Read Papantla Totonac Ezekiel 28 Bible Online

Ezekiel 28 - Papantla Totonac bible

Ezekiel 28

¹Atrobe e palabra di SENOR a yega na mi, bisando:

²"Yu di hende, bisa e prens di Tiro: 'Asina Senor DIOS ta bisa: "Pasobra bo kurason ta halsa i bo a bisa: 'Ami ta un dios; mi ta sinta riba e asiento di diosnan, den kurason di e lamannan'; ma ta hende bo ta i no Dios, ounke bo ta pensa ku bo ta mes sabi ku Dios--

³mira, bo ta mas sabi ku Daniel; no tin sekreto skondi pa bo.

⁴Ku bo sabiduria i bo komprendementu bo a akumula rikesa pa bo mes; bo a akumula oro i plata pa bo luganan-di-warda-tesoro.

⁵Ku bo gran sabiduria den hasimentu di negoshi bo a oumenta bo rikesa, i pa motibu di bo rikesa bo kurason a bira orguyoso.

⁶"Pesei, asina Senor DIOS ta bisa: 'Pasobra bo a hasi bo kurason manera e kurason di Dios,

⁷pesei anto, lo Mi trese stranheronan kontra bo, esnan di mas kruel di e nashonnan. Nan lo saka nan spada kontra e bunitesa di bo sabiduria i profana bo splendor.

⁸"Nan lo hasibo baha den pos, i lo bo muri, manera esnan ku a wordu mata den kurason di e lamannan.

⁹'Ainda bo ta bisa den presensia di esun ku ta matabo: Ami ta un dios?" Bo ta hende i no Dios, den man di esnan ku ta heridabo.

¹⁰Lo bo muri manera esnan insirkumsida na man di stranheronan, pasobra Ami a papia,' Senor DIOS ta deklara."'"

¹¹Atrobe e palabra di SENOR a yega na mi, bisando:

¹²"Yu di hende, lanta un lamentashon pa rei di Tiro i bis'e: 'Asina Senor DIOS ta bisa: "Bo tabatin e seyo di perfekshon, yen di sabiduria i perfekto den bunitesa.

¹³Bo tabata na Eden, e hofi di Dios; bo tabata dorna ku tur sorto di piedra presioso: rubi, topasio i djamanta, berilo, oneks i yaspe, safiro, turkesa i esmeralda; i e obra di arte di bo monturanan i bo skarnirnan tabata di oro. Riba e dia ku bo a wordu krea, nan a wordu prepara.

¹⁴Bo tabata ungi komo e kerubin wardado, i Ami a ponebo einan. Bo tabata riba e seru santu di Dios; bo tabata kana meimei di e piedranan di kandela.

¹⁵Bo tabata perfekto den bo kamindanan for di e dia ku bo a wordu krea, te na e momento ku inhustisia a wordu hana den bo.

¹⁶Pa motibu di bo negoshamentu ekstenso bo a yena ku violensia, i bo a peka. Pesei Mi a tirabo for di e seru di Dios komo algu profano, i Mi a destruibo, O kerubin wardado, for di meimei di e piedranan di kandela.

¹⁷Bo kurason a bira orguyoso pa motibu di bo bunitesa; bo a korumpi bo sabiduria pa motibu di bo splendor. Mi a bentabo abou na suela; Mi a ponebo dilanti di reinan, pa nan mirabo.

¹⁸Ku e multitut di bo inikidatnan, den e inhustisia di bo negoshamentu, bo a profana bo santuarionan. Pesei Mi a laga kandela sali for di bo; esaki a kaba ku bo, i Mi a hasibo bira shinishi riba tera den bista di tur esnan ku ta mirabo.

¹⁹Tur ku konosebo entre e nashonnan ta keda tur babuka pa bo motibu; bo a bira un horor, i lo bo no t'ei mas.

²⁰I e palabra di SENOR a yega na mi, bisando:

²¹"Yu di hende, bira bo kara den direkshon di Sidon, profetisa kontra dje i bisa:

²²'Asina Senor DIOS ta bisa: "Mira, Mi ta kontra bo, O Sidon, i den bo lo Mi wordu glorifika. E ora ei nan lo sa ku Ami ta SENOR, ora Mi ehekuta huisio den dje i manifesta Mi santidat den dje.

²³Pasobra lo Mi manda pest riba dje i sanger den su kayanan. Esnan herida lo kai den dje pa medio di e spada ku ta kontra dje na tur banda; e ora ei nan lo sa ku Ami ta SENOR."

²⁴"I pa e kas di Israel lo no tin kadushi mas ku ta hinka, ni mata di sumpina ku ta hasi dolo, entre tur e hendenan ront di nan ku ta despresia nan; e ora ei nan lo sa ku Ami ta Senor DIOS."

²⁵'Asina Senor DIOS ta bisa: "Ora Mi rekohe e kas di Israel for di e nashonnan, meimei di kendenan nan ta plama, i Mi santifika Mi mes den nan den bista di e nashonnan, e ora ei nan lo biba den nan tera ku Mi a duna Mi sirbido Jakob.

²⁶Aya nan lo biba trankil; i nan lo traha kas, planta kunuku di wendruif i biba trankil, dia Mi ehekuta huisio kontra tur esnan ront di nan ku ta despresia nan. E ora ei nan lo sa ku Ami ta SENOR nan Dios.