kabes.

²³I bou di e firmamentu nan halanan tabata gespan stret, un kontra otro; tambe kada un tabatin dos hala ku tabata tapa nan kurpa na esun banda i na e otro banda.

²⁴Tambe mi tabata tende e zonidu di nan halanan ora nan tabata bai, manera e zonidu di hopi awanan, manera e bos di e Todopoderoso, un zonidu di tumulto manera e zonidu di un kampamentu di ehersito. Ki ora ku nan tabata keda para, nan tabata baha nan halanan.

²⁵I a sali un bos for di riba e firmamentu ku tabata ofer di nan kabes. Ki ora ku nan tabata keda para, nan tabata baha nan halanan.

²⁶Awor riba e firmamentu ku tabata ofer di nan kabes tabatin algu ku tabata parse un trono, ku aparensia di piedra di safiro, i aya riba, riba loke tabata parse un trono, tabatin un figura ku aparensia di hende.

²⁷Anto mi a mira ku for di loke ta parse Su hep bai ariba tabatin algu manera brons ku ta lombra, ku tabata parse kandela tur ront den dje; i for di loke ta parse Su hep bai abou, mi a mira algu manera kandela; i tabatin un splendor ront di djé.

²⁸Manera e aparensia di regenbog den nubia riba un dia di awaseru, asina e aparensia di e splendor tur ront tabata. Asina e aparensia di e semehansa di e gloria di SENOR tabata. I ora mi a mira esaki, mi a tira mi kurpa abou ku mi kara te na suela, i mi a tende un bos ta papia.