Read Papantla Totonac Ezekiel 17 Bible Online

Ezekiel 17 - Papantla Totonac bible

Ezekiel 17

¹Awor e palabra di SENOR a yega na mi, bisando:

²"Yu di hende, duna un charada i konta e kas di Israel un parabola,

³i bisa: 'Asina Senor DIOS ta bisa: "Un aguila grandi, ku hala fuerte i hanchu i yen di pluma di diferente kolo, a bin Libano, i a kita top di e palu di seda bai kune.

⁴El a ranka su takinan nobo di mas ariba i a hiba eseinan na un tera di komersiante; el a pone nan den un stat di negoshante.

⁵"Tambe el a kohe simia di e tera i a planta esaki den tera fertil. El a plant'e kantu di awanan abundante; el a plant'e manera un palu ku ta krese kantu di awa.

⁶I esei a spreit krese bira un mata di wendruif di poko haltura, ma ku a rama bira hanchu ku su ramanan bira den direkshon di e aguila, ma su raisnan a keda bou di dje. Asina el a bira un mata di wendruif ku a spreit i a saka rama.

⁷"Ma tabatin un otro aguila grandi ku hala fuerte i ku hopi pluma. I mira, e mata di wendruif aki a manda su raisnan den su direkshon i a ekstende su ramanan for di e luga kaminda e tabata planta, den su direkshon, pa e dun'e awa.

⁸E tabata planta den bon tera kantu di awanan abundante, asina ku e por a produsi rama, karga fruta i bira un mata di wendruif masha bunita mes."'

⁹"Bisa nan: 'Asina Senor DIOS ta bisa: "Lo e prospera? E aguila lo no ranka su raisnan i kita su frutanan, asina ku e ta marchita--asina ku tur su blachinan nobo ta marchita? I no tin mester di brasa fuerte ni hopi hende pa rank'e kita for di su raisnan.

¹⁰Mira, maske e ta planta, lo e prospera? Lo e no marchita kompletamente asina ku bientu di pariba supla pasa riba dje. E lo marchita na e luga kaminda el a krese?

¹¹E ora ei e palabra di SENOR a yega na mi, bisando:

¹²"Awor bisa e kas rebelde: 'Boso no sa kiko e kosnan aki ta nifika?' Bisa nan: 'Mira, rei di Babilonia a bin Jerusalem, a kohe su rei i prensnan i a hiba nan Babilonia huntu kune.

¹³I el a kohe un miembro di e famia real, i a sera un aliansa kune dor di pon'e bou di huramentu. Tambe el a bai ku e poderosonan di e tera,

¹⁴pa e reino keda someti i no halsa su mes, i keda eksisti solamente dor di warda e aliansa.

¹⁵Ma e rei a rebeldia kontra dje dor di manda su mensaheronan Egipto, pa nan dun'e kabai i hopi hende. Lo e logra? Esun ku hasi kosnan asina lo skapa? E por kibra e aliansa i tog skapa?

¹⁶'Manera Mi ta biba,' Senor DIOS ta deklara: 'Siguramente na tera di e rei ku a pon'e riba trono, kende su huramentu el a despresia i kende su aliansa el a kibra, serka dje na Babilonia e lo muri.

¹⁷Farao ku su ehersito poderoso i su kantidat grandi di hende lo no yud'e den guera, ora nan lanta baluarte i traha muraya-di-atake pa destrui hopi bida.

¹⁸El a despresia e huramentu dor di kibra e aliansa. I mira, el a duna su man den un promesa i tog el a hasi tur e kosnan aki; e lo no skapa.'"

¹⁹Pesei, asina Senor DIOS ta bisa: "Manera Mi ta biba, siguramente lo Mi trese riba su kabes Mi huramentu ku el a despresia i Mi aliansa ku el a kibra.

²⁰Lo Mi habri Mi reda ofer di dje, i e lo wordu kohl den Mi trampa. E ora ei lo Mi hib'e Babilonia i ayanan lo Mi bin pa huzgu'e pa su transgreshon ku el a komete kontra Mi.

²¹I tur su hombernan skohi di tur su trupanan lo kai pa medio di spada, i esnan ku sobrebibi lo keda plama den tur direkshon di bientu. E ora ei boso lo sa ku Ami, SENOR, a papia."

²²Asina Senor DIOS ta bisa: "Tambe lo Mi kohe un taki for di e top haltu di e palu di seda i plant'e. For di e takinan nobo di mas haltu lo Mi ranka un ku a kaba di spreit, i lo Mi plant'e riba un seru haltu i eleva.

²³Riba e seru haltu di Israel lo Mi plant'e, pa e produsi taki i karga fruta i bira un palu di seda mahestuoso. Parha di tur sorto lo biba bou di dje. Nan lo biba den e sombra di su ramanan.

²⁴I tur palu di kunuku lo sa ku Ami ta SENOR. Mi ta rebaha e palu haltu, halsa e palu kortiku, hasi e palu berde bira seku, i hasi e palu seku florese. "Ami ta SENOR; Mi a papia i lo Mi hasie."