Read Papantla Totonac Ezekiel 13 Bible Online

Ezekiel 13 - Papantla Totonac bible

Ezekiel 13

¹E ora ei e palabra di SENOR a yega na mi, bisando:

²"Yu di hende, profetisa kontra e profetanan di Israel ku ta profetisa, i bisa esnan ku ta profetisa for di nan mes kurason: 'Skucha e palabra di SENOR!

³Asina Senor DIOS ta bisa: "Ai di e profetanan bobo ku ta sigui nan mes spiritu sin ku nan a mira nada.

⁴O Israel, bo profetanan ta manera zoro meimei di ruina.

⁵Boso no a subi bai den e kibranan den muraya, ni boso no a traha muraya ront di e kas di Israel pa resist! firme den bataya riba e dia di SENOR.

⁶Nan ta mira banidat i adivinashon enganoso ku ta bisa: 'SENOR ta deklara,' mientras ku SENOR no a manda nan. I tog nan ta spera pa nan palabra wordu kumpli.

⁷No ta un vishon falsu boso a mira i no ta adivinashon enganoso boso a papia, ora boso a bisa: 'SENOR ta deklara,' mientras ku no ta Ami a papia?"'"

⁸Pesei, asina Senor DIOS ta bisa: "Pasobra boso a papia banidat i a mira mentira, pesei, ata, Mi ta kontra boso," Senor DIOS ta deklara.

⁹"Mi man lo ta kontra e profetanan ku ta mira vishon bano i ta papia adivinashon mentiroso. Nan lo no ta den e konseho di Mi pueblo, ni nan lo no wordu inskribi den e buki di e kas di Israel, ni nan lo no drenta tera di Israel, pa boso sa ku Ami ta Senor DIOS.

¹⁰"Pasobra, si, pasobra nan a gana Mi pueblo, bisando: 'Pas!' mientras ku no tin pas. I ora nan traha un muraya, mira, nan ta pleister e ku kalki.

¹¹Bisa esnan ku ta pleister e ku kalki, ku e ta bai kai. Un awaseru duru lo bin, i abo, O hagel, lo kai, i un bientu di tempestat lo lanta.

¹²Mira, ora ku e muraya a kaba di kai, no t'asina ku nan lo puntra boso: 'Unda e kalki ku boso a pleister e kune ta?'"

¹³Pesei, asina Senor DIOS ta bisa: "Den Mi furia lo Mi hasi un bientu di tempestat lanta. Den Mi rabia lo tin tambe un awaseru pisa i hagel pa kaba ku esaki den furia.

¹⁴E muraya ku boso a pleister ku kalki lo Mi bash'abou te na suela, asina ku su fundeshi lo keda bisto. I ora ku e kai, boso lo wordu destrui meimei di dje. I boso lo sa ku Ami ta SENOR.

¹⁵Asina lo Mi kumpli ku Mi furia riba e muraya i riba esnan ku a pleister e ku kalki. I lo Mi bisa boso: 'E muraya no t'ei mas, ni esnan ku a pleister e no t'ei mas,

¹⁶esta, e profetanan di Israel ku ta profetisa pa Jerusalem, i ku ta mira vishon di pas p'e, mientras ku no tin pas,' Senor DIOS ta deklara.

¹⁷"Awor abo, yu di hende, bira bo kara kontra e yu muhenan di bo pueblo ku ta profetisa for di nan mes kurason. Profetisa kontra nan,

¹⁸i bisa: 'Asina Senor DIOS ta bisa: "Ai di e muhenan ku ta kose banchi magiko na tur pols i ku ta traha velo pa kabes di hende di diferente estatura, pa yag riba bidanan! Boso lo yag riba e bidanan di Mi pueblo, ma preserva e bidanan di otronan pa boso mes?

¹⁹I pa mannan yen di puspas i pida-pida pan boso a profanaMi meimei di Mi pueblo, pa mata algun ku no mester a muri i pa tene otronan na bida ku no mester a biba, dor di gana Mi pueblo ku ta skucha mentira.

²⁰Pesei, asina Senor DIOS ta bisa: "Mira, Mi ta kontra boso banchinan magiko ku boso ta yag riba bidanan kune, manera ta yag riba parha. Lo Mi ranka nan for di boso brasa, i lo Mi pone e bidanan den libertat, si, esnan ku boso ta yag riba nan manera parha.

²¹Tambe lo Mi sker boso velonan kit'afo i libra Mi pueblo for di boso man, i nan lo no ta den boso man mas pa boso yag riba nan. I boso lo sa ku Ami ta SENOR.

²²Pasobra boso a deskurasha kurason di e hustu ku mentira, mientras ku Ami no a kous'e tristesa, i pasobra boso a enkurasha e malbado pa no bira for di su mal kaminda i preserva su bida,

²³pesei boso, muhenan, lo no mira vishon bano mas, ni praktika adivinashon. I lo Mi libra Mi pueblo for di boso man. Asina boso lo sa ku Ami ta SENOR."