Read Papantla Totonac Ezekiel 23 Bible Online

Ezekiel 23 - Papantla Totonac bible

Ezekiel 23

¹Atrobe e palabra di SENOR a yega na mi, bisando:

²"Yu di hende, tabatin dos muhe, yu muhenan di e mesun mama.

³Nan a bira prostituta na Egipto. Nan a duna nan mes komo prostituta den nan hubentut. Den e tera ei nan bus a wordu karisia i nan pechunan birgen a wordu primi.

⁴E mayo tabata yama Ahola, i su ruman muhe tabata yama Aholiba. Nan a bira di Mi, i nan a duna lus na yu hombernan i yu muhenan. I pa loke ta nan nomber: Samaria ta Ahola, i Jerusalem ta Aholiba.

⁵"Ahola a komete prostitushon, mientras ku e tabata di Mi; i e tabata loko-loko tras di su amantenan, tras di e asirionan, su bisinanan,

⁶kendenan tabata bisti na purpura, gobernantenan i ofisialnan, nan tur hobennan deseabel, hombernan ku tabata kore riba kabai.

⁷I el a duna su mes komo prostituta na nan, na tur esnan ku tabata e hombernan di mas miho di Asiria; i ku tur esnan ku e tabata loko-loko nan tras, ku tur nan idolonan el a kontamina su mes.

⁸E no a bandona su prostitushon ku el a kuminsa kune for di tempu di Egipto; pasobra den su hubentut hombernan tabata drumi kune, i nan tabata primi su pechunan birgen i drama nan pashon riba dje.

⁹"Pesei Mi a entregu'e den man di su amantenan, den man di e asirionan ku e tabata loko-loko nan tras.

¹⁰Nan a kit'e sunu; nan a kohe su yu hombernan i su yu muhenan bai kune, ma e mes nan a mata ku spada. Asina el a bira un refran entre muhenan, i nan a ehekuta huisio kontra dje.

¹¹"Awor su ruman muhe Aholiba a mira esaki; sinembargo, den su pashon e tabata mas korumpi ku su ruman muhe, i su prostitushon a bira pio ku e prostitushon di su ruman muhe.

¹²E tabata loko-loko tras di e asirionan, gobernantenan i ofisialnan, su bisinanan masha luhoso bisti, hombernan riba kabai, nan tur hobennan deseabel.

¹³I Mi a mira ku el a kontamina su mes; nan tur dos a kohe e mesun kaminda.

¹⁴"Si, el a oumenta su prostitushon. I el a mira hombernan pinta riba muraya, figuranan di kaldeonan, pinta kolo kora,

¹⁵ku faha mara na hep i ku tulban di hopi kolo mara na kabes; nan tur tabata parse ofisialnan, manera e hombernan di Babilonia na Kaldea, e tera di nan nasementu.

¹⁶Ora ku el a mira nan, el a bira loko-loko nan tras i a manda mensaheronan serka nan na Kaldea.

¹⁷I e hombernan di Babilonia a bin serka dje den e kama di amor, i ku nan pashon nan a kontamin'e. I despues ku el a wordu kontamina dor di nan, el a desgusta di nan.

¹⁸I el a praktika su prostitushon publikamente i a ekspone su sunu; e ora ei Mi a desgusta di dje, meskos ku Mi a desgusta di su ruman muhe.

¹⁹Sinembargo, el a multiplika su prostitushon, kordando e dianan di su hubentut, tempu ku e tabata prostituta na tera di Egipto.

²⁰I e tabata loko-loko tras di su amantenan, kende nan organonan genital tabata manera di buriku, i kende nan fluho tabata manera fluho di kabai.

²¹Asina bo tabata anhela na e luhuria di bo hubentut, tempu ku e egipsionan tabata primi bo pechunan, e pechunan di bo hubentut.

²²"Pesei, O Aholiba, asina Senor DIOS ta bisa: 'Mira, lo Mi hasi bo amantenan lanta kontra bo, esnan ku bo a bira lomba p'e, i lo Mi trese nan kontra bo for di tur banda:

²³esnan di Babilonia i tur e kaldeonan, Pekod, Soa i Koa, i tur e asirionan huntu ku nan; hobennan deseabel, gobernantenan i ofisialnan, nan tur komandantenan i hombernan di fama, nan tur riba kabai.

²⁴I nan lo bin kontra bo ku arma, garoshi i wagen, i ku un multitut di hende. Nan lo tuma posishon kontra bo for di tur banda, ku eskudo grandi i chikitu i ku helm. I lo Mi entregabo den nan man, i nan lo huzgabo segun nan kustumbernan.

