Read Papantla Totonac Ezekiel 3 Bible Online

Ezekiel 3 - Papantla Totonac bible

Ezekiel 3

¹I El a bisami: "Yu di hende, kome loke ta bo dilanti, kome e rol aki, i bai papia ku e kas di Israel."

²E ora ei mi a habri mi boka, i El a dunami e rol aki kome.

³I El a bisami: "Yu di hende, kome e rol aki ku Mi ta dunabo i yena bo barika kune." E ora ei mi a kom'e, i e tabata dushi manera miel den mi boka.

⁴Despues El a bisami: "Yu di hende, bai serka e kas di Israel i papia ku nan ku Mi palabranan.

⁵Pasobra bo no ta wordu manda serka un pueblo ku ta papia un lenga strano i un idioma difisil, ma serka e kas di Israel;

⁶no serka hopi pueblo ku ta papia un lenga strano i un idioma difisil, kende nan palabranan bo no por komprende. Si Mi a mandabo serka eseinan, nan lo a skucha na bo.

⁷Ma e kas di Israel lo no ta dispuesto pa skucha na bo, pasobra nan no ta dispuesto pa skucha na Mi. Pasobra henter e kas di Israel ta kabesura i soberbe.

⁸Mira, Mi a hasi bo kara mes duru ku nan kara, i bo frenta mes duru ku nan frenta.

⁹Manera djamanta, mas duru ku piedra, Mi a hasi bo frenta. No tene miedu di nan, ni desmaya den nan presensia, maske nan ta un kas rebelde."

¹⁰Ademas El a bisami: "Yu di hende, risibi den bo kurason tur Mi palabranan ku lo Mi papia ku bo, i skucha bon.

¹¹I bai serka e eksiliadonan, serka e yunan di bo pueblo, i papia ku nan i bisa nan, sea ku nan skucha of laga di skucha: 'Asina Senor DIOS ta bisa.'"

¹²E ora ei e Spiritu a hisami, i mi a tende e zonidu di un boroto tremendo mi tras, bisando: "Bendishona sea e gloria di SENOR for di Su luga di biba."

¹³I mi a tende e zonidu di e halanan di e sernan bibu, kualnan tabata mishi ku otro, i e zonidu di e wilnan banda di nan, e zonidu di un boroto tremendo.

¹⁴Asina e Spiritu a hisami i a bai ku mi; i mi a bai amarga, den e furia di mi spiritu, i e man di SENOR tabata fuerte riba mi.

¹⁵E ora ei mi a yega serka e eksiliadonan ku tabata biba na Tel-abib, banda di Riu Kebar. I einan, kaminda nan tabata biba, mi a keda sinta pa shete dia meimei di nan, tur babuka.

¹⁶I a sosode ku na fin di e shete dianan e palabra di SENOR a yega na mi, bisando:

¹⁷"Yu di hende, Mi a hasibo guardia di e kas di Israel. Ki ora ku bo tende un palabra for di Mi boka, spierta nan pa Mi.

¹⁸Ora Mi bisa e malbado: 'Lo bo muri sigur', i abo no spiert'e, ni papia pa spierta e malbado pa laga su mal kaminda pa e biba, e malbado ei lo muri den su inikidat, ma su sanger lo Mi eksigi for di bo man.

¹⁹Ma si bo spierta e malbado i e no bira for di su maldat ni for di su mal kaminda, e lo muri den su inikidat, ma abo a libra bo mes.

²⁰"Awor, ora ku un hende hustu bira for di su hustisia i komete inikidat, i Mi pone un opstakulo su dilanti, e lo muri. Pasobra abo no a spiert'e, e lo muri den su pika, i su echonan di hustisia ku el a hasi lo no wordu rekorda, ma su sanger lo Mi eksigi for di bo man.

²¹Ma si bo spierta e hende hustu pa e hende hustu ei no hasi pika, i e no hasi pika, e lo biba sigur, pasobra el a wordu spierta, i abo a libra bo mes."

²²I ayanan e man di SENOR tabata riba mi, i El a bisami: "Lant'ariba, bai den sabana, i ayanan lo Mi papia ku bo."

²³Anto mi a lanta i a sali bai den sabana. I mira, e gloria di SENOR tabata para ayanan, manera e gloria ku mi a mira banda di Riu Kebar, i mi a tira mi kurpa abou ku mi kara te na suela.

²⁴E ora ei e Spiritu a drenta den mi i a hasimi para riba mi pia. I El a papia ku mi i a bisami: "Bai sera bo mes den bo kas.

²⁵I abo, yu di hende, nan lo pasa kabuya ront di bo i marabo ku nan, asina ku bo no por sali bai meimei di e pueblo.

²⁶Ademas, lo Mi hasi bo lenga pega na bo shel'i boka, asina ku lo bo keda mudo i no por ta e hende pa reprende nan, pasobra nan ta un kas rebelde.

²⁷Ma ora Mi papia ku bo, lo Mi habri bo boka i lo bo bisa nan: 'Asina Senor DIOS ta bisa.' Esun ku tende, lagu'e tende, i esun ku nenga di tende, lagu'e nenga, pasobra nan ta un kas rebelde.