Read Papantla Totonac Ezekiel 16 Bible Online

Ezekiel 16 - Papantla Totonac bible

Ezekiel 16

¹Atrobe e palabra di SENOR a yega na mi, bisando:

²"Yu di hende, hasi Jerusalem konose su abominashonnan,

³i bisa: 'Asina Senor DIOS ta bisa Jerusalem: "Bo origen i bo nasementu ta di tera di Kanaan. Bo tata tabata un amoreo i bo mama un heteo.

⁴Enkuanto bo nasementu: riba e dia ku bo a nase bo kabuya di lombrishi no a wordu korta, ni bo no a wordu laba ku awa pa limpiabo, ni bo no a wordu frega ku salu, ni lora den pana.

⁵Ningun wowo no a wak bo ku duele pa hasi un di e kosnan aki pa bo, pa tin kompashon ku bo. Mas bien bo a wordu tira afo den kunuku habri, pasobra riba e dia ku bo a nase bo a wordu despresia.

⁶"I ora Mi a pasa banda di bo i a mirabo ta sapatia den bo sanger, Mi a bisabo, mientras ku bo tabata drumi den bo sanger: 'Biba!' Si, mi a bisabo, mientras ku bo tabata drumi den bo sanger: 'Biba!'

⁷Mi a hasibo multiplika manera mata di kunuku. Anto bo a krese bira grandi i a yega na edat di bisti prenda bunita. Bo pechunan a hana forma i bo kabei a krese; tog bo tabata sunu i sin nada bisti.

⁸"Anto Mi a pasa banda di bo i a mirabo, i mira, tempu di amor a yega pa bo; asina Mi a habri Mi mantel ofer di bo i a tapa bo sunu. Tambe Mi a hasi un huramentu na bo i a sera un aliansa ku bo, asina bo a bira di Mi," Senor DIOS ta deklara.

⁹"E ora ei Mi a banabo ku awa, a laba kita bo sanger for di bo kurpa i a ungibo ku zeta.

¹⁰Tambe Mi a bistibo pana borda i a pone sandalia di kueru di dolfein na bo pia; i Mi a fahabo ku lino fini i a lorabo den seda.

¹¹Mi a dornabo ku prenda i a pone armbant na bo brasanan i un kadena na bo garganta.

¹²Tambe Mi a pone un renchi na bo nanishi i renchi na bo orea i un korona bunita riba bo kabes.

¹³Asina bo a keda tur dorna ku oro i plata. I bo bisti tabata di lino fini, di seda i di pana borda. Bo tabata kome harina fini, miel i zeta. Asina bo tabata sumamente bunita i a progresa, te ku bo a bira reina.

¹⁴I bo fama a plama meimei di e nashonnan pa kousa di bo bunitesa, pasobra esei tabata perfekto pa motibu di Mi splendor ku Mi a pone riba bo," Senor DIOS ta deklara.

¹⁵"Ma bo a konfia den bo bunitesa i a uza bo fama pa bira prostituta. Bo a drama bo fabornan riba tur ku a pasa eibanda, riba ken ku tabata kier.

¹⁶Bo a kohe algun di bo bistinan, a traha pa bo mes luganan haltu di diferente kolo, i a sigui komete bo prostitushon riba nan. Kosnan asina no mester a sosode nunka, ni lo no sosode mas.

¹⁷Tambe bo a kohe bo hoyanan bunita ku Mi a dunabo, i ku ta traha di Mi oro i di Mi plata, i a traha imagennan di hende homber pa bo mes, i bo a komete prostitushon ku nan.

¹⁸I bo a kohe bo pana borda i a tapa nan kune i a ofrese Mi zeta i Mi sensia nan dilanti.

¹⁹Tambe Mi pan ku Mi a dunabo--harina fini, zeta i miel, ku Mi a alimentabo kune--bo tabata ofrese nan dilanti komo un holo dushi. Asina a sosode," Senor DIOS ta deklara.

²⁰"Ademas, bo a kohe bo yu hombernan i bo yu muhenan ku bo a hana pa Mi, i bo a sakrifika nan komo kuminda na e ldolonan. Akaso bo prostitushon no tabata basta?

²¹Bo a mata Mi yunan i a ofrese nan na ldolonan dor di hasi nan pasa dor di kandela.

