Read Papantla Totonac Ezekiel 39 Bible Online

Ezekiel 39 - Papantla Totonac bible

Ezekiel 39

¹"I abo, yu di hende, profetisa kontra Gog, i bisa: 'Asina Senor DIOS ta bisa: "Mira, Mi ta kontra bo, O Gog, prens di Ros, Mesek i Tubal.

²Lo Mi ponebo bira i dirigibo, i lo Mi hasibo bin for di e partinan mas aleha di nort, i tresebo kontra e serunan di Israel.

³I lo Mi dal bo bog sak'e for di bo man robes i hasi bo flechanan kai for di bo man drechi.

⁴Lo bo kai riba e serunan di Israel, abo ku tur bo trupanan i e pueblonan ku ta huntu ku bo. Lo Mi dunabo komo kuminda na tur sorto di parha di rapina i na bestia di mondi.

⁵Lo bo kai den e kunuku habri, pasobra ta Ami a papia," Senor DIOS ta deklara.

⁶"I lo Mi manda kandela riba Magog i riba esnan ku ta biba trankil na e teranan na kosta; i nan lo sa ku Ami ta SENOR.

⁷"I lo Mi hasi Mi nomber santu konosi meimei di Mi pueblo Israel. I lo Mi no laga Mi nomber santu wordu profana mas. I e nashonnan lo sa ku Ami ta SENOR, Esun Santu di Israel.

⁸Mira, esaki ta bin i e lo sosode," Senor DIOS ta deklara. "Esei ta e dia di kual Mi a papia.

⁹"E ora ei esnan ku ta biba den e statnan di Israel lo sali, i lo uza e armanan pa sende kandela i kima nan, tantu e eskudonan grandi komo esnan chikitu, bog i flecha, klop di guera i lansa; i shete ana largu nan lo sende kandela ku nan.

¹⁰I nan lo no kohe palu for di kunuku, ni piki palu den mondi pa sende kandela, pasobra nan lo sende kandela ku e armanan. Nan lo horta for di esnan ku a horta for di nan, i plunder esnan ku a plunder nan," Senor DIOS ta deklara.

¹¹"I lo sosode ku riba e dia ei lo Mi duna Gog un luga pa dera ayanan na Israel: e vaye di esnan ku ta pasa parti pariba di laman, i esei lo blokia kaminda pa esnan ku kier pasa. Asina nan lo dera Gog ayanan, huntu ku henter su multitut, i nan lo yam'e vaye di Hamon-gog.

¹²"Shete luna largu e kas di Israel lo dera nan pa hasi e tera limpi.

¹³Henter e pueblo di e tera lo dera nan; i lo ta un onor pa nan, dia ku Mi glorifika Mi mes," Senor DIOS ta deklara.

¹⁴"Nan lo aparta hombernan ku konstantemente lo pasa dor di e tera pa dera esnan ku tabata pasa, i ku a keda benta abou na suela, pa asina hasi e tera limpi. Na fin di shete luna nan lo hasi un buskeda.

¹⁵Anto ora nan ta pasa dor di e tera i un di nan mira un wesu di hende, e ora ei e lo pone un marka banda di dje, te ora ku e kobadonan di graf a dera esaki den e vaye di Hamon-gog.

¹⁶I tambe nomber di e stat lo ta Hamona. Asina ei nan lo hasi e tera limpi."'

¹⁷"I abo, yu di hende, asina Senor DIOS ta bisa: 'Bisa tur sorto di parha i tur bestia di mondi: "Boso reuni i bin, bin huntu for di tur parti na Mi sakrifisio ku Mi ta bai prepara pa boso komo un sakrifisio grandi riba e serunan di Israel, pa boso kome karni i bebe sanger.

¹⁸Boso lo kome karni di hombernan poderoso i bebe sanger di e prensnan di tera, komo si fuera nan tabata karne chubatu, lamchi, kabritu chubatu i bishe machu, nan tur, bestianan gorda di Basan.

¹⁹Asina boso lo kome vet te ora boso barika ta yen, i bebe sanger te ora boso bira burachi di Mi sakrifisio ku Mi a sakrifika pa boso.

²⁰Na Mi mesa boso lo kome yena barika ku kabai i koredo di garoshi, ku hombernan poderoso i ku tur homber di guera," Senor DIOS ta deklara.

²¹"I lo Mi pone Mi gloria meimei di e nashonnan; i tur e nashonnan lo mira Mi huisio ku Mi a ehekuta, i Mi man ku Mi a pone riba nan.

²²For di e dia ei padilanti e kas di Israel lo sa ku Ami ta SENOR nan Dios.

²³I e nashonnan lo sa ku e kas di Israel a bai den eksilio pa motibu di nan inikidat, pasobra nan tabata infiel na Mi, i Mi a skonde Mi kara pa nan. Pesei Mi a entrega nan den man di nan atversarionan, i nan tur a kai pa medio di spada.

²⁴Konforme nan impuresa i konforme nan transgreshonnan Mi a trata ku nan, i Mi a skonde Mi kara pa nan.

²⁵Pesei, asina Senor DIOS ta bisa: "Awor lo Mi trese Jakob bek for di koutiverio i tene miserikordia di henter e kas di Israel; i lo Mi ta yalurs pa Mi nomber santu.

²⁶I nan lo lubida nan berguensa i tur nan transgreshonnan ku nan a komete kontra Mi, ora nan ta biba trankil asina na nan tera, sin ningun hende pa spanta nan.

²⁷Ora Mi trese nan bek for di e pueblonan i reuni nan for di e teranan di nan enemigunan, e ora ei lo Mi ta santifika pa medio di nan den bista di hopi nashon.

²⁸E ora ei nan lo sa ku Ami ta SENOR nan Dios, pasobra Ami a hasi nan bai den eksilio meimei di e nashonnan, i despues a reuni nan atrobe na nan mes tera; i lo Mi no laga ningun di nan ayanan mas.

²⁹Lo Mi no skonde Mi kara pa nan mas, pasobra Mi a drama Mi Spiritu riba e kas di Israel," Senor DIOS ta deklara.