Read Papantla Totonac Ezekiel 11 Bible Online

Ezekiel 11 - Papantla Totonac bible

Ezekiel 11

¹Despues e Spiritu a hisami i a hibami na e porta banda pariba di e kas di SENOR, ku tabata keda kara pariba. I mira, na entrada di e porta tabatin bint'i sinku homber, i den nan mi a mira Jaazanias, yu homber di Azur, i Pelatias, yu homber di Benaia, lidernan di e pueblo.

²I El a bisami: "Yu di hende, esakinan ta e hombernan ku ta plania inikidat i ta duna mal konseho den e stat aki,

³kendenan ta bisa: 'E tempu pa traha kas no ta serka? E stat aki ta e wea i nos ta e karni.'

⁴Pesei, profetisa kontra nan, yu di hende! Profetisa!"

⁵E ora ei e Spiritu di SENOR a baha riba mi, i El a bisami: "Bisa: 'Asina SENOR ta bisa: "Esei ta loke boso ta pensa, kas di Israel, pasobra Mi konose boso pensamentunan.

⁶Boso a mata hopi hende den e stat aki i a yena su kayanan ku e mortonan."

⁷'Pesei, asina Senor DIOS ta bisa: "Boso mortonan, ku boso a tira meimei di e stat, ta e karni, i e stat aki ta e wea; ma Ami lo saka boso for di den dje.

⁸Boso tabatin miedu di spada, i ta spada Mi ta bai trese riba boso," Senor DIOS ta deklara.

⁹"I lo Mi saka boso for di meimei di e stat, i lo Mi entrega boso den man di stranheronan, i ehekuta huisio riba boso.

¹⁰I boso lo kai pa medio di spada. Lo Mi huzga boso na e frontera di Israel. Asina boso lo sa ku Ami ta SENOR.

¹¹E stat aki lo no ta un wea pa boso, ni boso lo no ta karni den dje. Lo Mi huzga boso na e frontera di Israel.

¹²Asina boso lo sa ku Ami ta SENOR, pasobra boso no a kana den Mi statutonan, ni boso no a ehekuta Mi ordenansanan, ma boso a aktua segun e ordenansanan di e nashonnan ront di boso.

¹³I a sosode ku mientras mi tabata profetisa, Pelatias, yu homber di Benaia, a muri. E ora ei mi a tira mi kurpa abou ku mi kara te na suela i a sklama na bos haltu i a bisa: "Ai Senor DIOS! Ta un fin kompleto bo kier pone na e restante diIsrael?"

¹⁴I e palabra di SENOR a yega na mi, bisando:

¹⁵"Yu di hende, bo rumannan, bo famianan, tur esnan den eksilio huntu ku bo, i henter e kas di Israel, nan tur, ta esnan na kendenan e habitantenan di Jerusalem a bisa: 'Bai leu for di SENOR. Ta na nos e tera aki a wordu duna komo propiedat.'

¹⁶"Pesei bisa: 'Asina Senor DIOS ta bisa: "Ounke Mi a manda nan leu meimei di e nashonnan, i ounke Mi a plama nan meimei di e paisnan, tog pa un tempu kortiku Mi tabata un santuario pa nan na e paisnan, na unda nan a bai."'

¹⁷"Pesei bisa: 'Asina Senor DIOS ta bisa: "Lo Mi rekohe boso for di e pueblonan i reuni boso for di e paisnan kaminda boso a wordu plama, i lo Mi duna boso e tera di Israel."'

¹⁸"Ora nan yega aya, nan lo kita tur su kosnan repugnante i tur su abominashonnan for di dje.

¹⁹I lo Mi duna nan un kurason i pone un spiritu nobo den nan. I lo Mi saka e kurason di piedra for di nan karni i duna nan un kurason di karni,

²⁰pa nan kana den Mi statutonan i warda Mi ordenansanan i kumpli ku nan. E ora ei nan lo ta Mi pueblo i Ami lo ta nan Dios.

²¹Ma esnan ku nan kurason ta sigui tras di nan kosnan repugnante i tras di abominashonnan, lo Mi trese nan kondukta riba nan mes kabes," Senor DIOS ta deklara.

²²E ora ei e kerubinnan a lanta nan halanan ku e wilnan banda di nan, i e gloria di e Dios di Israel tabata zwef riba nan.

²³Anto e gloria di SENOR a lanta for di meimei di e stat i a bai para riba e seru ku ta keda pariba di e stat.

²⁴I e Spiritu a hisami i a hibami, den un vishon pa medio di e Spiritu di Dios, serka e eksiliadonan na Kaldea. Asina e vishon ku mi a mira a bai for di mi.

²⁵Anto mi a konta e eksiliadonan tur e kosnan ku SENOR a mustrami.