Read Papantla Totonac Ezekiel 36 Bible Online

Ezekiel 36 - Papantla Totonac bible

Ezekiel 36

¹"I abo, yu di hende, profetisa pa e serunan di Israel i bisa: 'O serunan di Israel, tende e palabra di SENOR.

²Asina Senor DIOS ta bisa: "Pasobra e enemigu a bisa di boso: 'Aha! E halturanan eterno a bira nos propiedat,'

³pesei, profetisa i bisa: 'Asina Senor DIOS ta bisa: "Ku rason nan a hasi boso keda desola, i for di tur banda nan a trapa boso, pa boso bira propiedat di e restu di e nashonnan, i boso a bira topiko di kombersashon i kalumnia di e hendenan.

⁴Pesei, O serunan di Israel, tende e palabra di Senor DIOS. Asina Senor DIOS ta bisa e serunan i e seritunan, e riunan i e vayenan, e ruinanan desola i e statnan bandona, kualnan a bira un proi i un opheto di bofon pa e restu di e nashonnan tur ront;

⁵pesei, asina Senor DIOS ta bisa: "Siguramente, den e kandela di Mi yalursheit Mi a papia kontra e restu di e nashonnan, i kontra henter Edom, kendenan a kohe Mi tera pa nan mes komo propiedat, ku goso di henter nan kurason i ku profundo despresio, pa sak'e afo komo un proi."

⁶Pesei, profetisa tokante di tera di Israel, i bisa e serunan i e seritunan, e riunan i e vayenan: "Asina Senor DIOS ta bisa: 'Mira, Mi a papia den Mi yalursheit i den Mi furia, pasobra boso a wanta e insultonan di e nashonnan.'

⁷Pesei, asina Senor DIOS ta bisa: 'Mi a hura ku siguramente e nashonnan ku ta ront di boso lo wanta nan mes insultonan.

⁸'Ma boso, O serunan di Israel, boso lo produsi boso ramanan i karga boso frutanan pa Mi pueblo Israel, pasobra nan ta serka di bin.

⁹Pasobra, mira, Mi ta na boso banda i lo Mi faborese boso, i boso lo wordu kultiva i sembra.

¹⁰Lo Mi multiplika e kantidat di hende riba boso, henter e kas di Israel, henteramente; i e statnan lo keda habita i e luganan ruina lo wordu rekonstrui.

¹¹Lo Mi multiplika hende i bestia riba boso; anto nan lo oumenta i bira fruktifero. Lo Mi hasi hende biba riba boso manera den pasado i lo Mi trata boso miho ku prome aya. Asina boso lo sa ku Ami ta SENOR.

¹²Si, lo Mi hasi hende--Mi pueblo Israel--kana riba boso i podera di boso, asina ku boso lo bira nan erensia i nunka mas laga nan keda sin yu.'

¹³"Asina Senor DIOS ta bisa: 'Pasobra nan ta bisa boso: "Bo ta devora hende i a laga bo nashon keda sin yu,"

¹⁴pesei, lo bo no devora hende mas, ni laga bo nashon keda sin yu mas,' Senor DIOS ta deklara.

¹⁵Lo Mi no lagabo tende insulto di e nashonnan mas, ni lo bo no sufri reproche di e pueblonan mas, ni lo bo no hasi bo nashon trompeka mas," Senor DIOS ta deklara.'"

¹⁶E ora ei e palabra di SENOR a yega na mi, bisando:

¹⁷"Yu di hende, tempu ku kas di Israel tabata biba den nan mes tera, nan tabata kontamin'e ku nan kondukta i nan echonan; den Mi bista nan kondukta tabata manera e impuresa mensual di un muhe.

¹⁸Pesei Mi a drama Mi furia riba nan pa motibu di e sanger ku nan a drama riba e tera, pasobra nan a kontamin'e ku nan ldolonan.

