Read Papantla Totonac Ezekiel 27 Bible Online

Ezekiel 27 - Papantla Totonac bible

Ezekiel 27

¹Ademas, e palabra di SENOR a yega na mi, bisando:

²"Awor abo, yu di hende, lanta un lamentashon pa Tiro.

³Bisa Tiro, situa na porta di laman, e luga di hasi negoshi pa pueblonan di hopi tera na kosta: 'Asina Senor DIOS ta bisa: "O Tiro, bo a bisa: 'Mi ta perfekto den bunitesa.'

⁴Bo fronteranan ta den kurason di lamannan; esnan ku a konstruibo a perfekshona bo bunitesa.

⁵Nan a traha bo barkunan ku palu di pino for di Senir; nan a kohe un palu di seda di Libano pa traha master pa bo.

⁶Di palu di eik for di Basan nan a traha bo remanan; bo dek di palu di pino, for di e teranan na kosta di Kitim, nan a fura ku ivor.

⁷Bo bela tabata di Egipto, traha di lino fini borda, asina ku esaki a bira bo marka distingui; blou i purpura for di e teranan na kosta di Elisa tabata e lona ku a tapabo.

⁸E habitantenan di Sidon i Arvad tabata bo remadonan; bo hombernan sabi, O Tiro, tabata na bordo; nan tabata bo pilotonan.

⁹E ansianonan di Gebal i su hombernan sabi tabata huntu ku bo pa klafatia bo nachinan; tur barku di laman i nan matrosnan tabata huntu ku bo pa hasi negoshi ku bo.

¹⁰"Hombernan di Persia, Lut i Put tabata sirbi den bo ehersito komo bo hombernan di guera. Nan a kologa eskudo i helm den bo; nan a dunabo bo splendor.

¹¹E yunan di Arvad i bo ehersito tabata tur ront riba bo murayanan. I e gamadeonan tabata den bo torennan. Nan a kologa nan eskudo tur ront na bo murayanan; nan a perfekshona bo bunitesa.

¹²"Tarsis tabata bo kliente pa motibu di e abundansia di tur sorto di rikesa; ku plata, heru, ten i chumbu nan a paga pa bo produktonan.

¹³"Javan, Tubal i Mesek tabata negosha ku bo; ku bida di hende i artikulonan di brons nan tabata paga pa bo merkansia.

¹⁴"Esnan di Bet-togarma a kambia kabai i kabai di guera i mula pa bo produktonan.

¹⁵"E yunan di Dedan tabata negosha ku bo. Hopi tera na kosta tabata bo merkado. Nan tabata trese ivor i ebano komo pago pa bo.

¹⁶"Siria tabata bo kliente pa motibu di e abundansia di bo produktonan; nan tabata paga pa bo merkansia ku esmeralda, purpura, pana borda, lino fini, koral i rubi.

¹⁷"Juda i tera di Israel tabata negosha ku bo. Ku trigo di Minit i Panag, i miel, zeta i balsem nan tabata paga pa bo merkansia.

¹⁸"Damasko tabata bo kliente pa motibu di e abundansia di bo produktonan, pa motibu di e abundansia di tur sorto di rikesa, pa motibu di e bina di Helbon i lana blanku.

¹⁹"Dan i Javan tabata paga pa bo merkansia for di Uzal. Tabatin heru labra, palu di akasia i kana dushi entre bo merkansia.

²⁰"Dedan tabata bendebo pana bunita pa siya di kabai.

²¹"Arabia i tur e prensnan di Kedar tabata bo kliente. Nan tabata negosha ku bo ku lamchi, karne chubatu i kabritu chubatu. Ku esakinan nan tabata negosha ku bo.

²²"E komersiantenan di Saba i Rama tabata hasi negoshi ku bo. Nan tabata paga pa bo produktonan ku e miho di tur sorto di speserei, ku tur sorto di piedra presioso i ku oro.

²³"Haran, Kane, Eden, e komersiantenan di Saba, Asiria i Kilmad tabata negosha ku bo.

²⁴Nan tabata negosha ku bo ku bistinan presioso, ku tela kolo blou i borda, tapeit di hopi kolo, kordon bon lora den otro; ku esakinan nan tabata negosha ku bo.

²⁵"E barkunan di Tarsis tabata karga bo merkansia. I bo tabata yen i masha glorioso den kurason di e lamannan.

²⁶Bo remadonan a hibabo den awanan grandi; bientu di pariba a kibrabo den kurason di e lamannan.

²⁷Bo rikesa, bo produktonan, bo merkansia, bo matrosnan i bo pilotonan, bo klafatiadonan, bo komersiantenan, i tur bo hombernan di guera ku ta den bo, i henter bo tripulashon, lo senk den kurason di e lamannan, riba e dia di bo kaida.

²⁸Na zonidu di e sklamashon di bo pilotonan e sabananan lo sakudi.

²⁹I tur esnan ku tabata hala rema, e matrosnan i tur e pilotonan di laman lo bandona nan barku; nan lo baha na tera.

³⁰I nan lo halsa nan bos i yorabo, nan lo yora amargamente. Nan lo basha stof riba nan kabes, nan lo lora abou den shinishi.

³¹Tambe nan lo feita nan kabes pa bo motibu i faha nan mes ku pana di saku; nan lo yorabo ku angustia di nan alma-- ku lamentashon amargo.

³²I den nan klamor nan lo kuminsa un lamentashon pa bo i lamenta ofer di bo: 'Ken ta manera Tiro, manera esun ku ta ketu meimei di laman?

³³Tempu ku bo produktonan a wordu manda via laman, bo tabata satisfase hopi pueblo; ku e abundansia di bo rikesa i ku bo merkansia bo tabata hasi e reinan di tera bira riku.

³⁴Awor ku bo ta kibra dor di e lamannan den e profundidatnan di e awanan, bo merkansia i henter bo tripulashon a senk huntu ku bo.

³⁵Tur habitante di e teranan na kosta ta keda tur babuka pa bo motibu, i nan reinan ta morto spanta; nan kara ta tur trosi di miedu.

³⁶E komersiantenan entre e pueblonan ta fluit bo; bo a bira un horor, i lo bo no t'ei mas.