Read Papantla Totonac Ezekiel 18 Bible Online

Ezekiel 18 - Papantla Totonac bible

Ezekiel 18

¹E ora ei e palabra di SENOR a yega na mi, bisando:

²"Kiko boso kier men ora boso ta sita e proverbio aki tokante di tera di Israel: 'E tatanan ta kome druif zur, ma djente di e yunan ta kohe rel'?

³"Manera Mi ta biba," Senor DIOS ta deklara, "siguramente boso lo no sita e proverbio aki mas na Israel.

⁴Mira, tur alma ta di Mi; tantu alma di e tata komo alma di e yu ta di Mi. E alma ku peka lo muri.

⁵"Ma si un hende ta hustu i ta praktika huisio i hustisia,

⁶i no ta kome riba e serunan, ni ta hisa kara wak e idolonan di e kas di Israel, ni ta desonra esposa di su prohimo, ni ta aserka un muhe durante di su periodo di menstruashon--

⁷si un hende no ta oprimi ningun otro hende, ma ta debolbe e debedo su garantia ku el a duna, no ta komete ladronisia, ma ta duna su pan na esnan ku tin hamber i ta kubri esun ku ta sunu ku pana,

⁸si e no ta duna fiansa ku interes ni ta asepta mal ganashi, si e ta warda su man pa e no hasi inikidat i ta ehekuta huisio berdadero entre homber ku homber,

⁹si e ta kana den Mi statutonan i Mi ordenansanan ku fieldat-- un hende asina ta hustu; e lo biba sigur," Senor DIOS ta deklara.

¹⁰"Ma si e hana un yu homber violento ku ta drama sanger i ku ta hasi kualke di e kosnan aki ku un ruman--

¹¹ounke ku e mes no ta hasi ningun di e kosnan aki--esta, "ta kome riba e serunan i ta desonra esposa di su prohimo,

¹²ta oprimi hende pober i esun den nesesidat, ta komete ladronisia i no ta debolbe garantia, ma ta hisa kara wak e idolonan i ta komete abominashon,

¹³ta duna fiansa ku interes i ta asepta mal ganashi-- lo e biba? E lo no biba! El a komete tur e abominashonnan aki. E lo wordu mata sigur; su sanger lo ta riba su mes kabes.

¹⁴"At'awor, e yu homber aki tin un yu homber ku a mira tur e pikanan ku su tata a komete; i mirando esakinan, tog e no ta hasi meskos.

¹⁵"E no ta kome riba e serunan, ni ta hisa kara wak e idolonan di e kas di Israel, ni ta desonra esposa di su prohimo,

¹⁶ni ta oprimi ningun hende, ni ta keda ku garantia, ni ta komete ladronisia, ma ta duna su pan na esun ku tin hamber i ta kubri esun ku ta sunu ku pana.

¹⁷E no ta hasi dano na hende pober, no ta tuma interes ni mal ganashi, ma ta ehekuta Mi ordenansanan i ta kana den Mi statutonan. E lo no muri pa inikidat di su tata. E lo biba sigur.

¹⁸I su tata, pasobra el a oprimi kruelmente, a horta su ruman i a hasi meimei di su pueblo loke no tabata bon, mira, esei lo muri pa motibu di su inikidat.

¹⁹"Tog boso ta puntra: 'Pakiko yu homber no ta karga e kastigu pa e inikidat di su tata?' Komo ku e yu homber a praktika huisio i hustisia, i a warda tur Mi statutonan i a kumpli ku nan, e lo biba sigur.

²⁰E persona ku peka lo muri. E yu homber lo no karga kastigu pa e inikidat di e tata, ni e tata lo no karga kastigu pa e inikidat di e yu homber. Hustisia di e hustu lo ta riba e mes, i maldat di e malbado lo ta riba e mes.

²¹"Ma si e malbado bira for di tur su pikanan ku el a komete i warda tur Mi statutonan i praktika huisio i hustisia, e lo biba sigur; e lo no muri.

²²Ningun di su transgreshonnan ku el a komete lo no wordu rekorda kontra dje. Pa motibu di su hustisia ku el a praktika, e lo biba.

²³Akaso Mi tin plaser den morto di e malbado," Senor DIOS ta puntra, "of mas bien ku e lo bira for di su kamindanan i biba?

²⁴"Ma ora ku un hende hustu bira for di su hustisia, komete inikidat i hasi konforme tur e abominashonnan ku e malbado ta hasi, lo e biba? Ningun di su echonan di hustisia ku el a hasi lo no wordu rekorda; pa motibu di su transgreshon ku el a komete i pa motibu di su pika ku el a komete, pa eseinan e lo muri.

²⁵"Tog boso ta bisa: 'E kaminda di Senor no ta rekto.' Tende awor, O kas di Israel! Ta Mi kaminda no ta rekto? No ta mas bien ku ta esnan di boso no ta rekto?

²⁶Ora ku un hende hustu bira for di su hustisia, komete inikidat, i muri pa motibu di esei, e ora ei ta pa su inikidat ku el a komete e lo muri.

²⁷Ma ora ku un malbado bira for di su maldat ku el a komete i praktika huisio i hustisia, e lo salba su bida.

²⁸Komo ku el a konsidera i a bira for di tur su transgreshonnan ku el a komete, e lo biba sigur; e lo no muri.

²⁹Ma e kas di Israel ta bisa: 'E kaminda di Senor no ta rekto.' Ta Mi kamindanan no ta rekto, O kas di Israel? No ta mas bien ku ta esnan di boso no ta rekto?

³⁰"Pesei, O kas di Israel, lo Mi huzga boso, kada un segun su kondukta," Senor DIOS ta deklara. "Repenti i bira for di tur boso transgreshonnan, pa inikidat no bira un piedra-di-trompeka pa boso.

³¹Tira tur boso transgreshonnan ku boso a komete for di boso, i perkura pa boso hana un kurason nobo i un spiritu nobo! Pasobra pakiko boso kier muri, O kas di Israel?

³²Pasobra Mi no tin plaser den morto di ningun hende ku muri," Senor DIOS ta deklara. "Asina anto, repenti i biba."