²²I ku tur bo abominashonnan i bo prostitushon bo no a korda e dianan di bo hubentut, tempu ku bo tabata sunu i sin nada bisti i tabata sapatia den bo sanger.

²³"('Ai, ai di bo!' Senor DIOS ta deklara.) Ademas di tur bo maldat,

²⁴bo a konstrui pa bo mes un pedestal i a traha pa bo mes un luga haltu riba tur plenchi.

²⁵Na kuminsamentu di tur kaya bo a traha pa bo mes un luga haltu i a hasi bo bunitesa abominabel; i bo a habri bo pia pa tur ku a pasa eibanda, pa multiplika bo echonan di prostitushon.

²⁶Tambe bo a komete prostitushon ku e egipsionan, bo bisinanan yen di pashon, i a multiplika bo echonan di prostitushon, pa probokaMi na rabia.

²⁷At'awor, Mi a ekstende Mi man kontra bo i a redusi bo porshon. I Mi a entregabo na deseo di esnan ku ta odiabo, e yu muhenan di e filisteonan, kendenan tin berguensa di bo kondukta skandaloso.

²⁸Ademas, bo a komete prostitushon ku e asirionan, pasobra bo no a keda satisfecho, i bo a komete prostitushon ku nan i tog bo no a keda satisfecho.

²⁹Tambe bo a multiplika bo echonan di prostitushon ku e tera di komersiantenan, Kaldea; tog ku esaki tampoko bo no a keda satisfecho.

³⁰"Esta inkonstante bo kurason ta," Senor DIOS ta deklara, "ku bo ta hasi tur e kosnan aki, echonan di un prostituta ku no tin kunes!

³¹Ora bo a konstrui bo pedestal na kuminsamentu di tur kaya i a traha bo luga haltu riba tur plenchi, tog bo no tabata manera prostituta, pasobra bo tabata menospresia plaka.

³²"Mas bien bo ta manera un esposa adultera ku ta risibi stranhero na luga di su esposo!

³³Na tur prostituta homber ta duna regalo, ma abo ta duna bo regalonan na tur bo amantenan, pagando nan pa bin serka bo for di tur parti, pa bin komete fornikashon ku bo.

³⁴Asina den bo prostitushon bo ta kontrario na e otro muhenan ei, pa motibu ku ni un no ta prostituta manera abo; pasobra abo ta duna plaka, ma abo si no ta risibi nada di plaka. Asina abo ta diferente."

³⁵Pesei, O prostituta, tende e palabra di SENOR.

³⁶Asina Senor DIOS ta bisa: "Pasobra bo luhuria i bo sunu a wordu eksponi pa medio di bo prostitushon ku bo amantenan i ku tur bo ldolonan repugnante, i pa motibu di e sanger di bo yu hombernan ku bo a duna na ldolonan,

³⁷pesei, mira, Mi ta bai trese tur bo amantenan huntu, ku kendenan bo tabatin plaser, tur esnan ku bo a stima i tur esnan ku bo a odia. Asina lo Mi reuni nan kontra bo for di tur parti i ekspone bo sunu na nan, asina ku nan lo mira tur bo sunu.

³⁸Asina lo Mi huzgabo manera ta huzga muhenan ku ta komete adulterio of ku ta drama sanger. Lo Mi trese riba bo e sanger di furia i yalursheit.

³⁹Tambe lo Mi entregabo den man di bo amantenan, i nan lo basha bo pedestalnan abou i tumba bo luganan haltu; nan lo kita bo pananan for di bo kurpa, kita bo hoyanan bunita i lagabo sunu i sin nada bisti.

⁴⁰Nan lo pone un multitut lanta kontra bo, i nan lo piedrabo i kap bo na pida-pida ku nan spada.

⁴¹Nan lo kima bo kasnan ku kandela i ehekuta huisio riba bo den bista di hopi muhe. E ora ei lo Mi pone un fin na bo prostitushon i lo bo no paga bo amantenan mas tampoko.

⁴²Asina lo Mi kalma Mi furia kontra bo i Mi yalursheit lo kita for di bo, i lo Mi trankilisa i no rabia mas.

⁴³"Pasobra bo no a korda e dianan di bo hubentut, ma a probokaMi na rabia ku tur e kosnan aki, mira, Ami tambe lo trese bo kondukta riba bo mes kabes," Senor DIOS ta deklara, "pa bo no komete e luhuria aki, ademas di tur bo otro abominashonnan.

