Read Papantla Totonac Ezekiel 40 Bible Online

Ezekiel 40 - Papantla Totonac bible

Ezekiel 40

¹Den e di bint'i sinku ana di nos eksilio, na kuminsamentu di e ana, riba e di dies dia di e luna, den e di dieskuater ana despues ku e stat a wordu konkista, riba e mesun dia ei e man di SENOR tabata riba mi i El a hibami ayanan.

²Den e vishonnan di Dios El a hibami na tera di Israel i a ponemi riba un seru masha haltu mes; i riba dje na parti suit tabatin un struktura manera di un stat.

³Asina El a hibami ayanan; i mira, tabatin un homber, kende su aparensia tabata manera aparensia di brons, ku un lina di lino i un bara-di-midi den su man; i e tabata para na e entrada.

⁴I e homber a bisami: "Yu di hende, mira ku bo wowo, tende ku bo orea i paga tino na tur loke mi ta bai mustrabo; pasobra ta pa mi mustrabo nan bo a wordu tresi akinan. Deklara na e kas di Israel tur loke bo ta mira."

⁵I mira, pafo di e tempel tabatin un muraya tur ront, i e homber tabatin den su man un bara-di-midi di seis kodo, i kada un tabata un kodo i un span di man. Asina el a midi e muraya su hanchura: un bara; i e haltura: un bara.

⁶Despues el a bai na e porta ku ta keda kara pariba, a subi e trapinan i a midi e drempel di e porta: un bara hanchu; i e otro drempel: un bara hanchu.

⁷I e kamber di e guardianan tabata un bara largu i un bara hanchu; i tabatin sinku kodo entre e kambernan di guardia. I e drempel di e porta banda di e veranda di e porta kara paden tabata un bara.

⁸Despues el a midi e veranda di e porta kara paden: un bara.

⁹I el a midi e veranda di e porta: ocho kodo, i su pilarnan: dos kodo. I e veranda di e porta tabata kara paden.

¹⁰I e kambernan di guardia di e porta parti pariba tabata tres na kada banda; tur tres tabatin e mesun midi. E pilarnan tambe tabatin e mesun midi na kada banda.

¹¹Despues el a midi hanchura di e entrada: dies kodo, i largura di e porta: diestres kodo.

¹²I tabatin un muraya-di-separashon di un kodo hanchu dilanti di e kambernan di guardia na kada banda; i e kambernan di guardia tabata seis kodo kuadra na kada banda.

¹³Anto el a midi e porta for di dak di esun kamber di guardia te na dak di e otro, un hanchura di bint'i sinku kodo for di esun porta te na e porta su dilanti.

¹⁴El a traha e pilarnan sesenta kodo haltu; i e porta tabata ekstende tur ront te na e pilar di e plenchi.

¹⁵I for di parti dilanti di e porta di entrada te na parti dilanti di e veranda paden di e porta tabata sinkuenta kodo.

¹⁶I tabatin bentana di yalusi ku ta habri den direkshon di e kambernan di guardia i den direkshon di nan pilarnan, paden di e porta tur ront, i meskos den direkshon di e verandanan. I paden tabatin bentana tur ront; i na kada pilar tabatin palma graba komo adorno.

¹⁷E ora ei el a hibami na e plenchi pafo, i mira, tabatin salanan i un flur traha pa e plenchi tur ront; tabatin trinta sala riba e flur.

¹⁸I e flur, esta, e flur mas abou, tabata banda di e portanan ku tabata koresponde ku largura di e portanan.

¹⁹Despues el a midi e hanchura, for di parti dilanti di e porta mas abou te na parti dilanti di e parti pafo di e plenchi paden, shen kodo pariba i panort.

²⁰I pa loke ta e porta di e plenchi pafo, ku tabata kara panort, el a midi su largura i su hanchura.

²¹I e tabatin tres kamber di guardia na kada banda; i su pilarnan i su verandanan tabatin e mesun midi ku e prome porta. E tabata sinkuenta kodo largu i bint'i sinku kodo hanchu.

²²I su bentananan, su verandanan i su adornonan di palma tabatin e mesun midinan ku e porta ku tabata kara pariba; i por a yega ayanan dor di subi shete tret di trapi, i su veranda tabata dilanti di nan.

²³I e plenchi paden tabatin un porta dilanti di e porta banda panort, meskos ku e porta na banda pariba; i el a midi shen kodo di porta pa porta.

²⁴E ora ei el a hibami pasuit, i mira, ayanan tabatin un porta kara pasuit; i el a midi su pilarnan i su verandanan, segun e mesun midinan ei.

