Read Papantla Totonac Ezekiel 10 Bible Online

Ezekiel 10 - Papantla Totonac bible

Ezekiel 10

¹I mi a wak, i mira, den e firmamentu ku tabata keda ofer di kabes di e kerubinnan, algu manera un piedra di safiro, ku tabata parse forma di un trono, a presenta riba nan!

²I El a papia ku e homber bisti na pana di lino, i a bisa: "Drenta meimei di e wilnan ku ta drai duru bou di e kerubinnan, i yena bo mannan ku karbon sendi saka for di meimei di e kerubinnan, i plama nan riba e stat." I dilanti di mi bista el a drenta.

³Awor e kerubinnan tabata para na banda drechi di e tempel ora ku e homber a drenta, i e nubia a yena e plenchi paden.

⁴Despues e gloria di SENOR a lanta for di riba e kerubin i a bai na drempel di e tempel. I e tempel a wordu yena ku e nubia, i e plenchi a wordu yena ku e splendor di e gloria di SENOR.

⁵Ademas, e zonidu di e halanan di e kerubinnan por a wordu tendi te na e plenchi di mas pafo, manera e bos di Dios Todopoderoso ora ku E ta papia.

⁶I a sosode ku ora El a duna ordu na e homber ku tabata bisti na pana di lino, bisando: "Kohe kandela for di meimei di e wilnan ku ta drai duru, for di meimei di e kerubinnan," e homber a drenta i a bai para banda di un wil.

⁷E ora ei for di meimei di e kerubinnan un kerubin a saka su man na e kandela ku tabata meimei di e kerubinnan, i a kohe poko di dje pone den man di e homber bisti na pana di lino, kende a tum'e i a sali bai pafo.

⁸I bou di hala di e kerubinnan por a mira algu ku tabatin forma di man di hende.

⁹I mi a wak, i mira, kuater wil banda di e kerubinnan, un wil banda di kada kerubin. I e aparensia di e wilnan tabata manera e kolo di piedra di berilo.

¹⁰I enkuanto nan aparensia: tur kuater tabata meskos, komo si fuera un wil tabata hinka den un otro wil.

¹¹Ora nan tabata move, nan tabata bai den kualke di nan kuater direkshonnan, sin bira segun nan tabata bai; ma nan tabata sigui den e direkshon ku nan tabata wak, sin bira segun nan tabata bai.

¹²I henter nan kurpa, nan lomba, nan mannan, nan halanan i e wilnan tabata yen di wowo tur ront; e wilnan tabata pertenese na nan tur kuater.

¹³Mi a tende nan yama e wilnan: "Wilnan ku ta drai duru!"

¹⁴Kada un tabatin kuater kara. E prome kara tabata kara di kerubin, e di dos kara tabata kara di hende, e di tres, kara di leon, i e di kuater, kara di aguila.

¹⁵Despues e kerubinnan a subi bai ariba. Eseinan ta e sernan bibu ku mi a mira banda di Riu Kebar.

¹⁶Awor ora ku e kerubinnan tabata move, e wilnan tabata bai banda di nan; tambe ora ku e kerubinnan tabata lanta nan halanan pa lanta for di tera, e wilnan no tabata kita for di banda di nan.

¹⁷Ora ku e kerubinnan tabata keda para, e wilnan tambe tabata keda para; i ora nan tabata lanta, e wilnan tabata lanta huntu ku nan, pasobra e spiritu di e sernan bibu tabata den nan.

¹⁸E ora ei e gloria di SENOR a bandona drempel di e tempel i a bai para ofer di e kerubinnan.

¹⁹Ora ku e kerubinnan a sali bai, nan a lanta nan hala, i dilanti di mi bista nan a lanta for di suela, ku e wilnan banda di nan. I nan a keda para na entrada di e porta pariba di e kas di SENOR, i e gloria di e Dios di Israel tabata zwef riba nan.

²⁰Esakinan ta e sernan bibu ku mi a mira bou di e Dios di Israel, banda di Riu Kebar, i mi a komprende ku nan tabata kerubin.

²¹Kada un tabatin kuater kara i kada un tabatin kuater hala, i bou di nan halanan tabatin loke tabata parse man di hende.

²²Pa loke ta e aparensia di nan karanan, nan tabata e mesun karanan ku mi a mira banda di Riu Kebar. Kada un tabata bai stret su dilanti.