²⁵Lo Mi lanta Mi yalursheit kontra bo, pa nan trata ku bo ku furia. Nan lo kita bo nanishi i bo oreanan afo; i bo sobrebibientenan lo kai pa medio di spada. Nan lo bai ku bo yu hombernan i ku bo yu muhenan, i bo sobrebibientenan lo wordu destrui pa medio di kandela.

²⁶Tambe nan lo kita bo pananan for di bo kurpa i bai ku bo bunita hoyanan.

²⁷Asina lo Mi pone un fin na bo luhuria i bo prostitushon tresi for di tera di Egipto, asina ku lo bo no hisa wowo wak nan ni korda Egipto mas.'

²⁸"Pasobra asina Senor DIOS ta bisa: 'Mira, lo Mi entregabo den man di esnan ku bo ta odia, den man di esnan ku bo a bira lomba p'e.

²⁹I nan lo trata ku bo ku odio i kohe tur bo propiedat. Nan lo lagabo sin nada bisti, tur sunu, i e berguensa di bo prostitushon lo keda bisto, tantu bo luhuria komo bo prostitushon.

³⁰E kosnan aki nan lo hasi ku bo, pasobra bo tabata loko-loko tras di e nashonnan, pasobra bo a kontamina bo mes ku nan idolonan.

³¹Bo a kana den e kaminda di bo ruman muhe; pesei lo Mi entrega su kopa den bo man.'

³²"Asina Senor DIOS ta bisa: 'Lo bo bebe e kopa di bo ruman muhe, un kopa hundu i hanchu. Nan lo haribo i hasi bofon di bo, pasobra e ta yen te na rant.

³³Lo bo ta yen di buracheria i tristesa, e kopa di horor i desolashon, e kopa di bo ruman muhe Samaria.

³⁴I lo bo beb'e te na e delaster gota; e ora ei lo bo kou su pida-pidanan i ranka bo pechunan kit'afo; pasobra Ami a papia,' Senor DIOS ta deklara.

³⁵"Pesei, asina Senor DIOS ta bisa: 'Pasobra bo a lubidaMi i a tiraMi tras di bo lomba, awor karga e kastigu di bo luhuria i bo prostitushon.'"

³⁶Ademas SENOR a bisami: "Yu di hende, bo kier huzga Ahola i Aholiba? Hasi nan rekonose nan abominashonnan anto.

³⁷Pasobra nan a komete adulterio i tin sanger na nan man. Asina nan a komete adulterio ku nan idolonan i asta nan yu hombernan, ku nan a hana pa Mi, nan a laga pasa dor di kandela komo kuminda pa nan idolonan.

³⁸Ademas, esaki tambe nan a hasi ku Mi: nan a kontamina Mi santuario riba e mesun dia i a profana Mi sabatnan.

³⁹Pasobra ora nan a mata nan yunan komo sakrifisio pa nan idolonan, nan a drenta den Mi santuario riba e mesun dia i a profan'e; asina nan a hasi den Mi kas.

⁴⁰"Ademas, nan asta a manda un mensahero buska hombernan ku a bin for di leu; i ata, nan a bin tambe i bo a bana bo kurpa pa nan, a pinta bo wowo i a dorna bo kurpa ku hoya.

⁴¹I bo a sinta riba un sofa luhoso, ku un mesa drecha dilanti di dje, riba kual bo a pone Mi sensia i Mi zeta.

⁴²"E boroto di un multitut ku no tin kuenta ku nada tabata ront di dje. Burachenan a wordu tresi for di den desierto, huntu ku hombernan masha bulgar. I nan a pone armbant na man di e muhenan i korona bunita riba nan kabes.

⁴³E ora ei Mi a bisa di esun ku adulterio a kaba kune: 'Nan lo komete adulterio kune, awor ku e t'asina?'

⁴⁴Tog nan a drumi kune manera ta drumi ku prostituta. Asina nan a drumi ku Ahola i Aholiba, e muhenan sin berguensa.

⁴⁵Ma hombernan hustu lo huzga nan, meskos ku ta huzga muhenan adultera i meskos ku ta huzga muhenan ku ta drama sanger, pasobra nan ta muhenan adultera i tin sanger na nan man.

⁴⁶"Pasobra asina Senor DIOS ta bisa: 'Trese un multitut kontra nan i entrega nan na teror i plunder.

⁴⁷I e multitut lo bati nan ku piedra i ku nan spada nan lo kaba ku nan. Nan lo mata nan yu hombernan i nan yu muhenan i lo sende nan kasnan na kandela.

⁴⁸'Asina ei lo Mi pone un fin na luhuria den e tera, pa tur muhe wordu spierta i no komete luhuria mas manera boso a hasi.

⁴⁹Boso lo sufri e kastigu di boso luhuria, i boso lo karga e konsekuensia di boso idolatria. Asina boso lo sa ku Ami ta Senor DIOS.'"