Read Papantla Totonac Ezekiel 29 Bible Online

Ezekiel 29 - Papantla Totonac bible

Ezekiel 29

¹Den e di dies ana, den e di dies luna, riba e di diesdos dia di e luna, e palabra di SENOR a yega na mi, bisando:

²"Yu di hende, bira bo kara kontra Farao, rei di Egipto, i profetisa kontra dje i kontra henter Egipto.

³Papia i bisa: 'Asina Senor DIOS ta bisa: "Mira, Mi ta kontra bo, Farao, rei di Egipto, e monster grandi ku ta drumi meimei di su riunan, kende a bisa: 'Mi Neil ta di mi, i ta ami mes a trah'e.'

⁴I lo Mi pone anzue den bo kakumbein, i lo Mi hasi e piskanan di bo riunan pega na bo skamanan. Lo Mi sakabo for di bo riunan, i tur piska di bo riunan lo pega na bo skamanan.

⁵I lo Mi bandonabo den desierto, abo i tur piska di bo riunan; lo bo kai den e kunuku habri; lo bo no wordu tresi huntu, ni wordu rekohi. Mi a dunabo komo kuminda na e bestianan di tera i na e parhanan di laira.

⁶E ora ei tur habitante di Egipto lo sa ku Ami ta SENOR. "Nan tabata un bara di richi pa e kas di Israel.

⁷Ora nan a kohebo ku man, bo a kibra i a habri tur nan skouder; i ora nan a len riba bo, bo a kibra i a pone nan hep tembla."

⁸'Pesei, asina Senor DIOS ta bisa: "Mira, lo Mi trese un spada kontra bo i korta tantu hende komo bestia kita for di bo.

⁹I tera di Egipto lo bira un desolashon i un ruina. E ora ei nan lo sa ku Ami ta SENOR. "Pasobra bo a bisa: 'Neil ta di mi, i ta ami a trah'e,'

¹⁰pesei, mira, Mi ta kontra bo i kontra bo riunan, i lo Mi hasi tera di Egipto keda un ruina i un desolashon kompleto, for di Migdol te na Sevene i te na frontera di Etiopia.

¹¹Pia di hende lo no pasa den dje, i pata di bestia lo no pasa den dje. Kuarenta ana largu ningun hende lo no biba den dje.

¹²Asina lo Mi hasi tera di Egipto bira un desolashon meimei di paisnan desola. I su statnan, meimei di statnan ruina, lo keda desola pa kuarenta ana. I lo Mi plama e egipsionan entre e nashonnan i benta nan p'aki p'aya den e paisnan."

¹³'Pasobra asina Senor DIOS ta bisa: "Despues di kuarenta ana lo Mi rekohe e egipsionan for di e pueblonan kaminda nan a keda plama.

¹⁴I lo Mi trese esnan di Egipto, ku ta den koutiverio, bek, i pone nan bolbe na tera di Patros, na e tera di nan origen. I einan nan lo forma un reino umilde.

¹⁵E lo ta e reino di mas umilde i nunka mas e lo no halsa su mes riba e otro nashonnan. Anto lo Mi hasi nan asina chikitu ku nan lo no goberna e nashonnan mas.

¹⁶I nunka mas Egipto lo tin e konfiansa di e kas di Israel, ma e lo hasi nan korda nan inikidat di a akudi na dje. E ora ei nan lo sa ku Ami ta Senor DIOS.

¹⁷Awor den e di bint'i shete ana, den e prome luna, riba e prome dia di e luna, e palabra di SENOR a yega na mi, bisando:

¹⁸"Yu di hende, Nabukodonosor, rei di Babilonia, a laga su ehersito hiba un bataya fuerte kontra Tiro. Tur kabes a keda pelon i tur skouder a keda feila. Ma ni e, ni su ehersito no a hana pago for di Tiro pa e trabou ku el a hasi kontra esaki."

¹⁹Pesei, asina Senor DIOS ta bisa: "Mira, Mi ta bai duna tera di Egipto na Nabukodonosor, rei di Babilonia. I e lo bai ku tur su rikesa i kohe su botin i plunder e; i esei lo ta e pago pa su ehersito.

²⁰Mi a dun'e tera di Egipto pa e trabou ku el a hasi, pasobra ta pa Mi nan a hasie," Senor DIOS ta deklara.

²¹"Riba e dia ei lo Mi hasi un kachu spreit pa e kas di Israel, i lo Mi habri bo boka meimei di nan. E ora ei nan lo sa ku Ami ta SENOR."