Read Papantla Totonac Ezekiel 26 Bible Online

Ezekiel 26 - Papantla Totonac bible

Ezekiel 26

¹Awor a sosode den e di diesun ana, riba e prome dia di e luna, ku e palabra di SENOR a yega na mi, bisando:

²"Yu di hende, pasobra Tiro a bisa tokante di Jerusalem: 'Aha, e porta di e pueblonan a kibra; el a habri pa mi. Awor ku e ta na ruina, ami lo prospera,'

³pesei, asina Senor DIOS ta bisa: 'Mira, Mi ta kontra bo, O Tiro, i lo Mi trese hopi nashon kontra bo, manera laman ta hasi su olanan bai laira.

⁴Nan lo destrui e murayanan di Tiro i basha su torennan abou. Tambe lo Mi raspa kita asta su stof for di dje i hasie manera un baranka pelon.

⁵E lo bira un luga pa habri reda riba dje meimei di laman, pasobra Ami a papia,' Senor DIOS ta deklara, 'i e lo bira botin pa e nashonnan.

⁶I su yu muhenan den e sabananan lo wordu mata ku spada, i nan lo sa ku Ami ta SENOR.'"

⁷Pasobra, asina Senor DIOS ta bisa: "Mira, for di nort lo Mi trese Nabukodonosor, rei di Babilonia, rei di reinan, kontra Tiro, ku kabai, garoshi i koredonan di kabai i un gran ehersito.

⁸Ku spada e lo mata bo yu muhenan ku ta den e sabananan; e lo traha muraya-di-atake kontra bo, lanta baluarte kontra bo i hisa un eskudo grandi kontra bo.

⁹Kontra bo murayanan e lo dirigi e golpinan di su baranan-pa-kibra-muraya, i ku su hachanan e lo kibra bo torennan bash'abou.

¹⁰Pa motibu di e multitut di su kabainan, e stof ku nan lanta lo tapabo. Bo murayanan lo tembla di e boroto di e koredonan di kabai, wilnan i garoshinan, ora ku e drenta bo portanan, manera hombernan ta drenta un stat ku su murayanan a wordu kibra.

¹¹Ku huf di su kabainan e lo trapa tur bo kayanan. E lo mata bo pueblo ku spada, i bo pilarnan fuerte lo kai abou.

¹²Tambe nan lo horta bo rikesanan i plunder bo merkansia; nan lo kibra bo murayanan bash'abou i destrui bo kasnan luhoso i tira bo piedranan, bo balkinan i bo sushedat den laman.

¹³Asina lo Mi pone un fin na e zonidu di bo kantikanan, i e zonidu di bo arpanan lo no wordu tendi mas.

¹⁴Lo Mi hasibo un baranka pelon, i lo bo bira un luga pa habri reda riba dje. Nunka mas lo bo no wordu rekonstrui, pasobra Ami, SENOR, a papia," Senor DIOS ta deklara.

¹⁵Asina Senor DIOS ta bisa Tiro: "No t'asina ku e teranan na kosta lo tembla pa motibu di e zonidu di bo kaida, ora ku esnan herida keha, ora ku e matansa tuma luga meimei di bo?

¹⁶E ora ei tur e prensnan di laman lo baha for di nan trono, kita nan mantel i pone nan pananan borda un banda. Nan lo bisti nan mes ku temblamentu; i nan lo sinta abou na suela i tembla konstantemente, tur babuka pa bo motibu.

¹⁷I nan lo lanta un lamentashon tokante di bo i lo bisabo: 'Mira kon bo a perese, O stat konosi, pobla pa hende di laman! Bo tabata poderoso riba laman, abo i bo habitantenan; bo a pone bo teror riba tur su habitantenan!

¹⁸Awor e teranan na kosta lo tembla riba e dia di bo kaida; si, e teranan na kosta, ku ta keda kantu di laman, lo keda terorisa pa kousa di bo fin.'"

¹⁹Pasobra, asina Senor DIOS ta bisa: "Ora Mi hasibo un stat desola, manera e statnan ku no ta habita, ora Mi trese e profundidat di laman riba bo i e awanan grandi tapabo,

²⁰e ora ei lo Mi hasibo baha huntu ku esnan ku ta baha den pos, serka e hendenan di prome aya. Lo Mi hasibo biba den e partinan mas abou di tera, manera e luganan antiguo desola, huntu ku esnan ku ta baha den pos, asina ku lo bo no ta habita mas. Ma lo Mi pone gloria den e tera di e bibunan.

²¹Lo Mi trese teror riba bo i lo bo no t'ei mas. Maske hende buskabo, lo bo no wordu hana nunka mas," Senor DIOS ta deklara.