Read Papantla Totonac Ezekiel 20 Bible Online

Ezekiel 20 - Papantla Totonac bible

Ezekiel 20

¹Awor a sosode ku den e di shete ana, riba e di dies dia di e di sinku luna, algun di e ansianonan di Israel a bin pa konsulta ku SENOR, i a kai sinta mi dilanti.

²I e palabra di SENOR a yega na mi, bisando:

³"Yu di hende, papia ku e ansianonan di Israel, i bisa nan: 'Asina Senor DIOS ta bisa: "Ta pa konsulta ku Mi boso ta bin? Manera Mi ta biba," Senor DIOS ta deklara, "lo Mi no laga boso konsulta ku Mi."'

⁴"Bo kier huzga nan? Bo kier huzga nan, yu di hende? Hasi nan konose e abominashonnan di nan tatanan,

⁵i bisa nan: 'Asina Senor DIOS ta bisa: "Riba e dia ku Mi a skohe Israel i a hasi un huramentu na e desendientenan di e kas di Jakob i a revela Mi mes na nan na tera di Egipto, dia ku Mi a hasi un huramentu na nan, bisando: Ami ta SENOR boso Dios,

⁶riba e dia ei Mi a hasi un huramentu na nan pa saka nan for di tera di Egipto hiba na un tera ku Mi a skohe pa nan, ku tin lechi i miel na abundansia, ku ta e gloria di tur tera.

⁷I Mi a bisa nan: 'Kada un di boso deshasi di e kosnan repugnante ku su wowo ta gusta mira, i no kontamina boso mes ku e idolonan di Egipto; Ami ta SENOR boso Dios.'

⁸"Ma nan a rebeldia kontra Mi i no tabata kier a skucha na Mi. Nan no a deshasi di e kosnan repugnante ku nan wowo ta gusta mira, ni nan no a bandona e idolonan di Egipto. E ora ei Mi a disidi di drama Mi furia riba nan, pa kumpli ku Mi rabia kontra nan meimei di tera di Egipto.

⁹Ma Mi a aktua pa kousa di Mi nomber, pa esaki no wordu profana den bista di e nashonnan meimei di kendenan nan tabata biba, dilanti di kendenan Mi a hasi Mi mes konosi na nan dor di saka nan for di tera di Egipto.

¹⁰Pesei Mi a saka nan for di tera di Egipto i a hiba nan den desierto.

¹¹I Mi a duna nan Mi statutonan i a hasi nan konose Mi ordenansanan, pa medio di kualnan e hende ku kumpli ku nan lo biba.

¹²Tambe Mi a duna nan Mi sabatnan komo un senal entre Ami i nan, pa nan por sa ku Ami ta SENOR, Kende ta santifika nan.

¹³"Ma e kas di Israel a rebeldia kontra Mi den desierto. Nan no a kana den Mi statutonan i nan a rechasa Mi ordenansanan, pa medio di kualnan e hende ku kumpli ku nan lo biba. I nan a profana Mi sabatnan masha hopi mes. Pesei Mi a disidi di drama Mi furia riba nan den desierto, pa kaba ku nan.

¹⁴Ma Mi a aktua pa kousa di Mi nomber, pa esaki no wordu profana den bista di e nashonnan, dilanti di kendenan Mi a saka nan afo.

¹⁵Tambe Mi a hasi un huramentu na nan den desierto, ku lo Mi no hiba nan na e tera ku Mi a duna nan, ku tin lechi i miel na abundansia, ku ta e gloria di tur tera,

¹⁶pasobra nan a rechasa Mi ordenansanan, i pa loke ta Mi statutonan, nan no a kana segun nan; asta nan a profana Mi sabatnan, pasobra ketu bai nan kurason tabata dedika na nan idolonan.

¹⁷Tog Mi wowo a wak nan ku duele i Mi no a destrui nan, ni Mi no a kaba ku nan den desierto.

¹⁸I den desierto Mi a bisa nan yunan: 'No kana segun e statutonan di boso tatanan, ni warda nan ordenansanan, ni kontamina boso mes ku nan idolonan.

¹⁹Ami ta SENOR boso Dios; kana segun Mi statutonan i warda Mi ordenansanan i kumpli ku nan.

²⁰Santifika Mi sabatnan; i nan lo ta un senal entre Ami ku boso, pa boso por sa ku Ami ta SENOR boso Dios.'

²¹"Ma e yunan a rebeldia kontra Mi. Nan no a kana segun Mi statutonan, ni nan no a perkura di kumpli ku Mi ordenansanan, pa medio di kualnan e hende ku kumpli ku nan lo biba. Nan a profana Mi sabatnan. I Mi a disidi di drama Mi furia riba nan, pa kumpli ku Mi rabia kontra nan den desierto.

²²Ma Mi a wanta Mi man i Mi a aktua pa kousa di Mi nomber, pa esaki no wordu profana den bista di e nashonnan, dilanti di kendenan Mi a saka nan afo.

²³Tambe Mi a hasi huramentu na nan den desierto, ku lo Mi plama nan meimei di e nashonnan i benta nan p'aki p'aya den e paisnan,

²⁴pasobra nan no a kumpli ku Mi ordenansanan, ma a rechasa Mi statutonan i a profana Mi sabatnan, i nan wowo tabata fiha riba e idolonan di nan tatanan.