¹⁹Tambe Mi a plama nan entre e nashonnan, i nan a keda benta p'aki p'aya den tur e paisnan. Segun nan kondukta i nan echonan Mi a huzga nan.

²⁰Tempu ku nan a yega na e nashonnan kaminda nan a bai, nan a profana Mi nomber santu, pasobra a wordu bisa di nan: 'Esakinan ta e pueblo di SENOR; tog nan a sali for di Su tera.'

²¹Esaki a duel Mi pa Mi nomber santu ku e kas di Israel a profana entre e nashonnan kaminda nan a bai.

²²"Pesei, bisa e kas di Israel: 'Asina Senor DIOS ta bisa: "Mi no ta bai hasi esaki pa boso motibu, O kas di Israel, ma pa Mi nomber santu ku boso a profana meimei di e nashonnan kaminda boso a bai.

²³I lo Mi santifika Mi nomber grandi ku a wordu profana meimei di e nashonnan, ku boso a profana meimei di nan. E ora ei e nashonnan lo sa ku Ami ta SENOR," Senor DIOS ta deklara, "ora Mi wordu santifika meimei di boso den nan bista.

²⁴"Pasobra lo Mi saka boso for di e nashonnan, rekohe boso for di tur e teranan i hiba boso na boso mes tera.

²⁵E ora ei lo Mi sprengu awa limpi riba boso, i boso lo ta limpi. Lo Mi limpia boso di tur boso sushedat i di tur boso ldolonan.

²⁶Ademas, lo Mi duna boso un kurason nobo i pone un spiritu nobo den boso. Lo Mi kita e kurason di piedra for di boso karni i duna boso un kurason di karni.

²⁷I lo Mi pone Mi Spiritu den boso i hasi boso kana den Mi statutonan, i boso lo perkura di kumpli ku Mi ordenansanan.

²⁸I boso lo biba den e tera ku Mi a duna boso antepasadonan; asina boso lo ta Mi pueblo, i Ami lo ta boso Dios.

²⁹Ademas, lo Mi salba boso for di tur boso impuresa; lo Mi yama e mainshi i multiplik'e, i lo Mi no trese hamber riba boso.

³⁰I lo Mi multiplika fruta di palu i produkshon di kunuku, pa nunka mas boso pasa berguensa di hamber meimei di e nashonnan.

³¹E ora ei boso lo korda boso mal kondukta i boso echonan ku no tabata bon, i boso lo tin asko di boso mes pa motibu di boso inikidatnan i boso abominashonnan.

³²Mi no ta hasi esaki pa boso motibu," Senor DIOS ta deklara, "sea sigur di esei! Sea brongosa i konfundi pa motibu di boso kondukta, O kas di Israel!"

³³'Asina Senor DIOS ta bisa: "Riba e dia ku Mi limpia boso di tur boso inikidatnan, lo Mi hasi ku e statnan lo wordu habita i ku e luganan ruina lo wordu rekonstrui.

³⁴I e tera desola lo wordu kultiva na luga di keda un desolashon den bista di tur hende ku ta pasa.

³⁵I nan lo bisa: 'E tera desola aki a bira manera e hofi di Eden; i e statnan bandona, desola i ruina, awor ta fortifika i habita.'

³⁶E ora ei e nashonnan ku a keda tur ront di boso lo sa ku Ami, SENOR, a rekonstrui e luganan ku a keda ruina, i a planta loke a keda desola. Ami, SENOR, a papia i lo hasi esaki."

³⁷'Asina Senor DIOS ta bisa: "Esaki tambe lo Mi laga e kas di Israel pidiMi hasi pa nan: lo Mi oumenta nan hendenan manera un tou di karne.

³⁸Manera e tou pa hasi sakrifisio, manera e tou na Jerusalem durante di e fiestanan stipula, asina e statnan bandona lo wordu yena ku tou di hende. E ora ei nan lo sa ku Ami ta SENOR.