Read Papantla Totonac Ezekiel 34 Bible Online

Ezekiel 34 - Papantla Totonac bible

Ezekiel 34

¹E ora ei e palabra di SENOR a yega na mi, bisando:

²"Yu di hende, profetisa kontra e wardadonan di Israel. Profetisa i bisa e wardadonan ei: 'Asina Senor DIOS ta bisa: "Ai di e wardadonan di Israel ku ta alimenta nan mes! No ta e tou e wardadonan mester alimenta?

³Boso ta kome e vet, i ku e lana boso ta bisti boso mes; boso ta mata e karne gorda, ma e tou boso no ta alimenta.

⁴Boso no a fortifika esnan ku ta swak; boso no a kura esnan ku ta malu; boso no a pone verbant pa esnan herida; boso no a trese bek esnan ku a wordu plama, ni boso no a buska esnan perdi; ma ku duresa i krueldat boso a domina nan.

⁵I nan a keda plama pa falta di un wardado, i nan a bira kuminda pa tur bestia di mondi, i a keda plama.

⁶Mi tou a kana dwal den tur e serunan i riba tur seru haltu, i Mi tou a keda plama riba henter e superfisio di tera; i no tabatin ningun hende pa puntra pa nan ni pa bai buska nan.

⁷Boso anto, wardadonan, tende e palabra di SENOR:

⁸"Manera Mi ta biba," Senor DIOS ta deklara, "siguramente, pasobra Mi tou a bira proi, i Mi tou a bira kuminda pa tur e bestianan di mondi pa falta di un wardado, i Mi wardadonan no a bai buska Mi tou, ma e wardadonan a alimenta nan mes i no a alimenta Mi tou,

⁹boso anto, wardadonan, tende e palabra di SENOR:

¹⁰'Asina Senor DIOS ta bisa: "Mira, Mi ta kontra e wardadonan i lo Mi eksigi Mi karnenan for di nan; i lo Mi no permit! nan alimenta karne mas. Asina e wardadonan lo no alimenta nan mes mas, ma lo Mi libra Mi tou for di nan boka, pa nan no ta kuminda mas pa nan.

¹¹Pasobra, asina Senor DIOS ta bisa: "Mira, Ami mes lo puntra pa Mi karnenan i buska nan.

¹²Manera un wardado ta kuida su tou riba e dia ku e ta meimei di su karnenan plama, asina lo Mi kuida Mi karnenan, i lo Mi libra nan for di tur e luganan pa unda nan a wordu plama riba un dia nubla i di skuridat.

¹³Lo Mi saka nan for di meimei di e pueblonan, reuni nan for di e teranan i trese nan na nan mes tera. Lo Mi alimenta nan riba e serunan di Israel, banda di e koridanan di awa i den tur e luganan habita di e tera.

¹⁴Lo Mi alimenta nan den un bon luga di yerba berde, i nan luga di kome lo ta riba e serunan haltu di Israel. Aya nan lo drumi den un bon luga di yerba berde, i nan lo kome yerba fresku riba e serunan di Israel.

¹⁵Lo Mi alimenta Mi tou i lo Mi hiba nan na un luga kaminda nan por sosega," Senor DIOS ta deklara.

¹⁶"Lo Mi buska esnan ku ta perdi, trese bek esnan ku tabata dwal, pone verbant pa esnan ku ta herida, i fortifika esnan ku ta malu; ma esnan gordo i fuerte lo Mi destrui. Eseinan lo Mi alimenta ku huisio.

¹⁷"I pa loke ta boso, Mi tou, asina Senor DIOS ta bisa: 'Mira, lo Mi huzga entre esun karne i e otro, i entre karne chubatu i kabritu chubatu.

¹⁸No ta basta ku boso a kome e miho yerba? Boso mester trapa e restu di e yerba tambe ku boso huf? No ta basta ku boso a bebe di e awa limpi? Boso mester susha e restu tambe ku boso huf?

¹⁹I pa loke ta Mi tou, nan mester kome loke boso a trapa ku boso huf i bebe loke boso a susha ku boso huf?'"

²⁰Pesei, asina Senor DIOS ta bisa nan: "Mira, Ami, Ami mes, lo huzga entre e karnenan gordo i e karnenan flaku.

²¹Pasobra boso ta pusha ku kustia i ku skouder i ku boso kachunan boso ta kacha tur esnan ku ta swak, te ora ku boso a plama nan tur kaminda;

²²pesei Ami lo libra Mi tou i nan lo no ta proi mas; anto lo Mi huzga entre esun karne i e otro.

²³E ora ei lo Mi pone un wardado riba nan, Mi sirbido David, i e lo alimenta nan; e mes lo alimenta nan i lo ta nan wardado.

²⁴I Ami, SENOR, lo ta nan Dios, i Mi sirbido David lo ta prens meimei di nan. Ami, SENOR, a papia.

²⁵"I lo Mi sera un aliansa di pas ku nan i elimina tur bestia salbahe for di e tera, asina ku nan por biba trankil den desierto i drumi den e mondinan.

²⁶Anto lo Mi hasi nan i e luganan ront di Mi seru un bendishon. I lo Mi hasi ku lo tin yobida na su tempu. Nan lo ta yobidanan di bendishon.

²⁷Tambe e palu di kunuku lo duna su fruta i e tera lo duna su kosecha, i nan lo ta trankil na nan tera. E ora ei nan lo sa ku Ami ta SENOR, ora ku Mi a kibra e baranan di nan yugo i a libra nan for di man di esnan ku a hasi nan bira esklabu.

²⁸Nan lo no ta proi mas pa e nashonnan, i bestia di mondi lo no devora nan; ma nan lo biba trankil, i ningun hende lo no spanta nan.

²⁹Lo Mi stablese pa nan un luga konosi pa su plantashon, i nan lo no ta viktima di hamber mas na e tera, i nan lo no tin di soporta insulto di e nashonnan mas.

³⁰E ora ei nan lo sa ku Ami, SENOR nan Dios, ta ku nan, i nan, e kas di Israel, ta Mi pueblo," Senor DIOS ta deklara.

³¹"I pa loke ta boso, Mi karnenan, e karnenan di Mi komedera, boso ta hende, i Ami ta boso Dios," Senor DIOS ta deklara.