Read Papantla Totonac Ezekiel 32 Bible Online

Ezekiel 32 - Papantla Totonac bible

Ezekiel 32

¹I a sosode ku den e di diesdos ana, den e di diesdos luna, riba e prome dia di e luna, e palabra di SENOR a yega na mi, bisando:

²"Yu di hende, lanta un lamentashon pa Farao, rei di Egipto, i bis'e: 'Bo a kompara bo mes ku un leon yon di e nashonnan, ma bo ta manera un monster den e lamannan; bo tabata brota den bo riunan, i ku bo pia bo tabata hasi e awanan trubel, i a susha e riunan.'"

³Asina Senor DIOS ta bisa: "Awor lo Mi habri Mi reda riba bo huntu ku un multitut di pueblonan, i nan lo halabo trese ariba den Mi reda.

⁴I lo Mi lagabo riba tera; lo Mi tirabo den e kunuku habri. I lo Mi hasi tur e parhanan di shelu baha riba bo, i ku bo lo Mi yena barika di e bestianan di henter tera.

⁵Lo Mi pone bo karni riba e serunan, i yena e vayenan ku bo restunan.

⁶Tambe lo Mi hasi e tera papa muha ku bo sanger, te na e serunan, i e riunan lo ta yen-yen di bo.

⁷Anto ora Mi eliminabo, lo Mi tapa e shelunan i hasi nan streanan bira skur; lo Mi tapa solo ku un nubia, i luna lo no laga su lus resplandese mas.

⁸Tur e lusnan ku ta briya den e shelunan lo Mi hasi bira skur riba bo, i lo Mi pone skuridat riba bo tera," Senor DIOS ta deklara.

⁹"Tambe lo Mi hasi kurason di hopi pueblo bira intrankil, ora Mi trese bo destrukshon meimei di e nashonnan, na teranan ku nunka bo no a konose.

¹⁰Lo Mi hasi hopi pueblo keda babuka pa bo motibu, i nan reinan lo keda morto spanta pa bo motibu, ora Mi zwai Mi spada nan dilanti; i nan lo tembla sin fin, kada un pa su mes bida, riba e dia di bo kaida."

¹¹Pasobra asina Senor DIOS ta bisa: "Spada di rei di Babilonia lo bin riba bo.

¹²Pa medio di spada di esnan poderoso lo Mi hasi bo multitut kai; nan tur huntu ta esnan di mas kruel di e nashonnan; nan lo kaba ku orguyo di Egipto, i henter su multitut lo wordu destrui.

¹³Tambe lo Mi destrui tur su bestianan for di kantu di hopi awanan; i pia di hende lo no hasi nan trubel mas, ni huf di bestia lo no hasi nan trubel mas.

¹⁴E ora ei lo Mi hasi nan awanan bira kla, i hasi nan riunan kore manera zeta," Senor DIOS ta deklara.

¹⁵"Ora Mi hasi tera di Egipto un desolashon, i e tera keda bashi di tur loke tabatin den dje, ora Mi mata tur esnan ku ta biba den dje, e ora ei nan lo sa ku Ami ta SENOR.

¹⁶"Esaki ta un lamentashon i nan lo kant'e. E yu muhenan di e nashonnan lo kant'e. Pa Egipto i pa henter su multitut nan lo kant'e," Senor DIOS ta deklara.

¹⁷I a sosode ku den e di diesdos ana, riba e di diesinku dia di e luna, e palabra di SENOR a yega na mi, bisando:

¹⁸"Yu di hende, grita yora pa e multitut di Egipto i tir'e abou den e profundidat di tera, tantu e komo e yu muhenan di e nashonnan poderoso, huntu ku esnan ku ta baha den pos:

¹⁹'Ken bo ta surpasa den bunitesa? Baha pa bo wordu poni huntu ku esnan insirkumsida.'

²⁰Nan lo kai meimei di esnan ku a wordu mata pa medio di spada. El a keda entrega na spada; e ku henter su multitut nan a lastra bai kune.

²¹For di meimei di Seol e fuertenan entre e poderosonan lo bisa di dje i di esnan ku ta yud'e: 'Nan a baha bai abou; nan ta drumi ketu, esnan insirkumsida, mata pa medio di spada.'

²²"Asiria ta ayanan ku henter su multitut; su grafnan ta ront di dje. Nan tur a wordu mata, nan a kai pa medio di spada.

²³Nan grafnan ta den e partinan mas aleha di e pos, i su multitut ta ront di su graf. Nan tur a wordu mata; nan a kai pa medio di spada--esnan ku a plama teror den e tera di e bibunan.

²⁴"Elam ta ayanan, i henter su multitut, tur ront di su graf; nan tur a wordu mata, nan a kai pa medio di spada, kendenan a baha bai insirkumsida na e partinan mas abou di tera, kendenan a kousa teror den e tera di e bibunan; i awor nan ta karga nan berguensa huntu ku esnan ku a baha den pos.

²⁵Nan a pone un kama p'e meimei di esnan ku a wordu mata, huntu ku henter su multitut. Su grafnan ta ront di dje. Nan tur ta insirkumsida, mata pa medio di spada (ounke ku nan a kousa teror den e tera di e bibunan), i nan a karga nan berguensa huntu ku esnan ku a baha den pos; nan a wordu poni meimei di esnan ku a wordu mata.

²⁶"Mesek, Tubal i henter nan multitut ta ayanan; nan grafnan ta ront di nan. Nan tur, insirkumsida, a wordu mata pa medio di spada, ounke ku nan a kousa teror den e tera di e bibunan.

²⁷Tampoko nan no ta drumi huntu ku e heroenan insirkumsida ku a kai, kendenan a baha den Seol ku nan armanan di guera, i kende nan spadanan a wordu poni bou di nan kabes. Ma e kastigu pa nan inikidat a keda riba nan wesunan, ounke ku un tempu teror pa e heroenan aki tabata den e tera di e bibunan.

²⁸"Ma meimei di esnan insirkumsida lo bo wordu kibra, i lo bo drumi huntu ku esnan ku a wordu mata pa medio di spada.

²⁹"Edom tambe ta ayanan, su reinan i tur su prensnan, kendenan, apesar di nan poder, ta poni serka esnan ku a wordu mata pa medio di spada. Nan lo drumi huntu ku esnan insirkumsida, huntu ku esnan ku ta baha den pos.

³⁰"Ayanan e prensnan di nort tambe ta, tur di nan, i tur e sidonionan, kendenan a baha ku berguensa, huntu ku esnan ku a wordu mata, pa motibu di e teror ku nan a kousa pa medio di nan poder. Asina nan ta drumi insirkumsida huntu ku esnan ku a wordu mata pa medio di spada, i nan ta karga nan berguensa huntu ku esnan ku ta baha den pos.

³¹"Esakinan Farao lo mira, i e lo wordu konsola pa henter su multitut ku a wordu mata pa medio di spada; si, Farao huntu ku henter su ehersito," Senor DIOS ta deklara.

³²"Ounke Mi a kousa teror p'e den e tera di e bibunan, tog e lo mester drumi meimei di esnan insirkumsida, huntu ku esnan ku a wordu mata pa medio di spada, si, Farao huntu ku henter su multitut," Senor DIOS ta deklara.