Read Papantla Totonac Ezekiel 22 Bible Online

Ezekiel 22 - Papantla Totonac bible

Ezekiel 22

¹E ora ei e palabra di SENOR a yega na mi, bisando:

²"I abo, yu di hende, ta huzga bo kier huzga? Bo kier huzga e stat dramado di sanger? Hasie konose tur su abominashonnan anto.

³I bo mester bisa: 'Asina Senor DIOS ta bisa: "E stat ta drama sanger meimei di su mes, asina ku su tempu lo yega; i e ta traha idolonan kontra su mes pa kontamina su mes!

⁴Bo a bira kulpabel dor di e sanger ku bo a drama, i bo a wordu kontamina dor di e idolonan ku bo a traha. Asina bo a trese bo dia serka i a yega na e fin di bo ananan. Pesei Mi a hasibo un reproche pa e nashonnan i un kos di bofon pa tur e teranan.

⁵Esnan ku ta serka i esnan ku ta leu di bo lo hasi bofon di bo, abo ku tin mal fama i ku ta yen di desordu.

⁶"Mira, e gobernantenan di Israel, kada un segun su poder, tabata den bo, ku e proposito di drama sanger.

⁷Den bo nan a trata tata i mama ku despresio; den bo nan a oprimi stranhero, i den bo nan a maltrata werfano i biuda.

⁸Bo a despresia Mi kosnan santu i a profana Mi sabatnan.

⁹Tabatin hombernan kalumniado den bo, ku e proposito di drama sanger; den bo nan a kome riba e serunan. Den bo nan a hasi kosnan perverso.

¹⁰Den bo nan ta deskubri sunu di nan tatanan; den bo nan ta viola muhenan durante di nan periodo di menstruashon, ora nan ta impuru.

¹¹I un homber ta komete abominashon ku esposa di su prohimo, i sin ningun berguensa un otro ta desonra esposa di su yu, i den bo un otro ta viola su ruman muhe, yu muhe di su mes tata.

¹²Den bo hende ta asepta plaka pasa bou di mesa pa drama sanger; bo ta eksigi interes i demasiado ganashi, i pa ganashi inhustu bo ta hasi dano na bo prohimo pa medio di violensia, i bo a lubidaMi," Senor DIOS ta deklara.

¹³"Mira, pesei Mi ta dal Mi mannan kontra otro pa motibu di e ganashi inhustu ku bo a atkiri, i pa e sanger ku ta wordu drama den bo.

¹⁴Bo kurason por soporta, of bo mannan lo ta fuerte riba e dia ku Mi ta bai trata ku bo? Ami, SENOR, a papia, i lo Mi hasie.

¹⁵Lo Mi plamabo meimei di e nashonnan i bentabo p'aki p'aya den tur e paisnan; i lo Mi kita tur bo impuresa for di bo i kaba kune.

¹⁶Lo bo profana bo mes den bista di e nashonnan, i lo bo sa ku Ami ta SENOR.

¹⁷I e palabra di SENOR a yega na mi, bisando:

¹⁸"Yu di hende, e kas di Israel a bira skuma pa Mi; nan tur ta brons, ten, heru i chumbu den fornu. Nan ta skuma di plata.

¹⁹Pesei, asina Senor DIOS ta bisa: 'Pasobra boso tur a bira skuma, pesei, mira, lo Mi trese boso huntu meimei di Jerusalem.

²⁰Manera ta trese plata, brons, heru, chumbu i ten huntu den fornu pa supla kandela riba dje pa hasie dirti, asina lo Mi trese boso huntu den Mi rabia i den Mi furia, i lo Mi pone boso einan i dirti boso.

²¹I lo Mi trese boso huntu i supla riba boso ku e kandela di Mi furia, i boso lo wordu dirti den dje.

²²Manera plata ta wordu dirti den fornu, asina boso lo wordu dirti den dje; i boso lo sa ku Ami, SENOR, a drama Mi furia riba boso.'"

²³I e palabra di SENOR a yega na mi, bisando:

²⁴"Yu di hende, bis'e: 'Abo ta un tera ku no ta wordu purifika, ni muha ku awaseru den e dia di indignashon.'

²⁵Tin un konspirashon di su profetanan den dje ku ta manera e grunamentu di un leon ku ta sker su proi. Nan a devora bidanan; nan a kohe tesoro i kosnan presioso; nan a hasi hopi muhe den dje bira biuda.

²⁶Su saserdotenan a viola Mi lei i a profana Mi kosnan santu; nan no a hasi distinshon entre kosnan santu i kosnan profano, i nan no a sina e diferensia entre loke ta impuru i loke ta puru. I nan a sera nan wowo pa Mi sabatnan, asina ku Mi ta wordu profana meimei di nan.

²⁷Su prensnan meimei di dje ta manera lobo ku ta sker nan proi; nan ta drama sanger i ta destrui bidanan pa hana ganashi inhustu.

²⁸I su profetanan ta pleister nan ku kalki, mirando vishon bano i adivinashon mentiroso pa nan, bisando: 'Asina Senor DIOS ta bisa,' mientras ku SENOR no a papia.

²⁹E hendenan di e tera a praktika opreshon i a komete ladronisia; nan a maltrata e pobernan i esnan den nesesidat i a oprimi e stranheronan dor di nenga di duna nan nan derecho.

³⁰"I Mi a buska un homber meimei di nan ku por a traha e muraya i para Mi dilanti den e kibra pa defende e tera, pa Mi no destruie; ma Mi no a hana ni un.

³¹Pesei Mi a drama Mi indignashon riba nan; Mi a kaba ku nan ku e kandela di Mi furia; Mi a trese riba nan mes kabes tur loke nan a hasi," Senor DIOS ta deklara.