Read Papantla Totonac Ezekiel 38 Bible Online

Ezekiel 38 - Papantla Totonac bible

Ezekiel 38

¹E palabra di SENOR a yega na mi, bisando:

²"Yu di hende, bira bo kara den direkshon di Gog di tera di Magog, prens di Ros, Mesek i Tubal, i profetisa kontra dje,

³i bisa: 'Asina Senor DIOS ta bisa: "Mira, Mi ta kontra bo, O Gog, prens di Ros, Mesek i Tubal.

⁴Lo Mi hasibo bira bek, i pone anzue den bo kakumbein, i lo Mi saka abo ku henter bo ehersito afo, kabainan i hombernan riba kabai, nan tur kompletamente ekipa, un multitut grandi ku eskudonan grandi i chikitu, nan tur ku sa di maneha spada;

⁵Persia, Kus i Put huntu ku nan, nan tur ku eskudo i helm;

⁶Gomer ku tur su trupanan, i Bet-togarma for di e partinan mas aleha di nort ku tur su trupanan, hopi pueblo huntu ku bo.

⁷"Para kla; prepara bo mes, abo ku tur bo multitutnan ku ta reuni serka bo, i sea un guardia pa nan.

⁸Despues di hopi dia lo bo risibi un ordu. Den e ultimo tempu lo bo drenta e tera di esnan ku a wordu libra for di spada, kual su habitantenan--for di hopi nashon--a wordu reuni riba e serunan di Israel, un luga ku a keda desola pa hopi tempu; nan a wordu saka for di e nashonnan, i awor nan tur ta bibando trankil.

⁹Lo bo subi bin manera un tempestat. Lo bo ta manera un nubia ku ta tapa e tera, abo ku tur bo trupanan i hopi pueblo huntu ku bo."

¹⁰'Asina Senor DIOS ta bisa: "Lo sosode riba e dia ei ku lo drenta pensamentunan den bo mente, i lo bo traha un plan di maldat,

¹¹i lo bo bisa: 'Mi ta subi bai kontra e tera di pueblitonan sin muraya. Mi ta bai kontra un pueblo pasifiko ku ta biba trankil, ku ta biba sin muraya i ku no tin grendel ni porta,

¹²pa kohe botin i pa plunder, pa pone bo man kontra e luganan bandona ku a wordu habita atrobe, i kontra e pueblo ku ta reuni for di e nashonnan, kendenan a atkiri bestia i biennan i ta biba na e parti sentral di mundu.'

¹³Saba, i Dedan, i e negoshantenan di Tarsis, ku tur su pueblitonan, lo puntrabo: 'Bo a bin pa kohe botin? Bo a reuni bo multitut pa plunder, pa karga plata i oro bai kune, pa hiba bestia i biennan, pa kohe hopi botin?'"'

¹⁴"Pesei, profetisa, yu di hende, i bisa Gog: 'Asina Senor DIOS ta bisa: "Dia Mi pueblo Israel ta bibando trankil asina, lo bo no tuma nota di esaki?

¹⁵Lo bo bin for di bo luga, for di e partinan mas aleha di nort, abo i hopi pueblo huntu ku bo, nan tur riba kabai, un multitut grandi i un ehersito poderoso;

¹⁶lo bo lanta bin kontra Mi pueblo Israel, manera un nubia ku ta tapa tera. Lo sosode den e ultimo dianan ku lo Mi tresebo kontra Mi tera, pa e nashonnan sina konoseMi ora Mi wordu santifika den bo, O Gog, dilanti di nan bista."

¹⁷'Asina Senor DIOS ta bisa: "Ta abo ta esun di kende Mi a papia den tempunan pasa pa medio di Mi sirbidonan, e profetanan di Israel, kendenan den e tempunan ei a profetisa pa ananan largu ku Ami lo a tresebo kontra nan?

¹⁸I lo sosode riba e dia ei, ora Gog bin kontra tera di Israel," Senor DIOS ta deklara, "ku Mi furia lo subi den Mi nanishi.

¹⁹I den Mi zelo i e ardor di Mi furia Mi ta deklara ku riba e dia ei sigur ta bai tin un temblor grandi na tera di Israel.

²⁰I e piskanan di laman, e parhanan di shelu, e bestianan di mondi, tur e bestianan ku ta lastra riba tera i tur hende ku ta biba riba tera lo tembla den Mi presensia. E serunan tambe lo wordu basha abou, e subidanan steil di baranka lo kai, i tur muraya lo bash'abou.

²¹I riba tur Mi serunan lo Mi yama un spada kontra Gog," Senor DIOS ta deklara. "Spada di kada homber lo ta kontra su ruman.

²²Lo Mi bin den huisio kontra dje ku pest i ku sanger; lo Mi laga yobe riba dje, riba su trupanan i riba e hopi pueblonan ku ta huntu kune, un awaseru pisa, ku hagel, kandela i swafel.

²³I lo Mi engrandese Mi mes, santifika Mi mes i hasi Mi mes konosi den bista di hopi nashon; i nan lo sa ku Ami ta SENOR."'