⁴⁴"Mira, tur ku ta sita proverbio lo sita e proverbio aki tokante di bo: Manera e mama ta, asina e yu muhe tambe ta.'

⁴⁵Bo ta yu muhe di bo mama, kende tabatin asko di su esposo i su yunan. Tambe bo ta ruman muhe di bo ruman muhenan, kendenan tabatin asko di nan esposo i nan yunan. Boso mama tabata un heteo i boso tata un amoreo.

⁴⁶Bo ruman muhe mas grandi ta Samaria, kende ta biba panort di bo, huntu ku su yu muhenan. I bo ruman muhe mas chikitu, kende ta biba pasuit di bo, ta Sodoma ku su yu muhenan.

⁴⁷Tog, no solamente bo a kana den nan kamindanan i a hasi konforme nan abominashonnan, ma komo si fuera esei no tabata basta, bo tabata mas korumpi ku nan den henter bo kondukta.

⁴⁸Manera Mi ta biba," Senor DIOS ta deklara, "bo ruman muhe Sodoma i su yu muhenan no a hasi manera abo i bo yu muhenan a hasi.

⁴⁹"Mira, esaki tabata e kulpa di bo ruman muhe Sodoma: e ku su yu muhenan tabatin orguyo, kuminda na abundansia i bon bida sin ningun preokupashon, ma e no tabata yuda hende pober i esun den nesesidat.

⁵⁰Asina nan tabata arogante i nan tabata komete abominashonnan Mi dilanti. Pesei Mi a deshasi di nan, ora Mi a mira esei.

⁵¹Ademas, Samaria no a komete ni mitar di e pikanan ku abo a komete. Bo a multiplika bo abominashonnan mas ku nan. Asina abo a hasi bo ruman muhenan parse hustu dor di tur e abominashonnan ku abo a komete.

⁵²Abo ku a huzga bo ruman muhenan, karga bo mes berguensa tambe. Pasobra e pikanan ku abo a komete tabata mas abominabel ku esnan di nan; nan ta mas hustu ku bo. Si, tene berguensa tambe i karga bo mes berguensa, pasobra abo a hasi bo ruman muhenan parse hustu.

⁵³"Sinembargo, lo Mi trese nan bek for di nan koutiverio, e koutiverio di Sodoma ku su yu muhenan, e koutiverio di Samaria ku su yu muhenan, i huntu ku nan bo mes koutiverio,

⁵⁴pa bo karga bo umiyashon i sinti berguensa pa tur loke bo a hasi ora bo bira un konsuelo pa nan.

⁵⁵I bo ruman muhenan, Sodoma ku su yu muhenan i Samaria ku su yu muhenan, lo bolbe na nan estado di antes, i abo ku bo yu muhenan tambe lo bolbe na boso estado di antes.

⁵⁶Meskos ku bo boka no a menshona nomber di bo ruman muhe Sodoma den e dia di bo orguyo,

⁵⁷prome ku bo maldat a wordu tresi na kla, asina abo a bira un reproche pa e yu muhenan di Siria i pa tur su bisinanan, pa e yu muhenan di e filisteonan--esnan ront di bo ku ta despresiabo.

⁵⁸Bo a karga e kastigu di bo luhuria i di bo abominashonnan," SENOR ta deklara.

⁵⁹Pasobra asina Senor DIOS ta bisa: "Ami tambe lo hasi ku bo manera abo a hasi, abo ku a despresia e huramentu dor di kibra e aliansa.

⁶⁰Sinembargo, lo Mi korda Mi aliansa ku Mi a sera ku bo den e dianan di bo hubentut, i lo Mi stablese un aliansa eterno ku bo.

⁶¹E ora ei lo bo korda bo kondukta i lo bo tin berguensa, ora bo risibi bo ruman muhenan, tantu esnan mas grandi komo esnan mas chikitu. Lo Mi dunabo nan komo yu muhe, ma no pa motibu di bo aliansa.

⁶²I lo Mi sera Mi aliansa ku bo, i abo lo sa ku Ami ta SENOR,

⁶³pa bo korda i sinti berguensa i nunka mas habri bo boka pa motibu di bo umiyashon, ora Mi pordonabo tur loke bo a hasi," Senor DIOS ta deklara.