²⁵I e porta ku su verandanan tabatin bentana tur ront, meskos ku e otro bentananan ei. Su largura tabata sinkuenta kodo i su hanchura bint'i sinku kodo.

²⁶I tabatin shete tret di trapi ta subi bai na dje, i su verandanan tabata dilanti di nan; i e tabatin palma graba na su pilarnan, un na kada banda.

²⁷E plenchi paden tabatin un porta kara pasuit; i el a midi di porta pa porta bai suit, shen kodo.

²⁸Despues el a hibami na e plenchi paden dor di e porta pasuit; i el a midi e porta pasuit segun e mesun midinan ei.

²⁹Tambe su kambernan di guardia, su pilarnan i su verandanan tabata segun e mesun midinan ei. I e porta ku su verandanan tabatin bentana tur ront; e tabata sinkuenta kodo largu i bint'i sinku kodo hanchu.

³⁰I tabatin veranda tur ront, bint'i sinku kodo largu i sinku kodo hanchu.

³¹Su verandanan tabata kara pa e plenchi pafo, i tabatin palma graba na su pilarnan, i su trapi tabatin ocho tret.

³²I el a hibami na e plenchi paden ku ta keda kara pariba. I el a midi e porta segun e mesun midinan ei.

³³Tambe su kambernan di guardia, su pilarnan i su verandanan tabata segun e mesun midinan ei. I e porta ku su verandanan tabatin bentana tur ront. E tabata sinkuenta kodo largu i bint'i sinku kodo hanchu.

³⁴I su verandanan tabata kara pa e plenchi pafo; i tabatin palma graba na kada banda di su pilarnan, i su trapi tabatin ocho tret.

³⁵Despues el a hibami na e porta panort i el a midie segun e mesun midinan ei:

³⁶su kambernan di guardia, su pilarnan i su verandanan. I e porta tabatin bentana tur ront; e tabata sinkuenta kodo largu i bint'i sinku kodo hanchu.

³⁷Su pilarnan tabata kara pa e plenchi pafo; i e tabatin palma graba na kada banda di su pilarnan i su trapi tabatin ocho tret.

³⁸I un sala ku su entrada tabata banda di e pilarnan na e portanan; aya nan tabata laba bestia pa e ofrenda kima.

³⁹I den e veranda di e porta tabatin dos mesa na kada banda, ku nan tabata mata bestia riba dje pa e ofrenda kima, e ofrenda pa pika i e ofrenda pa kulpa.

⁴⁰Na e parti pafo, ora ta subi bai na e entrada kara panort, tabatin dos mesa. I na e otro banda di e veranda di e porta tabatin dos mesa.

⁴¹Tabatin kuater mesa na kada banda pega ku e porta: ocho mesa ku nan tabata mata bestia riba dje pa sakrifisio.

⁴²I pa e ofrenda kima tabatin kuater mesa gekap for di piedra, un kodo i mei largu, un kodo i mei hanchu i un kodo haltu, ku nan tabata pone e artikulonan riba dje ku nan tabata uza pa mata bestia pa e ofrenda kima i pa e sakrifisio.

⁴³I e haknan dobel, mes largu ku un span di man, tabata instala tur ront den e kas; i karni di e ofrenda tabata riba e mesanan.

⁴⁴I for di e parti pafo te na e porta paden tabatin salanan pa e kantadonan den e plenchi paden; un tabata na banda di e porta panort, ku kara pasuit, i un na banda di e porta pariba, kara panort.

⁴⁵I el a bisami: "Esaki ta e sala kara pasuit, destina pa e saserdotenan ku tin e tempel na nan enkargo.

⁴⁶Ma e sala kara panort ta pa e saserdotenan ku tin e altar na nan enkargo. Esakinan ta e yu hombernan di Sadok, for di e yu hombernan di Levi, kendenan ta aserka SENOR pa sirbié."

⁴⁷I el a midi e plenchi, un firkant, shen kodo largu i shen kodo hanchu; i e altar tabata dilanti di e tempel.

⁴⁸Despues el a hibami na e veranda di e tempel i a midi kada pilar di e veranda, sinku kodo na kada banda; i e porta tabata tres kodo hanchu na kada banda.

⁴⁹E veranda tabata binti kodo largu i diesun kodo hanchu; i na e trapi, pa medio di kual por a subi bai na dje, tabatin kolumnanan ku tabata pertenese na e pilarnan, un na kada banda.