Read Papantla Totonac Ezekiel 4 Bible Online

Ezekiel 4 - Papantla Totonac bible

Ezekiel 4

¹"Awor abo, yu di hende, kohe un klenku pon'e bo dilanti i graba un stat riba dje, esta, Jerusalem.

²Despues rondon'e, traha un muraya-di-atake, lanta un baluarte, lanta kampamentunan i pone bara-pa-kibra-muraya kontra dje tur ront.

³Kohe tambe un plachi di heru i lant'e komo un muraya di heru entre abo i e stat, i fiha bo bista riba dje, asina ku e ta rondona, i rondon'e. Esaki ta un senal pa e kas di Israel.

⁴"I abo, kai drumi riba bo banda robes i pone e inikidat di e kas di Israel riba dje. Bo mester karga nan inikidat segun e kantidat di dia ku bo keda drumi riba bo banda robes.

⁵Pasobra Mi a stipula pa bo un kantidat di dia ku ta koresponde ku e ananan di nan inikidat, tres shent'i nobenta dia; asina lo bo karga e inikidat di e kas di Israel.

⁶"Ora bo a kumpli ku esakinan, kai drumi pa di dos biaha, e biaha aki riba bo banda drechi, i karga e inikidat di e kas di Juda. Mi a stipula esaki pa bo pa kuarenta dia, un dia pa kada ana.

⁷E ora ei, ku brasa sunu, fiha bo bista riba Jerusalem ku ta rondona, i profetisa kontra dje.

⁸I mira, lo Mi pasa kabuya ront di bo, asina ku bo no por bira di un banda pa otro, te ora ku bo a kaba di kompleta e dianan ku bo a rondona Jerusalem.

⁹"I abo, kohe trigo, puspas, bonchi, lenteha, milo i avena, pone nan den un komchi i traha pan ku nan pa bo mes. Bo mester kom'e di akuerdo ku e kantidat di dia ku bo ta keda drumi riba bo banda drechi, tres shent'i nobenta dia.

¹⁰E kuminda ku bo ta bai kome mester wordu pisa: binti siklo pa dia; bo mester kom'e na oranan stipula.

¹¹I e awa ku bo ta bai bebe mester ta segun midi: un di seis parti di un hin; bo mester beb'e na oranan stipula.

¹²I bo mester kome esei manera pan buskuchi traha di puspas, ku bo a horna nan dilanti riba sushi di hende."

¹³Anto SENOR a bisa: "Asina e yunan di Israel lo kome nan pan na manera impuru meimei di e nashonnan pa unda Mi lo deporta nan."

¹⁴Ma mi a bisa: "Ai, Senor DIOS! Mira, nunka mi no a wordu kontamina, pasobra for di mi hubentut te awor nunka mi no a kome nada ku a muri di su mes, ni nada habraka dor di bestia, ni nunka karni impuru no a drenta mi boka."

¹⁵E ora ei El a kontestami: "Mira, lo Mi dunabo mest di baka na luga di sushi di hende, pa prepara bo pan ariba."

¹⁶Ademas El a bisami: "Yu di hende, mira, Mi ta bai stop e provishon di pan na Jerusalem. I nan lo kome pan na midi i den ansha, i bebe awa na midi i ku spantu,

¹⁷pasobra pan i awa lo ta skars. Nan lo keda tur babuka di mira otro i nan lo kaba na nada den nan inikidat.