Read Papantla Totonac Ezekiel 33 Bible Online

Ezekiel 33 - Papantla Totonac bible

Ezekiel 33

¹I e palabra di SENOR a yega na mi, bisando:

²"Yu di hende, papia ku e yunan di bo pueblo, i bisa nan: 'Si Mi trese spada riba un tera, i e pueblo di e tera skohe un homber for di meimei di nan i hasie nan guardia,

³anto e mira e spada ta bin riba e tera, i e supla trompet i spierta e pueblo,

⁴e ora ei esun ku tende e zonidu di trompet i no hasi kaso di e spiertamentu, i un spada bin i bai kune, su sanger lo keda riba su mes kabes.

⁵El a tende e zonidu di trompet, ma no a hasi kaso di e spiertamentu; su sanger lo keda riba dje mes. Ma si el a hasi kaso di e spiertamentu, e lo a libra su bida.

⁶Ma si e guardia mira e spada ta bin, i e no supla trompet, i e pueblo no wordu spierta, i e spada bin kita un persona for di nan, e lo wordu kita den su inikidat, ma su sanger lo Mi eksigi for di man di e guardia.'

⁷"Awor pa loke t'abo, yu di hende, Mi a nombrabo komo guardia pa e kas di Israel; asina lo bo tende un mensahe for di Mi boka, i lo bo spierta nan pa Mi.

⁸Ora Mi bisa e malbado: 'O homber malbado, lo bo muri sigur,' i abo no papia pa spierta e malbado pa bira for di su kaminda, e homber malbado ei lo muri den su inikidat, ma su sanger lo Mi eksigi for di bo man.

⁹Ma si abo, di bo parti, spierta un homber malbado pa bira for di su kaminda, i e no bira for di su kaminda, e lo muri den su inikidat; ma abo a libra bo bida.

¹⁰"Awor pa loke t'abo, yu di hende, bisa e kas di Israel: 'Asina boso a papia, bisando: "Siguramente nos transgreshonnan i nos pikanan ta riba nos, i nos ta kaba na nada den nan. Kon nos por sobrebibi anto?"'

¹¹Bisa nan: 'Manera Mi ta biba!' Senor DIOS ta deklara, 'Mi no tin plaser den e morto di e malbado, ma mas bien ku e malbado bira for di su kaminda i biba. Bira, bira for di boso mal kamindanan! Pakiko anto boso kier muri, O kas di Israel?'

¹²"I abo, yu di hende, bisa bo konsiudadanonan: 'Hustisia di un hende hustu lo no libr'e den e dia di su transgreshon, i pa loke ta maldat di e malbado, e lo no trompeka pa motibu di esei den e dia ku e bira for di su maldat. En kambio, un homber hustu lo no por biba pa medio di su hustisia den e dia ku e komete pika.'

¹³Ora Mi bisa e hustu ku e lo biba sigur, i e konfia asina tantu den su hustisia ku e ta komete inikidat, ningun di su echonan hustu lo no wordu rekorda. Ma pa e inikidat ei ku el a komete, e lo muri.

¹⁴Ma ora Mi bisa e malbado: 'Lo bo muri sigur,' i e bira for di su pika i praktika huisio i hustisia,

¹⁵si un malbado restitui un garantia, paga bek loke el a horta, kana segun e statutonan ku ta sigura bida sin komete inikidat, e lo biba sigur; e lo no muri.

¹⁶Ningun di su pikanan ku el a komete lo no wordu rekorda kontra dje. El a praktika huisio i hustisia; e lo biba sigur.

¹⁷"Tog bo konsiudadanonan ta bisa: 'E kaminda di Senor no ta rekto', mientras ku ta nan mes kaminda no ta rekto.

¹⁸Ora ku e hende hustu bira for di su hustisia i komete inikidat, e lo muri pa esei.

¹⁹Ma ora ku e malbado bira for di su maldat i praktika huisio i hustisia, e lo biba pa medio di eseinan.

²⁰Tog boso ta bisa: 'E kaminda di Senor no ta rekto.' O kas di Israel, lo Mi huzga kada un di boso, segun su kamindanan."

²¹Awor a sosode ku den e di diesdos ana di nos eksilio, riba e di sinku dia di e di dies luna, e refugiadonan for di Jerusalem a bin serka mi, bisando: "E stat a wordu konkista."

²²Awor e man di SENOR tabata riba mi e anochi prome ku e refugiadonan a bin. I El a habri mi boka; asina ta ku mainta ora nan a bin serka mi, mi boka tabata habri kaba, i mi no tabata mudo mas.

²³Despues e palabra di SENOR a yega na mi, bisando:

²⁴"Yu di hende, esnan ku ta biba den e luganan ruina aki na tera di Israel ta bisa: 'Abraham tabata un hende so, tog el a podera di e tera; asina ta ku na nos ku ta hopi, e tera a wordu duna komo propiedat.'

²⁵Pesei, bisa nan: 'Asina Senor DIOS ta bisa: "Boso ta kome karni huntu ku e sanger i ta hisa kara wak boso idolonan mientras ku boso ta drama sanger. Anto boso lo podera di e tera?

²⁶Boso ta depende di boso spada, boso ta komete abominashonnan, i kada un di boso ta desonra esposa di su prohimo. Anto boso lo podera di e tera?"'

²⁷"Asina bo mester bisa nan: 'Asina Senor DIOS ta bisa: "Manera Mi ta biba, siguramente esnan ku ta den e luganan ruina lo kai pa medio di spada, i esnan ku ta den kunuku habri lo Mi entrega na e bestianan di mondi pa wordu devora, anto esnan ku ta den luganan fortifika i den kuebanan lo muri di pest.

²⁸Lo Mi hasi e tera un desolashon i un ruina, i e orguyo di su poder lo yega na su fin. I e serunan di Israel lo keda desola, asina ku ningun hende lo no pasa dor di nan.

²⁹E ora ei nan lo sa ku Ami ta SENOR, ora Mi hasi e tera un desolashon i un ruina pa motibu di tur nan abominashonnan ku nan a komete."'

³⁰"Ma abo, yu di hende, bo konsiudadanonan ku ta papia riba bo banda di e murayanan i na e entradanan di e kasnan, ta papia ku otro, kada un ku su ruman, bisando: 'Bin awor, i skucha kiko e mensahe ta ku ta bin di SENOR.'

³¹Nan ta bin serka bo manera e pueblo ta kustumbra di bin, i nan ta sinta bo dilanti manera Mi pueblo, i nan ta tende bo palabranan, ma nan no ta kumpli ku nan. Pasobra ku nan boka nan ta mustra hopi amor, ma nan kurason ta sigui tras di nan ganashi inhustu.

³²I mira, pa nan bo ta manera un kantika sensual, kanta dor di un hende ku tin bunita bos i ku sa di toka instrument bon; pasobra nan ta tende bo palabranan, ma no ta pone nan na praktika.

³³"Asina ta ku ora esaki sosode--i e lo sosode sigur--e ora ei nan lo sa ku tabatin un profeta meimei di nan."