Read Papantla Totonac Ezekiel 30 Bible Online

Ezekiel 30 - Papantla Totonac bible

Ezekiel 30

¹Atrobe e palabra di SENOR a yega na mi, bisando:

²"Yu di hende, profetisa i bisa: 'Asina Senor DIOS ta bisa: "Grita yora i bisa: 'Ai di e dia!'

³Pasobra e dia ta serka, e dia di SENOR ta serka; e lo ta un dia nubla, un tempu di desaster pa e nashonnan.

⁴I un spada lo bin kontra Egipto; i lo tin angustia na Etiopia ora ku e mortonan kai na Egipto, i nan bai ku su rikesanan, i su fundeshinan keda destrui.

⁵Etiopia, Put, Lut, henter Arabia, Libia, i e pueblo di e tera ku ta liga ku otro, lo kai pa medio di spada huntu ku nan."

⁶'Asina SENOR ta bisa: "Di berdat, esnan ku ta sostene Egipto lo kai, i e orguyo di su poder lo baha; for di Migdol te na Sevene nan lo kai ayanan pa medio di spada," Senor DIOS ta deklara.

⁷"I nan lo keda desola entre e teranan desola, i su statnan lo keda entre e statnan destrui.

⁸I nan lo sa ku Ami ta SENOR, ora Mi sende Egipto na kandela, i tur esnan ku yud'e keda destrui.

⁹"Riba e dia ei mensaheronan lo sali for di Mi den barkunan, pa spanta Etiopia ku ta sinti su mes asina sigur. I angustia lo ta riba nan meskos ku riba e dia di Egipto, pasobra, mira, e ta bin!"

¹⁰'Asina Senor DIOS ta bisa: "Tambe lo Mi pone un fin na e multitut di Egipto pa medio di man di Nabukodonosor, rei di Babilonia.

¹¹E ku su pueblo huntu kune, esnan di mas kruel di e nashonnan, lo wordu tresi pa destrui e tera; anto nan lo saka nan spada kontra Egipto i yena e tera ku e mortonan.

¹²Ademas, lo Mi hasi e kanalnan di Neil seka i bende e tera ku hombernan malbado. Lo Mi hasi e tera keda desola, i tur loke tin den dje, pa medio di man di stranheronan; Ami, SENOR, a papia."

¹³'Asina Senor DIOS ta bisa: "Lo Mi destrui e ldolonan tambe i pone un fin na e imagennan di Menfis. Anto lo no tin prens mas na tera di Egipto; i lo Mi pone temor den tera di Egipto.

¹⁴I lo Mi hasi Patros keda desola, sende Zoan na kandela, i ehekuta huisio riba Tebas.

¹⁵I lo Mi drama Mi furia riba Sin, e luga fortifika di Egipto; tambe lo Mi korta e multitut di Tebas kit'afo.

¹⁶Lo Mi sende Egipto na kandela. Sin lo trose den agonia; nan lo dal e muraya di Tebas kibra, i diariamente Menfis lo sufri angustia.

¹⁷E hobennan di Aven i di Pibeset lo kai pa medio di spada, i e muhenan lo bai den koutiverio.

¹⁸I na Tafnes dia lo ta skur, ora Mi kibra e baranan di e yugo di Egipto. E ora ei e orguyo di su poder lo kaba den dje; un nubia lo tap'e, i su yu muhenan lo bai den koutiverio.

¹⁹Asina lo Mi ehekuta huisio riba Egipto, i nan lo sa ku Ami ta SENOR.

²⁰I a sosode ku den e di diesun ana, den e prome luna, riba e di shete dia di e luna, e palabra di SENOR a yega na mi, bisando:

²¹"Yu di hende, Mi a kibra brasa di Farao, rei di Egipto; i mira, e brasa no ta faha pa e kura, ni lora den verbant pa ta fuerte pa tene spada.

²²Pesei, asina Senor DIOS ta bisa: 'Mira, Mi ta kontra Farao, rei di Egipto, i lo Mi kibra su brasanan, tantu esun fuerte komo esun kibra; i lo Mi hasi e spada kai for di su man.

²³Lo Mi plama e egipsionan entre e nashonnan i benta nan p'aki p'aya den e paisnan.

²⁴Pasobra lo Mi fortalese e brasanan di rei di Babilonia i pone Mi spada den su man; anto lo Mi kibra e brasanan di Farao, asina ku e lo keha di dolo su dilanti, manera un homber herida ta keha.

²⁵Asina lo Mi fortalese e brasanan di rei di Babilonia, ma e brasanan di Farao lo kai. E ora ei nan lo sa ku Ami ta SENOR, dia Mi pone Mi spada den man di rei di Babilonia i e ekstende esaki kontra tera di Egipto.

²⁶Dia ku Mi plama e egipsionan entre e nashonnan i benta nan p'aki p'aya den e paisnan, nan lo sa ku Ami ta SENOR.'"