Read Papantla Totonac Ezekiel 42 Bible Online

Ezekiel 42 - Papantla Totonac bible

Ezekiel 42

¹Despues el a hibami na e plenchi pafo, den direkshon panort; i el a hibami den e sala ku ta keda dilanti di e espasio separa, i dilanti di e edifisio ku ta keda parti panort.

²Den su largura, kual tabata shen kodo, e porta panort tabata keda; e tabata sinkuenta kodo hanchu.

³Dilanti di e binti kodonan ku tabata pertenese na e plenchi paden, i dilanti di e flur ku tabata pertenese na e plenchi pafo, tabatin hadrei dilanti hadrei, den tres piso.

⁴I dilanti di e salanan tabatin un pasada ta bai paden, dies kodo hanchu i shen kodo largu; i nan portanan tabata habri panort.

⁵Awor e salanan mas ariba tabata mas smal, pasobra e hadreinan tabata tuma mas espasio for di nan ku for di e esnan di e piso mas abou i esnan di e piso meimei di e edifisio.

⁶Pasobra nan tabata den tres piso i no tabatin pilar manera e pilarnan di e plenchinan. Pesei esnan mas ariba tabata mas smal ku esnan mas abou i esnan meimei, for di suela.

⁷I e muraya pafo, banda di e kambernan den direkshon di e plenchi pafo ku ta keda kara pa e salanan, tabata sinkuenta kodo largu.

⁸Pasobra largura di e salanan ku tabata den e plenchi pafo tabata sinkuenta kodo, i mira, largura di esnan kara pa e tempel tabata shen kodo.

⁹I bou di e salanan aki tabatin e entrada parti pariba, ora ta drenta nan for di e plenchi pafo.

¹⁰Den e hanchura di e muraya di e plenchi parti pariba, kara pa e espasio separa i kara pa e edifisio, tabatin salanan.

¹¹I e pasada dilanti di nan tabata parse esnan di e salanan parti panort; nan largura i nan hanchura tabata igual; i tur nan salidanan tabata segun nan midinan i segun nan entradanan.

¹²I meskos ku e entradanan di e salanan ku tabata kara pasuit, ora hende ta drenta bai paden, tabatin un entrada na kuminsamentu di e pasada tambe, e pasada dilanti di e muraya parti pariba.

¹³I el a bisami: "E salanan panort i e salanan pasuit, ku ta keda dilanti di e espasio separa, eseinan ta e salanan santu kaminda e saserdotenan ku ta aserka SENOR lo kome e kosnan di mas santu. Aya nan lo pone e kosnan di mas santu, e ofrenda di mainshi, e ofrenda pa pika i e ofrenda pa kulpa, pasobra e luga ta santu.

¹⁴Ora ku e saserdotenan drenta, nan lo no sali for di e luga santu bai na e plenchi pafo sin kita nan pana den kual nan ta sirbi, i lagu'e ayanan, pasobra eseinan ta santu. Nan lo bisti otro pana, i e ora ei nan lo aserka e luganan ku ta pa e pueblo."

¹⁵Awor ora ku el a kaba di midi e kas paden, el a hibami pafo pa medio di e porta ku tabata kara pariba, i a midie tur ront.

¹⁶El a midi banda pariba ku e richi-di-midi, sinku shen richi ku e richi-di-midi.

¹⁷El a midi banda panort, sinku shen richi ku e richi-di-midi.

¹⁸Na banda pasuit el a midi sinku shen richi ku e richi-di-midi.

¹⁹El a bira banda pabou i a midi sinku shen richi ku e richi-di-midi.

²⁰El a midie na e kuater bandanan; e tabatin un muraya tur ront: largura sinku shen i hanchura sinku shen, pa hasi separashon entre loke ta santu i loke ta profano.