²⁵I tambe Mi a duna nan statutonan ku no tabata bon, i ordenansanan pa medio di kual nan no por a biba;

²⁶i Mi a kontamina nan ku nan mes regalonan--pasobra nan a hasi tur nan primogenitonan pasa dor di kandela--pa Mi por a hasi nan keda desola, pa nan por sa ku Ami ta SENOR."'

²⁷"Pesei, yu di hende, papia ku e kas di Israel, i bisa nan: 'Asina Senor DIOS ta bisa: "Den esaki tambe boso tatanan a blasfemaMi dor di komete transgreshon kontra Mi.

²⁸Tempu ku Mi a hiba nan den e tera ku Mi a hura di duna nan, nan a wak tur seru haltu i tur palu yen di blachi; i aya nan a ofrese nan sakrifisionan i aya nan a presenta e probokashon di nan ofrenda. Aya tambe nan a traha nan sensia di holo dushi i aya nan a basha nan ofrendanan di bibida.

²⁹Anto Mi a puntra nan: 'Kiko e luga haltu kaminda boso ta bai ei ta?' Pesei e luga ta wordu yama Bama te dia djawe."'

³⁰"Pesei, bisa e kas di Israel: 'Asina Senor DIOS ta bisa: "Boso kier kontamina boso mes meskos ku boso tatanan a hasi, i komete prostitushon ku nan kosnan repugnante?

³¹I ora boso ofrese boso regalonan, ora boso hasi boso yunan pasa dor di kandela, boso ta kontamina boso mes ku tur boso ldolonan te dia djawe. Anto lo Mi laga boso konsulta ku Mi, O kas di Israel? Manera Mi ta biba," Senor DIOS ta deklara, "lo Mi no laga boso konsulta ku Mi.

³²"I loke boso tin den mente lo no sosode, ora boso bisa: 'Nos kier ta meskos ku e nashonnan, meskos ku e tribunan di e paisnan ku ta sirbi palu i piedra.'

³³Manera Mi ta biba," Senor DIOS ta deklara, "siguramente ku un man poderoso i ku un brasa ekstendi i ku furia drama lo Mi reina riba boso.

³⁴Lo Mi saka boso for di e pueblonan i rekohe boso for di e paisnan kaminda boso a wordu plama ku un man poderoso i ku un brasa ekstendi i ku furia drama;

³⁵i lo Mi hiba boso den e desierto di e pueblonan, i ayanan lo Mi huzga boso kara-kara.

³⁶Meskos ku Mi a huzga boso tatanan den e desierto di tera di Egipto, asina lo Mi huzga boso," Senor DIOS ta deklara.

³⁷Lo Mi hasi boso pasa bou di e bara, i lo Mi hinka boso den e vinkulo di e aliansa;

³⁸i lo Mi aparta e rebeldenan for di boso i esnan ku a transgresa kontra Mi. Lo Mi saka nan for di e tera kaminda nan ta keda biba pa un tempu, ma nan lo no drenta tera di Israel. Asina boso lo sa ku Ami ta SENOR.

³⁹"Pa loke ta boso, O kas di Israel," asina Senor DIOS ta bisa, "kada un di boso bai sirbi su ldolonan! Ma despues boso lo skucha na Mi sigur i no profana Mi nomber santu mas ku boso regalonan i ku boso ldolonan.

⁴⁰Pasobra riba Mi seru santu, riba e seru haltu di Israel," Senor DIOS ta deklara, "ayanan henter e kas di Israel, nan tur, lo sirbiMi na e tera. Ayanan lo Mi asepta nan i ayanan lo Mi eksigi boso kontribushonnan i boso regalonan di mas miho, huntu ku tur boso kosnan santu.

⁴¹Lo Mi asepta boso manera un holo dushi, ora Mi saka boso for di e pueblonan i rekohe boso for di e paisnan kaminda boso a wordu plama; i lo Mi wordu santifika meimei di boso den bista di e nashonnan.

⁴²I boso lo sa ku Ami ta SENOR, ora Mi hiba boso na tera di Israel, na e tera ku Mi a hura di duna boso antepasadonan.

⁴³I ayanan boso lo korda riba boso kondukta i tur boso echonan ku kualnan boso a kontamina boso mes; i boso lo tin asko di boso mes den boso mes bista pa motibu di tur e echonan di maldat ku boso a hasi.

⁴⁴E ora ei boso lo sa ku Ami ta SENOR, ora ku Mi a trata ku boso pa kousa di Mi nomber, no segun boso mal kamindanan, ni segun boso echonan korupto, O kas di Israel," Senor DIOS ta deklara.'"

⁴⁵Awor e palabra di SENOR a yega na mi, bisando:

⁴⁶"Yu di hende, bira bo kara den direkshon di Teman i predika kontra e parti suit i profetisa kontra e mondi-sera di tera di Negev.

⁴⁷I bisa e mondi-sera di Negev: 'Tende e palabra di SENOR: asina Senor DIOS ta bisa: "Mira, Mi ta na punto di sende un kandela den bo, i esaki lo kima tur palu berde i tur palu seku den bo. E kandela feros lo no wordu paga, i e lo kima tur kara for di suit te nort.

⁴⁸I tur karni lo mira ku Ami, SENOR, a send'e; e lo no wordu paga.

⁴⁹E ora ei mi a bisa: "Ai, Senor DIOS! Nan ta bisa di mi: 'No ta parabola so e ta konta?'"