Read Papantla Totonac Ezekiel 35 Bible Online

Ezekiel 35 - Papantla Totonac bible

Ezekiel 35

¹Ademas, e palabra di SENOR a yega na mi, bisando:

²"Yu di hende, bira bo kara den direkshon di Seru Seir, i profetisa kontra dje,

³i bis'e: 'Asina Senor DIOS ta bisa: "Mira, Mi ta kontra bo, Seru Seir, i lo Mi saka Mi man kontra bo, i hasibo un desolashon i un ruina.

⁴Lo Mi hasi bo statnan keda un ruina, i lo bo bira un desolashon. E ora ei lo bo sa ku Ami ta SENOR.

⁵"Komo ku bo tabatin enemistat perpetuo i a entrega e yunan di Israel na poder di spada, tempu di nan kalamidat, tempu di e kastigu final,

⁶pesei, manera Mi ta biba," Senor DIOS ta deklara, "lo Mi entregabo na dramamentu di sanger, i dramamentu di sanger lo persiguibo. Komo ku bo no a aborese dramamentu di sanger, pesei dramamentu di sanger lo persiguibo.

⁷I lo Mi hasi Seru Seir un ruina i un desolashon, i lo Mi korta kita for di dje ken ku bin i ken ku bai.

⁸Anto lo Mi yena su serunan ku su hendenan ku a wordu mata; riba bo serunan, den bo vayenan i den tur bo riunan esnan mata pa medio di spada lo kai.

⁹Lo Mi hasibo un desolashon perpetuo, i bo statnan lo no ta habita mas. E ora ei lo bo sa ku Ami ta SENOR.

¹⁰"Pasobra bo a bisa: 'E dos nashonnan aki i e dos teranan aki lo ta di mi, i nos lo podera di nan,' maske SENOR tabata einan,

¹¹pesei, manera Mi ta biba," Senor DIOS ta deklara, "lo Mi trata ku bo konforme bo rabia i konforme e envidia ku bo a demostra pa motibu di bo odio kontra nan. Asina lo Mi hasi Mi mes konosi meimei di nan ora Mi ta huzgabo.

¹²E ora ei lo bo sa ku Ami, SENOR, a tende tur e blasfemianan ku bo a papia kontra e serunan di Israel, bisando: 'Nan a keda desola; nan ta duna na nos komo kuminda.'

¹³I boso a papia ku arogansia kontra Mi i a multiplika boso palabranan kontra Mi; Mi a tende esaki."

¹⁴Asina Senor DIOS ta bisa: "Mientras ku henter tera ta regosiha, lo Mi hasibo un desolashon.

¹⁵Meskos ku bo a regosiha ofer di e erensia di e kas di Israel pasobra el a keda desola, asina lo Mi hasi ku bo. Lo bo ta un desolashon, O Seru Seir, i henter Edom, henteramente. E ora ei nan lo sa ku Ami ta SENOR."'