Read Papantla Totonac Ezekiel 37 Bible Online

Ezekiel 37 - Papantla Totonac bible

Ezekiel 37

¹E man di SENOR tabata riba mi, i El a hibami pafo den e Spiritu di SENOR i a ponemi meimei di e vaye, i e vaye tabata yen di wesu.

²El a hasimi pasa tur ront meimei di nan, i ata, tabatin masha hopi mes abou na suela den e vaye; i mira, nan tabata tur seku.

³I El a puntrami: "Yu di hende, e wesunan aki por biba?" Mi a kontesta: "O Senor DIOS, ta Abo so sa."

⁴Anto El a bisami: "Profetisa ofer di e wesunan aki i bisa nan: 'O wesunan seku, tende e palabra di SENOR.'

⁵Asina Senor DIOS ta bisa e wesunan aki: 'Mira, lo Mi hasi rosea bin den boso, i boso lo biba.

⁶I lo Mi pone muskulo riba boso, hasi karni bolbe krese riba boso, kubri boso ku kueru i pone rosea den boso pa boso biba; i boso lo sa ku Ami ta SENOR.'"

⁷Asina mi a profetisa manera mi a wordu ordena. I mientras mi tabata profetisa tabatin un boroto, i mira, un sagudimentu; i e wesunan a bin pega na otro, kada wesu na su wesu.

⁸Mi a wak, i ata, a bin muskulo riba nan, karni a krese i kueru a kubri nan; ma no tabatin rosea den nan.

⁹E ora ei El a bisami: "Profetisa na e rosea, profetisa, yu di hende, i bisa e rosea: 'Asina Senor DIOS ta bisa: "Bin for di tur kuater direkshon di bientu, O rosea, i supla riba esakinan ku a wordu mata, pa nan hana bida.

¹⁰Asina mi a profetisa manera El a ordenami, i rosea a bin den nan, i nan a hana bida i a lanta para riba nan pia, un ehersito sumamente grandi.

¹¹Anto El a bisami: "Yu di hende, e wesunan aki ta henter e kas di Israel. Mira, nan ta bisa: 'Nos wesunan a seka i nos speransa a perese. Nos ta kompletamente destrui.'

¹²Pesei, profetisa i bisa nan: 'Asina Senor DIOS ta bisa: "Mira, lo Mi habri boso grafnan i hasi boso sali for di boso grafnan, Mi pueblo; i lo Mi hiba boso na tera di Israel.

¹³E ora ei boso lo sa ku Ami ta SENOR, ora Mi habri boso grafnan i hasi boso sali for di boso grafnan, Mi pueblo.

¹⁴I lo Mi pone Mi Spiritu den boso, i boso lo hana bida, i lo Mi stablese boso na boso mes tera. E ora ei boso lo sa ku Ami, SENOR, a papia i a hasi esaki," SENOR ta deklara.'"

¹⁵Atrobe e palabra di SENOR a yega na mi, bisando:

¹⁶"I abo, yu di hende, kohe un pida palu i skirbi riba dje: 'Pa Juda i pa e yunan di Israel, su kompaneronan.' Despues kohe un otro pida palu i skirbi riba dje: 'Pa Jose, e palu di Efrain i henter e kas di Israel, su kompaneronan.'

¹⁷Anto pega nan na otro hasi nan un solo pida palu, asina ku nan lo bira un den bo man.

¹⁸"I ora ku e yunan di bo pueblo puntrabo, bisando: 'Bo no kier splika nos kiko bo kier men ku esakinan?'

¹⁹bisa nan: 'Asina Senor DIOS ta bisa: "Mira, Mi ta bai kohe e pida palu di Jose, ku ta den man di Efrain, i e tribunan di Israel, su kompaneronan; i lo Mi pone nan huntu kune, huntu ku e pida palu di Juda, i hasi nan un solo pida palu, i nan lo bira un den Mi man."'

²⁰E palunan ku bo ta skirbi riba dje lo ta den bo man dilanti di nan bista.

²¹Anto bisa nan: 'Asina Senor DIOS ta bisa: "Mira, lo Mi saka e yunan di Israel for di meimei di e nashonnan, kaminda nan a bai, i lo Mi rekohe nan for di tur parti i trese nan den nan mes tera.

²²I lo Mi hasi nan un nashon den e tera, riba e serunan di Israel. I un rei lo ta rei pa nan tur; i nan lo no ta dos nashon mas, ni nan lo no wordu parti den dos reino mas.

²³Nan lo no kontamina nan mes mas ku nan ldolonan, ni ku nan kosnan repugnante, ni ku ningun di nan transgreshonnan; ma lo Mi libra nan for di tur nan luganan di biba, kaminda nan a hasi pika, i lo Mi limpia nan. Anto nan lo ta Mi pueblo i Ami lo ta nan Dios.

²⁴"I Mi sirbido David lo ta rei riba nan, i nan tur lo tin un wardado; i nan lo kana segun Mi ordenansanan i warda Mi statutonan, i kumpli ku nan.

²⁵I nan lo biba na e tera ku Mi a duna Mi sirbido Jakob, kaminda boso tatanan tabata biba. I nan lo biba den dje, nan i nan yunan i yunan di nan yunan, pa semper, i Mi sirbido David lo ta nan prens pa semper.

²⁶I lo Mi sera un aliansa di pas ku nan; esei lo ta un aliansa eterno ku nan. I lo Mi stablese nan i multiplika nan, i lo Mi pone Mi santuario meimei di nan pa semper.

²⁷Mi luga di biba tambe lo ta meimei di nan; i Ami lo ta nan Dios, i nan lo ta Mi pueblo.

²⁸Ora Mi santuario ta stablesi meimei di nan pa semper, e nashonnan lo sa ku Ami ta SENOR, Kende ta santifika Israel.