Read Papantla Totonac Ezekiel 25 Bible Online

Ezekiel 25 - Papantla Totonac bible

Ezekiel 25

¹I e palabra di SENOR a yega na mi, bisando:

²"Yu di hende, bira bo kara den direkshon di e yu hombernan di Amon, i profetisa kontra nan,

³i bisa e yu hombernan di Amon: 'Skucha e palabra di Senor DIOS! Asina Senor DIOS ta bisa: "Pasobra bo a bisa: 'Aha!' kontra Mi santuario tempu ku el a wordu profana, kontra tera di Israel tempu ku el a keda desola, i kontra kas di Juda tempu ku nan a wordu hiba den eksilio,

⁴pesei, mira, Mi ta bai entregabo na e pueblonan di oriente komo erensia. Nan lo kampa meimei di bo i nan lo arma nan tentnan meimei di bo. Nan lo kome bo frutanan i bebe bo lechi.

⁵Lo Mi hasi Raba bira un sabana pa kamel i Amon un luga pa tou di karne sosega. E ora ei boso lo sa ku Ami ta SENOR."

⁶Pasobra asina Senor DIOS ta bisa: "Pasobra bo a bati man i a bati pia abou i a gosa ku tur malisia di bo kurason kontra tera di Israel,

⁷pesei, mira, Mi a saka Mi man kontra bo i lo Mi entregabo na e nashonnan komo botin. Lo Mi kortabo kita for di meimei di e pueblonan i hasibo perese for di meimei di e teranan. Lo Mi destruibo. Asina lo bo sa ku Ami ta SENOR."

⁸'Asina Senor DIOS ta bisa: "Pasobra Moab i Seir ta bisa: 'Ata, kas di Juda ta meskos ku tur e nashonnan,'

⁹pesei, mira, Mi ta bai kita e statnan ku ta keda na e subida di Moab, e statnan ku ta keda na su fronteranan: Bet-jesimot, Baal-meon i Kiriataim, e gloria di e tera,

¹⁰i lo Mi duna Moab, huntu ku e yu hombernan di Amon, na e pueblonan di oriente komo erensia, asina ku e nashonnan lo no korda e yu hombernan di Amon mas.

¹¹Asina lo Mi ehekuta huisio riba Moab, i nan lo sa ku Ami ta SENOR."

¹²'Asina Senor DIOS ta bisa: "Pasobra Edom a aktua kontra kas di Juda dor di tuma vengansa, i a bira masha kulpabel, i a tuma vengansa riba nan,"

¹³pesei, asina Senor DIOS ta bisa: "Ami tambe lo saka Mi man kontra Edom i korta hende i bestia kita for di riba dje; lo Mi lagu'e keda desola! For di Teman te na Dedan nan lo kai pa medio di spada.

¹⁴Lo Mi pone Mi vengansa kontra Edom den man di Mi pueblo Israel. Pesei nan lo trata ku Edom segun Mi rabia i segun Mi furia. Asina nan lo konose Mi vengansa," Senor DIOS ta deklara.

¹⁵'Asina Senor DIOS ta bisa: "Pasobra e filisteonan a aktua ku vengansa i a tuma vengansa ku menospresio den nan kurason, pa destrui ku enemistat perpetuo,"

¹⁶pesei, asina Senor DIOS ta bisa: "Mira, Mi ta bai saka Mi man kontra e filisteonan, i lo Mi korta e sereteonan kit'afo, i destrui e restante ku ta keda na kosta di laman.

¹⁷Lo Mi ehekuta vengansa grandi kontra nan ku reprendementunan furioso. E ora ei nan lo sa ku Ami ta SENOR, ora Mi venga Mi mes riba nan.